San Mateo 11

1C'alal ilaj yo'nton ta yalbel mantal yajchanc'optac li Jesuse, iloc' batel, ibat chanubtasvanuc, bat yal sc'op Dios ta lumetic yu'unic. 2C'alal laj ya'ay c'usitic tspas Cristo li Juan te tiq'uil ta chuquele, la stac tal jayibuc yajchanc'optac. 3Jech vul sjac'beic li Jesuse: —¿Me vo'ot ti sc'oplal ono'ox chatale, o me ta to jmalacutic yan? —xutic vulel li Jesuse. 4Itac'ov li Jesuse: —Bat albeic Juan scotol li c'usitic chavilic, li c'usitic chava'yic li'i. 5Li ma'satetique ta xilic xa osil. Li coxoetique ta xanovic xa. Li jc'a'el chameletique icolic xa. Li boch'otic macal to'ox xchiquinique ijam xa xchiquinic. Li animaetique icha'cuxiic xa. Li me'onetique icholbat xa ya'yic li Lequil A'yeje. 6Xcuxet no'ox yo'nton li boch'o mu xlo'ilaj yo'nton cu'une, utic c'otel li Juane —x'utatic yu'un li Jesuse. 7C'alal ta xa'ox xbatique, li Jesuse lic yalbe ya'yic sc'oplal Juan li cristianoetic te oyique, jech laj yal: “C'alal la'ayic ta xocol banamile, ¿c'usi ay aq'uelic? ¿Me ja' no'ox ay aq'uelic jtec' aj ta ti' uc'um ti xne'et no'ox ta iq'ue? 8¿C'usi ay aq'uelic cha'e? ¿Me ja' ay aq'uelic jun vinic ti bats'i lequic sc'u' spoq'ue? Mo'oj. Li boch'otic lequic sc'u' spoq'ue ja' li boch'otic te oyic ta sna ajvaliletique. 9¿C'usi ay aq'uelic? ¿Me mu ja'uc ay aq'uelic jun j'alc'op? Chacalboxuc ava'yic, ta melel ja' jun j'alc'op; ja' xjelov tsatsal yabtel jech chac c'u cha'al li yantic j'alc'opetique. 10Yu'un jech ono'ox ts'ibabil sc'oplal ta sc'op Dios: ‘A'yo ava'ay, ba'yuc ta xjelov avu'un li j'almantal ta jtac batele; ja' ta sjambot abe’, xi ono'ox ts'ibabil sc'oplal. 11Melel li c'usi chacalboxuque, ta scotol li cristianoetic ijelovic xae, mu'yuc boch'o jech muc' sc'oplal jech chac c'u cha'al li Juan j'ac'vanej ta vo'e. Pero li boch'o chac' sba ta ventainel yu'un Diose, ac'o me mu'yuc tsots yabtel, ja' xjelov sc'oplal jech chac c'u cha'al li Juane. 12“C'alal lic stsac yabtel li Juan j'ac'vanej ta vo'e xchi'uc c'alal to tanae, li ventainel yu'un Diose tsots chich' uts'intael. Li boch'o ch-uts'intavanique tsc'an tscontrainic ta persa li ventainel yu'un Diose. 13Scotol li mantaletic xchi'uc li c'usitic ts'ibabil yu'un j'alc'opetique ja' chalbe sc'oplal ti chtal li ventainel yu'un Diose, ja' to ic'ot ta pasel c'alal ital li Juan j'ac'vanej ta vo'e. 14Li boch'otic ta xch'unic jeche, chlic sna'ic ti ja' xq'uexol Elías li Juan ti sc'oplal ono'ox chtale. 15Li boch'o oy xchiquine ac'o snopbe lec smelol. 16“¿C'usi xu' ta jco'oltsan o li cristianoetic li' ta orae? Ja' jechic jech chac c'u cha'al ololetic ti te chotajtic chtajinic ta ch'ivit, ti jech chalbe xchi'ilique: 17‘La jupanbotcutic ama, pero muc xa'ac'otajic. C'alal li'oc'cutic ta scoj ti oy boch'o icham cu'uncutique, muc xavat avo'ntonic noxtoc’, xiic. 18Yu'un c'alal ital li Juane, muc xaxchi'inoxuc ta ve'el, ta uch'bajel. ‘Ochem pucuj ta yo'nton’, xachiic. 