San Marcos 6

1Li Jesuse iloc' batel, ibat ta slumal, te xchi'uc batel li yajchanc'optaque. 2C'alal ista sc'ac'alil ta xcux yo'ntonique, li Jesuse ibat chanubtasvanuc ta nail tsobobbail. Ep boch'otic laj ya'ibeic sc'op li Jesuse; toj ch'ayel ic'ot yo'ntonic. Jech lic sjac'be sbaic: —¿Bu la xchan tal jech li jchi'iltic li'i? ¿Bu la sta tal li sbijile xchi'uc ti ep sq'uelubil stsatsal chac' ta ilele? 3¿Me mu ja'uc li carpintero yol Mariae? ¿Me mu ja'uc xchi'iltac li Santiago, li José, li Judas, xchi'uc Simone? ¿Me mu ja'uc xchi'iltac noxtoc li antsetic li' jchi'uctic ta nacleje? —xut sbaic. Jech muc xich'ic o ta muc' li Jesuse. 4Jech i'albatic yu'un li Jesuse: —Li j'alc'opetique ich'bilic ta muc'. Pero ta slumal stuquic xchi'uc ta stojol yuts' yalaltaquic xchi'uc ta sna stuquique mu x'ich'atic ta muc' —xut. 5Jech muc x'ac'bat spas muc'tic sq'uelubil stsatsal. Ja' no'ox la scolta jayibuc jchameletic ti c'alal laj yac' sc'ob ta sbec'talique. 6Li Jesuse labal sba laj ya'ay ti mu sc'an xch'unique. Jech ibat ta tsobtsobnaetic ti te no'ox nopajtique. Te ichanubtasvan. 7Li Jesuse laj yic' li lajchab yajchanc'optaque. La stacan batel ta chabchab. Laj yac'anbe svu'elic yu'un ac'o sloq'uesic pucujetic. 8Laj yalbe ti mu me c'usi xich'ic batel ta sventa bee. Ja' no'ox ac'o yich'ic batel snamte'ic. Mu me xich' batel sve'elic, me snuti'ic, o me staq'uinic. 9Ja' no'ox ac'o slap batel xonobic; mu me xich' batel cha'lic sc'u'ic. 10Jech laj yalbe: —Ti bu chc'ot ach'aman anaique, te me oyanic o. Ja' to xaloq'uic batel me chabatic ta yan lume. 11Me oy bu mu xayotesoxuc, xchi'uc me mu sc'an xa'ay ac'opique, loc'anic batel. Lilino comel spucucal avacanic. Ja' sna'ubil yu'unic ti bajbil chcomic oe —x'utatic yu'un li Jesuse. 12Jech iloq'uic batel. Laj yalic batel ti ac'o sutes yo'ntonic ta stojol Diose, 13xchi'uc la sloq'uesic ep pucujetic ta yo'nton cristianoetic, xchi'uc la xjaxbeic aceite ep jchameletic, jech icol yu'unic. 14Li ajvalil Herodese laj ya'ibe sc'oplal li Jesuse, yu'un puquem sc'oplal ta scotol lumetic. Oy ep boch'otic jech laj yalic: —Le'e ja' Juan j'ac'vanej ta vo', yu'un icha'cuxesat, jech oy ep svu'el ta spas li c'usitic ta spase —xiic. 15Oy yantic jech laj yalic: —Ja' j'alc'op Elías —xiic. Oy yantic jech laj yalic: —Ja' jun j'alc'op jech chac c'u cha'al li yaj'alc'optac Dios ta vo'onee —xiic. 16C'alal laj ya'ay Herodes c'usi chalic li cristianoetique, jech laj yal: —Ja' Juan ti laj cac' ta c'ocbel sjole. Yu'un van icha'cuxi —xi. 17Yu'un li Herodese ja' ono'ox laj yac' ta tsaquel li Juane. Laj yal mantal ti ac'o chucatuc ta cadena ta yut chuquinab ta scoj li Herodiase, ja' li yajnil to'ox yits'in laj yic'bee, ja' li Felipee. 