San Marcos 7

1Te italic ta stojol Jesús li fariseoetique xchi'uc jayibuc jchanubtasvanejetic ta smantal Dios; te iliquic tal ta Jerusalén. 2Te laj yilic ti oy jayibuc yajchanc'optac Jesús ti mu'yuc la spasic c'u x'elan stalelic ta spoc sc'obic c'alal ta xve'ique, jech te lic stic'beic smul. 3(Yu'un li fariseoetic xchi'uc scotol li judioetique ja' yich'ojbeic stalel li moletic ta vo'onee. Me mu'yuc tspasic c'u x'elan stalel tspoc sc'obique, mu xu' ta xve'ic. 4C'alal me isutic tal ta ch'ivite, mu'yuc ta xve'ic ti me mu'yuc ta spasic c'u x'elan stalelique. Oy to yan c'usitic stalelic tspasic; ja' ti c'u x'elan ta suc' sbin, xbochic, xchi'uc sets'ique.) 5Li fariseoetic xchi'uc li jchanubtasvanejetic ta smantal Diose jech la sjac'beic li Jesuse: —¿C'u yu'un mu'yuc yich'ojbeic stalel moletic ta vo'one li avajchanc'optaque? Yu'un xchi'uc sbolil sc'obic ta xve'ic —xutic. 6Itac'ov li Jesuse: —Jlo'lavanejoxuc. Ja' ac'oplalic ti jech ts'ibabil yu'un j'alc'op Isaiase: ‘Li cristianoetic li'i chiyich'icun ta muc' ta yeic no'ox, pero li yo'ntonique bats'i nom oy ta jtojol. 7Altic ti chiyich'icun ta muc' yilele, yu'un smantal no'ox cristiano ta xchanubtasvanic’, xi li Isaiase. 8Yu'un li vo'oxuque ja' acomtsanojbeic smantal Dios ta scoj ti ja' avich'ojbeic stalel li cristianoetique —xi li Jesuse. 9Jech laj yalbe noxtoc: —Toj lec xana'ic c'usi chapasic sventa chacomtsanbeic smantal Dios ta scoj ti ja' avich'ojbeic stalel li moletic ta vo'onee. 10Li Moisese jech yaloj: ‘Ich'o ta muc' atot ame'’, xchi'uc ‘Li boch'o yan xich' xalbe stot sme'e, ac'o yich' milel’, xi. 11Pero li vo'oxuque lec chava'yic me jech chalbe li stot sme'ique: ‘Mu xu' ta jcoltaot, yu'un scotol li c'usi oy cu'une laj xa cal ti chcac'be ta smoton Diose’, me xutique. 12Xchi'uc chavalbeic ti xu' xa mu xc'uxubin o li stot sme'ique. 13Ja' jech chalajesbeic sc'oplal smantal Dios ta scoj ti ja' avich'ojbeic stalel li atot ame'ique. Oy to ep yan c'usitic co'ol chapasic —x'utatic yu'un li Jesuse. 14Li Jesuse laj yic' yan velta li epal cristianoetique, jech laj yalbe: —A'yo ava'yic li c'usi ta xcalboxuque. A'ibeic lec smelol. 15Li c'usi ta x'och ta xch'ut cristianoe ma'uc ta xbolib o yo'nton yu'un. Ja' ta xbolib o yo'nton yu'un li c'usi ta xloc' tal ta yut yo'ntone —x'utatic yu'un li Jesuse. 17Li Jesuse la scomtsan li cristianoetique, bat ochuc ta na. Te lic jac'batuc yu'un yajchanc'optac c'usi smelol li lo'il laj yale. 18Jech laj yal li Jesuse: —¿Me mu xava'ibeic smelol ec li vo'oxuque? ¿Me mu xana'ic ti mu xbolibtasat yu'un li c'usi ch-och ta xch'ut cristianoe? 