19C'alal lital, vu'un ti Xnich'on cristiano lic'ote, la jchi'inoxuc ta ve'el, ta uch'bajel, pero jech laj avalic noxtoc: ‘Q'uelavil, toj ech'em xve', toj ech'em xuch' ya'lel ts'usub. Lec chil sbaic xchi'uc jtsobpatanetic xchi'uc yan jpasmuliletic’, xachiic noxtoc. Pero li boch'o bije ta xvinaj ta sventa yabtel”, xi li Jesuse. 20Li Jesuse tsots lic sc'opan li lumetic ti bu la spas ep sq'uelubiltac stsatsale, yu'un muc scomtsanic li c'usitic chopol tspasique. Jech laj yalbe: 21“¡Toj abul aba, lum Corazín! ¡Toj abul aba, lum Betsaida! Ti lajuc yilic la jpas sq'uelubil jtsatsal ec li yanlum cristianoetic te nacajtic ta lum Tiro xchi'uc ta lum Sidón ta vo'one jech chac c'u cha'al laj avilic la jpas li' ta atojolic li vo'oxuque, la sutes yo'ntonic yu'un smulic, la slapic c'u'il sventa at-o'nton, xchi'uc la sbon sbaic ta tanil c'oc' ti jechuque. 22Ja' yu'un chacalboxuc, c'alal tsta sc'ac'alil ta xchapanvan li Diose, ja' jutuc stojol smul chich' li yanlum cristianoetic te nacajtic ta Tiro xchi'uc ta Sidón ta vo'onee. Li vo'oxuque ech'em tsots chavich' stojol amulic. 23Li vo'ote Capernaum, ¿me chacuy ti chatoy batel c'alal ta vinajele? Mu'yuc. C'alal to ta yavil animaetic chavich' jipel yalel. Lajuc yilic la jpas sq'uelubil jtsatsal ta stojolic ec li lum Sodoma jech chac c'u cha'al laj yich' pasel te ta atojole, te to oy o tana li lum Sodoma ti jechuque. 24Ja' yu'un chacalboxuc ava'yic: C'alal tsta sc'ac'alil ta xchapanvan li Diose, ja' jutuc stojol smul chich' li lum Sodomae. Li vo'ote ech'em tsots chavich' stojol amul”, xi li Jesuse. 25Lic sc'opan Dios li Jesuse, jech laj yal: “Tati, vo'ot yajvalot li vinajel banamile. Colaval ti muc xavac'be ya'yic smelol c'usi laj cal xchi'uc c'usi la jpas li boch'otic bijique xchi'uc li boch'otic lec sna' yalojique. Ja' no'ox laj avac'be ya'yic smelol li boch'otic ja' jechic jech chac c'u cha'al ololetique. 26Lec oy Tati, yu'un jech la sc'an avo'nton”, xi. 27Jech lic yal yan velta li Jesuse: “Scotol li c'usitic oye, yac'ojbun ta jc'ob li Jtote. Mu'yuc boch'o yan sna'be c'u x'elan yo'nton li Nich'onile, ja' no'ox sna' stuc li Totile. Ja' no'ox jech ec li Totile, mu'yuc yan boch'o sna'be c'u x'elan yo'nton, ja' no'ox sna' li Nich'onile, xchi'uc ja' no'ox tsna'ic ec li boch'otic ta x'ac'bat sna'ic yu'un li Nich'onile. 28La'ic ta jtojol acotolic, vo'oxuc ti lubenoxuc yu'un li tsatsal abtele xchi'uc li alal icatsile, vu'un ta xcac' acux avo'ntonic. 29Ja' cuchic li icatsil cu'une, ja' chanic c'u x'elan co'nton yu'un toj lec co'nton, biq'uit cac'oj jba. Me jech chapasique, jech cux xi avo'ntonic. 30Yu'un li abtel cu'une, mu'yuc tsots ta pasel, li icatsil cu'une, mu'yuc ol ta cuchel”, xi li Jesuse.


Copyright
Learn More

will be added

X\