18Yu'un li Juane jech laj yalbe ta jamal li Herodese: “Mu jechuc chal ta mantal ti laj apojbe yajnil avits'ine”, xut. 19Jech ec li Herodiase toj chopol laj ya'ay ti jech laj yal li Juane, jech tsc'an ta smil. Pero mu'yuc to'ox c'uxi laj yut. 20Li Herodese xi'em to'ox ta sventa li Juane, yu'un sna'oj ti ja' lequil vinique xchi'uc ti mu'yuc smule. Jech laj yac' ta chabiel, yu'un jech mu me xmilat. Ac'o me muc xc'ot ta yo'nton c'usi laj yal li Juane, pero xcuxet no'ox yo'nton tsc'an cha'ay. 21Ts'acal to c'alal la spasbe sq'uinal c'usi ora ivoc' li Herodese, la sna' ti ja' xa yorail tspas c'usi oy ta yo'nton li Herodiase. Li Herodese laj yic'an scotol li j'abteletic yu'une, li banquilal soldadoetique xchi'uc li jpasmantaletic ta scotol Galilea banamile. 22Te i'och ac'otajuc stseb li Herodiase. Li Herodese toj lec laj yil xchi'uc li boch'otic te co'ol chve'ic ta mexae. Li Herodese jech laj yalbe li tsebe: —C'anbun c'usiuc no'ox chac'anbun, chacac'bot. 23Yiloj Dios ti chacac'bot c'usiuc no'ox chac'anbune. Ac'o me chac'anbun ta o'lol ti c'u smuc'ul jventainoje, chacac'bot —xut. 24Jech iloc' sjac'be sme' li tsebe: —¿C'usi ta jc'an xana'? —xut. Itac'ov li me'ile: —Ja' xac'anbe sjol li Juan j'ac'vanej ta vo'e —xut. 25Jech ital ta anil li tsebe; i'och yo' bu oy li Herodese. Jech laj yalbe: —Ja' ta jc'an chavac'bun ta ora ta jayil taq'uin sjol li Juan j'ac'vanej ta vo'e —xut. 26Li Herodese ep laj yat yo'nton. Pero ta scoj ti la st'abbe sbi Diose, xchi'uc ti laj ya'yic li boch'otic yic'anoje, jech muc sc'an sutes sc'op ta sventa li c'usi ic'anbate. 27Jech ta ora la stac batel jun yajsoldado, yu'un ac'o bat sc'ocbe tal sjol li Juane. Ibat li soldadoe bat sc'ocbe tal sjol li Juan te tiq'uil ta chuquele. 28Laj xlech tal ta jayil taq'uin; laj yac'be li tsebe. Li tsebe bat yac'be li sme'e. 29C'alal laj ya'yic li yajchanc'optac Juane, bat yich'beic tal li sbec'tale, la smuquic. 30Li yajchanc'optac Jesuse isutic tal ta spasel li yabtelique. Vul yalbeic Jesús scotol li c'usitic la spasique xchi'uc ti c'u x'elan ichanubtasvanique. 31Li Jesuse jech laj yalbe li yajchanc'optaque: —Batic, jvoc' jbatic batel ti bu mu'yuc cristianoetique, yu'un jech xu' te ta jcuxtic jutuc —xut. Yu'un ep cristianoetic italic, jech muc xocobic sventa ta xve'ic. 32Jech i'ochic ta canova xchi'uc li yajchanc'optaque; ibatic ti bu mu'yuc cristianoetique. 33Pero ep boch'otic i'ilvanic ti c'alal ibatique. Laj yotquinic ti ja' li Jesuse, jech ta yacan ibatic ta anil. Ep ta lum bu iliquic batel, ja' ba'yuc ic'otic. 34C'alal iloc' ta canova li Jesuse, laj yil ti te xa tsobol epal cristianoetique. Jech ic'uxubaj ta yo'nton, yu'un ja' jechic jech chac c'u cha'al chijetic ti mu'yuc xchabielique. Jech lic xchanubtas; ep c'usitic laj yac' ta chanel. 35C'alal mal xa'ox c'ac'ale, jech i'albat yu'un yajchanc'optac li Jesuse: —Li'i, xocol banamil, bat xa c'ac'al noxtoc. 