San Mateo 14

1Ta sc'ac'alil le'e, li Herodes ti yich'oj ta venta Galileae ja'o yorail laj ya'ay c'usitic ta spas li Jesuse. 2Jech laj yalbe li xchi'iltac ta abtele: “Le'e ja' li Juan j'ac'vanej ta vo'e. Yu'un icha'cuxesat, ja' yu'un oy ep svu'el, jech xu' yu'un ta spas ep sq'uelubiltac”, xi. 3Yu'un li Herodese ja' ono'ox la stac ta tsaquel li Juane, laj yal mantal ti ac'o chucatuc ta cadenae, la stic' ta chuquel ta scoj li Herodiase, ja' li yajnil yits'ine ja' li Felipee. 4Yu'un jech i'albat yu'un li Juane: “Mu jechuc chal ta mantal ti laj avic'be yajnil li avits'ine”,, x'utat. 5Ja' yu'un li Herodese tsc'an ox ta smil ta ora li Juane pero ixi', yu'un scotolic xch'unojic ti ja' yaj'alc'op Dios li Juane. 6Ts'acal to la spas q'uin sventa bu ora ivoc' li Herodese. Li stseb Herodiase te lic ac'otajuc ta stojol scotol li boch'otic te oyique. Li Herodese toj lec laj yil. 7Jech laj yalbe li tsebe: —C'anbun c'usiuc no'ox chac'an. Yiloj Dios ti chacac'bote —xut. 8Li tsebe isujat yu'un sme' ti ja' ac'o sc'anbe sjol li Juane. Li tsebe jech laj yalbe li Herodese: —Ac'bun tal ta junuc jayil taq'uin sjol li Juan j'ac'vanej ta vo'e —xut. 9Li Herodese toj vocol laj ya'ay. Pero ta sventa ti ta stojol Dios laj yalbee, xchi'uc te laj ya'yic li boch'otic te co'ol oyic ta mexa xchi'uque, jech laj yal mantal ti ac'o yac'beique. 10Laj yal mantal ti ac'o bat sc'ocbeic tal sjol li Juan te tiq'uil ta chuquele. 11Te laj yich'beic tal ta jun jayil taq'uin, laj yac'beic li tsebe. Li tsebe laj yich' batel ta stojol li sme'e. 12Te italic yajchanc'optac li Juane, laj yich'beic batel li sbec'tale, bat smuquic. Ts'acal te ital yalbeic li Jesuse. 13C'alal laj ya'ay li Jesuse, iloc' batel, i'och ta canova, ibat ta xocol banamil ti bu mu'yuc cristianoe. C'alal laj ya'yic li epal cristianoetique, te nabal ibatic, ta yacanic iliquic batel ta ep lumetic. 14C'alal iloc' ta canova li Jesuse, laj yil ti te xa tsobol epal cristianoetique, jech ic'uxubaj ta yo'nton, la scoltaan scotol li jchameletic te xchi'inojic tale. 15C'alal bat xa c'ac'ale, inopajic batel ta stojol Jesús li yajchanc'optaque, jech laj yalbeic: —Li'i xocol banamil. Bat xa li c'ac'ale. Ja' lec taco batel li cristianoetique ac'o bat sman sve'elic ta tsobtsobnaetic —xutic. 16Pero li Jesuse jech laj yal: —Mu persauc chbat sa' sve'el stuquic. Ac'beic sve'el vo'oxuc —xut. 17Jech la stac'beic: —Mu'yuc c'usi oy cu'uncutic. Ja' no'ox vo'ob pan xchi'uc cha'cot choy li' quich'ojcutic —xutic. 18Itac'ov li Jesuse: —Ich'ic tal li'i —xi. 19Li Jesuse laj yalbe mantal cristianoetic ti ac'o chotiicuc ta c'unil jobeltique. Li Jesuse la stsac li vo'ob pane xchi'uc li cha'cot choye. La sq'uel muyel vinajel, la stojbe ta vocol Dios. La svoc' li pane xchi'uc li choye. Laj yac'be li yajchanc'optaque. Ja' xa la spucbeic ec li cristianoetique. 20Ive'ic scotolic, lec inoj xch'utic o. La stsobbeic li scomelaltaque, la staic lajchab moch. 21Ti c'u yepal ive'ique, oy van vo'miluc viniquetic. Ja' slecoj li antsetique xchi'uc li ololetique. 22Li Jesuse ta ora laj yalbe yajchanc'optac ti ac'o ochicuc ta tenalte' canovae, yu'un ba'yuc ac'o jelovicuc batel ta jot nab. Li Jesuse te to icom. Jech stuc xa la sc'opan comel li cristianoetique. 23C'alal la sc'opan comel li cristianoetique, imuy batel ta vits, bat sc'opan Dios. C'alal i'ic'ub osile, stuc te oy o ta vits li Jesuse. 24Li yajchanc'optaque ta o'lol nab xa'ox x'ech'ic. Toj tsots li iq'ue, xyuc'lajet no'ox li nabe. Toj vocol ta xanov batel li canovae yu'un ta snup sbaic xchi'uc li iq'ue. 25Po'ot xa tsacub osil ital yo' bu oyic yajchanc'optac li Jesuse. Laj yilic ta xanov tal ta yacan ta ba nab. 26C'alal laj yilic ti chanov ta ba nabe, toj xi'el ic'otic. La snopic ti ja' ch'ulelale. X'avetic xa, yu'un toj ech'em ixi'ic. 27Ta ora ic'opoj li Jesuse, jech laj yalbe: —Mu me xaxi'ic, vu'un Jesusun. Tsatsubtaso avo'ntonic —xut. 28Itac'ov li Pedroe: —Cajval, me melel ti vo'ote, alo mantal ti xu' chixanov tal ta ba nab eq'ue, yu'un chital te yo' bu oyote —xut. 29Itac'ov li Jesuse: —La' me —xi. Jech iloc' ta canova li Pedroe, ixanov batel ta ba nab yu'un chbat sta li Jesuse. 30Pero c'alal laj yil c'u x'elan li iq'ue, ixi'. C'an xa ochuc yalel ta yut nab. Jech laj yapta li Jesuse: —Cajval, coltaun —xut. 31Li Jesuse ta ora la stsacbe sc'ob li Pedroe. Jech laj yalbe: —¡Mu'yuc to lec xch'unojel avo'nton! ¿C'u yu'un chlo'ilaj avo'nton? —xut. 32C'alal i'ochic ta yut canovae, ich'abi li iq'ue. 33Li yajchanc'optac ti te oyic ta yut canovae la squejan sbaic ta stojol li Jesuse. Jech laj yalbeic: —Ta melel vo'ot Xnich'onot li Diose —xutic. 34C'alal ic'otic ta jot nabe, te iloq'uic ta canova ta Genesaret. 35Li jnaclumetic te nacajtique laj yotquinic ti ja' Jesús te ic'ote. Ta ora bat yalic ta scotol yosilal Genesaret ti ital xa li Jesuse. Te laj yiq'uic tal ta stojol Jesús ep jchameletic. 36Oy la sc'anbeic Jesús ti ac'o me yoc sc'u' no'ox ta spicbeique. Li boch'otic la spicbeic yoc sc'u'e icolic ec.


Copyright
Learn More

will be added

X\