San Marcos 11

1C'alal nopol xa'ox x'ech'ic batel ta Jerusalén te ta nopol Betfagé xchi'uc ta Betania ta yoc vits Olivatique, li Jesuse la stac batel chib yajchanc'op. 2Jech laj yalbe: —Batanic ta tsobtsobnaetic le'e. C'alal cha'ochic batele, te chucbil chataic jcot buro, mu'yuc to cajlibinbil. Titunic, iq'uic tal. 3Me oy boch'o chasjac'boxuc c'u yu'un chatitunic li buroe, jech xavalbeic: ‘Yu'un ta xtun yu'un li Cajvaltique, ta stac sutel tal ta ora’, utic —x'utatic batel yu'un li Jesuse. 4Jech ibatic. Te chucbil ta nopol ti'na ta xoral la staic jcot unin buro, jech la stitunic. 5Oy jayibuc cristianoetic te va'ajtic, jech laj yalic: —¿C'u yu'un chatitunic li buroe? —x'utatic. 6Laj yalbeic jech chac c'u cha'al i'albatic batel yu'un li Jesuse. Jech i'ac'bat yiq'uic tal. 7Jech laj yic'beic tal unin buro li Jesuse. Laj yac'beic staspatin slapbolal xaquitaic, jech icaji li Jesuse. 8Ep boch'otic la sq'uiic slapbolal xaquitaic ta be. Oy yantic la sc'asic c'obte' xchi'uc yanal; la sq'uiic ta be. 9Li boch'otic ba'yucbe italique xchi'uc li boch'otic ts'acalpat italique tsots i'avan scotolic: —¡Ac'o ich'atuc ta muc' li Diose! Toj lec li boch'o tacbil tal yu'un Cajvaltic Diose. 10¡Ac'o ich'atuc ta muc' li boch'o tal sventainutic jech chac c'u cha'al iventainvan li jmoltotic David ta vo'onee! ¡Ich'biluc ta muc' li Dios ta toyole! —xiic. 11I'och batel ta Jerusalén li Jesuse. Te ibat ta ch'ulna. La sq'uel comel ta jujujot, jech iloc' batel. Ibat ta Betania xchi'uc li lajchab yajchanc'optaque, yu'un bat xa'ox c'ac'al. 12Ta yoc'omal c'alal iloq'uic batel ta Betania yan velta li Jesuse, ivi'naj. 13Laj yil ta nom jtec' higo. Oy lec yanal. Jech bat sq'uel me oy sat. Pero mu'yuc sat la sta; ja' no'ox yanal, yu'un ma'uc yorail ta satin. 14Li Jesuse jech laj yalbe li te'el higoe: —Mu'yuc xa boch'o chtal slo'bot asat sbatel osil —xut. Te laj ya'yic li yajchanc'optaque. 15C'alal ic'otic ta Jerusalene, li Jesuse i'och ta yamaq'uil ch'ulna. Te lic stacan loq'uel scotol li boch'otic ta xchonolajic, ta xmanulajic ta yamaq'uil ch'ulnae. La sbutq'uinbe xmexaic li jeltaq'uinetique xchi'uc li jchon-stsumutetique. 16Muc xac' boch'o xjelov xchi'uc yicats te ta yamaq'uil ch'ulna sventa chejanic batel. 17Te lic chanubtasvanuc li Jesuse, jech laj yal: —¿Me mu xana'ic ti jech ts'ibabile?: ‘Li jnae ja' snail sc'opanbil Dios yu'un scotol cristianoetic’, xi yaloj li Diose. Pero li vo'oxuque apasojic ta snailch'en j'eleq'uetic —x'utatic yu'un li Jesuse. 18Te laj ya'yic li boch'otic lec xchanojic smantal Diose xchi'uc li banquilal paleetique. Jech lic snopilanic c'u x'elan xu' ta smilic ta scoj ti ta xi'ic yu'une. Yu'un scotol cristianoetic labal laj ya'yic c'u x'elan ichanubtasvan li Jesuse. 19C'alal bat xa'ox c'ac'ale, iloc' batel ta Jerusalén li Jesuse. 20Ta sob yoc'omal c'alal ibatic yan velta ta Jerusalene, laj yilic ti taquijem xa'ox c'alal ta yibel li higoe. 21Ivul ta sjol Pedro c'usi laj yalbe te'el higo li Jesuse, jech laj yalbe: —Jchanubtasvanej, q'uelavil li te'el higo laj avute, itaquij o —xut. 22Itac'ov li Jesuse: —Tsc'an oy xch'unojel avo'ntonic ta stojol li Diose. 23Melel li c'usi chacalboxuque, boch'o jech ta xalbe li vits li'i: ‘Loc'an batel li'i; jipo aba ochel ta nab’, me xute, me muc ta chibuc yo'nton ta xalbee, me ta xch'un ti chc'ot ta pasel c'usi laj yale, ta ono'ox xc'ot ta pasel. 24Ja' yu'un chacalboxuc, scotol li c'usi chac'anic c'alal chac'opanic Diose, ch'unic ti cha'ac'batique, jech ta ono'ox xavich'ic. 25C'alal chac'opanic Diose, pasbeic perdón li boch'o oy smul avu'unique. Jech chaspasboxuc perdón yu'un amulic ec li Atotic te oy ta vinajele —xi. 27Ibatic yan velta ta Jerusalén xchi'uc yajchanc'optac li Jesuse. C'alal te chanov ta ch'ulna li Jesuse, te ital c'opanatuc yu'un banquilal paleetic xchi'uc boch'otic lec xchanojic smantal Dios xchi'uc jayibuc banquilaletic. 28Jech la sjac'beic li Jesuse: —¿Bu avich'oj avabtel ti vi x'elan chapase? ¿Boch'o laj yac'bot avabtel ti jech chapase? —xutic. 29Itac'ov li Jesuse: —Oy c'usi ta jac'boxuc jbeluc ec. Me chatac'bicune, ja'o ta xcalboxuc ec li boch'o laj yac'bun jvu'el ti jech ta jpase. 30Li ich'vo' laj yac' Juane, ¿me ac'bil yabtel yu'un Dios, me ac'bil yabtel yu'un cristiano? Tac'bicun tal ca'tic —xut. 31Jech te lic yalilanbe sbaic: “Me ta xcaltic ti ja' i'ac'bat yabtel yu'un Diose, jech ta xalbutic: ‘¿C'u yu'un muc xach'unic cha'e?’, xijyututic. 32¿Me xu' van ta xcaltic ti i'ac'bat yabtel yu'un cristianoe?”, xut sbaic. Pero ta xi'ic yu'un noxtoc li cristianoetique, yu'un scotolic xch'unojic ti ja' yaj'alc'op Dios li Juane. 33Ja' yu'un jech itac'ovic: —Mu jna'cutic —xutic. Jech i'albatic yu'un li Jesuse: —Jech mu'yuc ta xcalboxuc ec li boch'o laj yac'bun jvu'el ta jpas o li c'usitic ta jpase —xi li Jesuse.


Copyright
Learn More

will be added

X\