36Ja' lec taco batel li cristianoetique; ac'o bat sman sve'elic ta tsobtsobnaetic xchi'uc ta lumetic ti li' no'ox nopolique —x'utat. 37Itac'ov li Jesuse: —Ac'beic sve'el vo'oxuc —x'utatic. Itac'ovic: —¿Me yu'un chbat jmancutic tal lajunvinic (200) denario taq'uin pan sventa chcac'becutic sve'ic? —xutic. 38Itac'ov li Jesuse: —¿Jayib pan oy avu'unic? Bat q'uelic —x'utatic. C'alal laj yilique, jech laj yalbeic li Jesuse: —Vo'ob, xchi'uc cha'cot choy —xutic. 39Li Jesuse laj yalbe cristianoetic ti ac'o chotiicuc ta jujutsob ta c'unil jobeltique. 40Jech lic chotiicuc ta jujutsob. Oy laj yic' sbaic ta vo'vinic (100), xchi'uc ta lajuneb yoxvinic (50). 41Li Jesuse la stsac li vo'ob pane xchi'uc li cha'cot choye; la sq'uel muyel vinajel, la stojbe ta vocol Dios. La svoc' li pane, laj yac'be li yajchanc'optaque; ja' xa bat spucbeic ec li cristianoetique. La xut'ilan noxtoc li choye; la spucbeic scotol li cristianoetique. 42Lec ive'ic; inoj xch'utic scotolic. 43Lic stsobbeic scomelal li pan xchi'uc li choye; lajchab moch la staic. 44Ti c'u yepal ive'ique ja' vo'mil (5000) viniquetic. 45C'alal laj yo'ntonique, li Jesuse ta ora laj yalbe yajchanc'optac ti ac'o ochicuc ta canovae, yu'un ac'o jelovicuc batel ta jot nab te ta stuq'uil lum Betsaida. Yu'un li stuque ta to sc'opan comel li cristianoetique. 46C'alal la sc'opan comel li cristianoetique, ibat ta vits, bat sc'opan Dios. 47C'alal ch'ayem xa'ox c'ac'ale, te xa'ox oyic batel ta o'lol nab ta canova li yajchanc'optaque. Yan li Jesuse te to oy ta vits. 48Li Jesuse laj yil batel ti lubenic xa ta xlechuel canova li yajchanc'optaque, yu'un tsots chnet'van li iq'ue. C'alal po'ot xa tsacub osile, ibat yo' bu oy li yajchanc'optaque; ixanov batel ta bavo'. Tsc'an ox ta xjelov no'ox batel yo' bu oy li yajchanc'optaque. 49C'alal laj yilic ti ta xanov tal ta bavo'e, la snopic ti ja' ch'ulelale. Iliquic ta avlajetel ta scoj xi'el, 50yu'un scotolic laj yilic, jech ep ixi'ic. Pero ta ora la sc'opan, jech laj yalbe: —Mu me xaxi'ic, ja' vu'un. Tsatsubtaso avo'ntonic —xut. 51I'och xchi'in ta yut canova, jech ta ora ich'abi li iq'ue. Solel toj ch'ayel ic'ot yo'ntonic li yajchanc'optaque. 52Yu'un mu sna'ic ti ta svu'el no'ox i'epaj li pane, yu'un toj macal yo'ntonic. 53C'alal ijelovic ta jot nabe, te iloq'uic ta canova ta Genesaret. Te la xchuquic ta ti'nab li scanovaique. 54C'alal iloq'uic ta canovae, li cristianoetique ta ora laj yotquinic li Jesuse. 55Bat yalic ta anil ta scotol yosilalic ti te xa oy li Jesuse. Jech ta ora la xq'uechubte'ic tal scotol li jchameletic yu'unique; laj yiq'uic tal yo' bu oy li Jesuse. 56Buyuc no'ox i'och li Jesuse, me ta bic'tal lum, me ta muc'ta lum, me ta tsobtsobnaetic, te tal xpuch'ananic ta xoraltic li jchameletic yu'unique. Li jchameletique la sc'anbeic vocol Jesús ti ac'o me yoc sc'u' no'ox ta spicbeique. Li boch'otic la spicbeic yoc sc'u'e, icolic.


Copyright
Learn More

will be added

X\