19Yu'un mu x'och batel ta yo'nton; ta xch'ut no'ox ta xc'ot, ja'o ta xloc' —x'utatic. Ti jech laj yal li Jesuse, ja' laj yac' ta a'yel ti lec scotol li ve'liletique. 20Jech laj yalbe noxtoc li yajchanc'optaque: —Li c'usi chopol ta xloc' tal ta yo'nton cristianoe ja' chbolib o yo'nton yu'un. 21Yu'un ta yut yo'nton cristiano ta xloc' tal li c'usi chopol ta snopique, me ta xmulivaj, me ta x'elc'aj, me ta xmilvan, 22me c'usiuc no'ox ta sc'upin, me ven chopol c'usi tspas, me ta xlo'lavan, me mu xq'uexov ta spasel li c'usi nopen xa'ye, me xti'et yo'nton, me ta slo'ilta xchi'il, me ta stoy sba, me toj bol. 23Scotol li c'usitic chopol li'i, ta yut yo'nton cristiano ta xlic tal. Le'e ja' ta xbolib o yo'nton yu'un —xut yajchanc'optac li Jesuse. 24Iloc' batel li Jesuse; ibat ta yosilal Tiro. Te i'och ta jun na, yu'un mu sc'an xvinaj bu oy, pero ivinaj ono'ox. 25Ta ora i'aybat sc'oplal yu'un jun ants, ochem pucuj ta yo'nton stseb. Te ital ta stojol li Jesuse; la squejan spatan sba ta stojol. 26Li antse ja' yanlum; te liquem tal ta Sirofenicia banamil. Scotol yo'nton la sc'anbe Jesús ti ac'o sloq'uesbe pucuj ta yo'nton li stsebe. 27Li Jesuse jech laj yalbe li antse: —Ac'o ve'icuc ba'yuc li nich'naletique. Mu lecuc me ta jpojbetic yotic li nich'naletique, yu'un chcac'betic sve'ic unin ts'i'etic —xut. 28Itac'ov li antse: —Jech xaval, Cajval. Pero li xch'uch'ulil yot nich'naletic ta xbaj yalel ta yolon mexae ja' ta stam sve'ic ec li unin ts'i'etique —xi li antse. 29Li Jesuse jech laj yalbe: —Ta sventa ti jech latac'ove, loq'uem xa pucuj ta yo'nton li atsebe. Junuc avo'nton batan —xut. 30C'alal ic'ot ta sna li antse, mochol xa ta svayab c'ot sta li stsebe, yu'un loq'uem xa li pucuj ta yo'ntone. 31Iloc' batel ta yosilal Tiro li Jesuse; te ijelov batel ta yosilal sidonetic. I'ech' xtuch' batel li yosilal Decapolise; te ic'ot ta nab Galilea. 32Te laj yic'beic tal ta stojol Jesús jun uma' vinic xchi'uc macal xchiquin. La sc'anbeic Jesús ti ac'o yac' sc'ob ta sbec'tal li vinique. 33Li Jesuse slecoj laj yic' loq'uel li vinique; la stic' ochel sni' sc'ob ta jujun xchiquin. Xchi'uc la stubta sc'ob; la spicbe yoc' li vinique. 34La sq'uel muyel vinajel; la sjic' yo'nton, jech laj yal: “Efata”, xi. “Jaman”, xi smelol. 35Ta ora ijam xchiquin xchi'uc ye li uma'e, jech lec lic c'opojuc. 36Li Jesuse laj yalbe cristianoetic ti mu me boch'o xalbeic batele, pero muc xch'unic. C'alal me ep ta velta i'albatic ti mu me xalic batele, yo'to ech'em lic yalic batel. 37Yu'un toj labal sba laj yilic li c'usi ic'ot ta pasele, jech laj yalic: “Toj lec c'usitic la spas li Jesuse. Xu' yu'un tsjambe xchiquin li coque xchi'uc tsjambe ye li uma'e”, xiic.


Copyright
Learn More

will be added

X\