San Marcos 8

1Ta yorail le'e bats'i ep cristianoetic la stsob sbaic tal yan velta ta stojol li Jesuse; mu'yuc xa c'usi ta sve'ic. Jech lic yic' yajchanc'optac li Jesuse. Jech laj yalbe: 2—Toj abul sbaic chquil li cristianoetique, yu'un yoxibal xa c'ac'al li' xchi'inojutic; mu'yuc xa c'usi ta sve'ic. 3Me mu'yuc ve'emic ta jtac batel ta snaique, oy yic'al ta x'alubic ta be, yu'un oy nom liquemic tal —xut. 4Itac'ov li yajchanc'optaque: —¿Boch'o xu' tsta epal pan li' ta xocol banamil sventa chich' mac'linel li epal cristianoetique? —xutic. 5Jech ijac'batic yu'un li Jesuse: —¿Jayib pan avich'ojic? —x'utatic. —Vucub —xiic. 6Li Jesuse laj yalbe cristianoetic ti ac'o chotiicuc ta lumtique. La stsac li vucub pane; la stojbe ta vocol Dios. La svoc' li pane; laj yac'be li yajchanc'optaque, yu'un ac'o spucbeic li cristianoetique. 7Oy yich'ojic jaycotuc bic'tal choy noxtoc. La stojbe ta vocol Dios noxtoc li Jesuse. Laj yal ti ac'o spucbeic li cristianoetique. 8Lec ive' scotolic; inoj xch'utic o. Lic stsobbeic li scomelale; inoj yu'unic vucub moch. 9Ti c'u yepal ive'ique oy van chanmiluc (4,000). C'alal ive'ique, itacatic batel yu'un li Jesuse. 10Jech ta ora i'ochic ta barco xchi'uc yajchanc'optac li Jesuse. Ibatic ta yosilal Dalmanuta banamil. 11Italic jayibuc fariseoetic, tal stsaquic ta lo'il li Jesuse, yu'un tsq'uelic c'uxi ta xtac'ov. La sc'anbeic ti ac'o spas sq'uelubil stsatsal ta vinajele. 12Tsots la sjic' yo'nton li Jesuse, jech laj yal: —¿C'u yu'un ja' no'ox tsc'an ta sq'uelic sq'uelubil jtsatsal li cristianoetic li'i? Ta xcalboxuc ta jamal, mu'yuc xa yan sq'uelubil jtsatsal cha'ac'bat avilic —xi. 13Li Jesuse la scomtsan li fariseoetique, i'ochic yan velta ta canova; ibatic ta jot nab. 14Li yajchanc'optac Jesuse muc xt'ab ta yo'nton laj yich'ic batel spanic. Jun no'ox pan te yich'ojic batel ta canova. 15Li Jesuse jech laj yalbe li yajchanc'optaque: —Q'uelo me abaic ta sventa svolesubil xch'ut pan yu'un li fariseoetique xchi'uc svolesubil xch'ut pan yu'un li Herodese —xut. 16Li yajchanc'optaque jech laj yalbe sbaic: —Ja' van ta xalbutic ti muc xquich'tic tal jpantique —xut sbaic. 17Li Jesuse la sna' li c'usi laj yalique, jech laj yalbe: —¿C'u yu'un ja' chanopic ta sventa ti muc xavich'ic tal jpantique? ¿Me yu'un mu'yuc to chc'ot ta avo'ntonic? ¿Me mu'yuc to chava'ibeic smelol? 18Oy asatic ¿me mu xavilic? Oy achiquinic ¿me mu xava'yic? ¿Me yu'un mu xa xana'ic li c'usi la jpase? 19C'alal la jvoc' vo'ob pan sventa la jmac'lin vo'mil (5,000) viniquetique, ¿jayib moch laj ataic li scomelal laj atsobique? —xut. —Lajchab moch —xiic. 20—Ta yan velta c'alal la jvoc' vucub pan sventa chanmile, ¿jayib moch laj ataic li scomelal laj atsobique? —xut. —Vucub —xiic. 21Jech i'albatic yu'un li Jesuse: —¿C'u yu'un ti yoquel to mu xava'ibeic smelole? —x'utatic. 22C'alal ic'otic ta lum Betsaidae, te la snitic tal ta stojol Jesús jun ma'sat vinic. La sc'anbeic vocol Jesús ti ac'o yac' sc'ob ta sbae. 23Li Jesuse la stsacbe sc'ob li ma'sate; la snit loq'uel ta ti'lum. La xjaxbe stub ta sat; la spicbe ta xchibal sc'ob. La sjac'be me xil xa jutuc osil. 24Li vinique la stoy sat, jech laj yal: —Ta xquil ta xanovic li cristianoetique, pero xco'laj xchi'uc te'etic ta xquil —xi. 25Li Jesuse la spicbe yan velta li sate, jech lic jamuc o lec, lic yil lec scotol. 26Li Jesuse la stac batel ta sna li vinique, jech laj yalbe: —Mu xa me xa'och batel ta yut lum —xut. 27Li Jesuse ibatic xchi'uc yajchanc'optac ta tsobtsobnaetic te ta lum Cesarea yu'un Filipo. C'alal chanovic batel ta bee, jech lic sjac'be yajchanc'optac li Jesuse: —¿Boch'oun ta xalic li jchi'iltactique? —xut. 28Itac'ovic: —Oy ta xalic ti vo'ot Juan j'ac'vanejot ta vo'e. Oy yan ta xalic ti vo'ot Eliasote. Oy yan ta xalic ti vo'ot jun yaj'alc'opot Diose —xutic. 29Jech ijac'batic yu'un ec li Jesuse: —Li vo'oxuque ¿boch'oun chavalic ec? —x'utatic. Itac'ov li Pedroe: —Vo'ot li Cristoote —xut. 30Li Jesuse laj yalbe lec mantal yajchanc'optac ti mu me boch'o xalbeic batele. 31Li Jesuse jech lic yalbe li yajchanc'optaque: “Vu'un ti Xnich'on cristiano lic'ote, ta persa ta xca'ay ep jvocol, yu'un mu xisc'anicun li jchapanvanejetique xchi'uc li banquilal paleetique xchi'uc li jchanubtasvanejetic ta smantal Diose. Ta ximilat, pero chicha'cuxi ta yoxibal c'ac'al”, xut. 32Li Jesuse laj yal ta jamal ti chmilate. Li Pedroe slecoj laj yic' loq'uel li Jesuse; tsots la spajes. 33Ijoyij li Jesuse; la sq'uel li yajchanc'optaque. Laj yut li Pedroe, jech laj yalbe: —Banquilal Pucuj, loc'an ta jtojol. Ma'uc chanop c'usi tsc'an Dios. Ja' no'ox chanop c'usi tsc'an cristiano —xut. 34Li Jesuse laj yic' ta stojol li epal cristianoetique xchi'uc li yajchanc'optaque. Jech laj yalbe: —Li boch'o tsc'an chists'aclinune mu me xc'uxubin sba. Ac'o xq'uech scruz; ac'o sts'aclinun batel. 35Yu'un li boch'o ta spoj sba yu'un tsc'an chcuxie, ja' chch'ay. Yan li boch'o mu sventauc me te chcham ta jcoj, xchi'uc ta scoj jc'ope ja' ta xcuxi. 36¿C'usi tsta o jun cristiano me ta xu'unin scotol c'usitic oy li' ta banamil, me ja' ch'ayel ta xbat stuque? 37¿C'usi xq'uexol xu' chac' jun cristiano ta sventa li xcuxlejale? 38Li boch'otic ta xq'uexov cu'un, xchi'uc ta xq'uexov ta xch'unel jc'op ta stojol li cristianoetic li' ta ora ti mu junuc yo'ntonic ta stojol Diose, xchi'uc ti chopol c'usitic tspasique, ja' no'ox jech vu'un ti Xnich'on cristiano lic'ote ta xiq'uexov yu'unic ec ti c'alal chital xchi'uc xojobal Jtot, xchi'uc li ch'ul j'almantaletic yu'une —xut.


Copyright
Learn More

will be added

X\