San Lucas 9

1Li Jesuse la stsob li lajchab yajtacbolaltaque. Laj yac'be yabtelic xchi'uc svu'elic, yu'un jech xu' yu'un ta sloq'uesic scotol jaychop pucujetic xchi'uc ta scoltaic jchameletic. 2La stac batel ta xcholel li ventainel yu'un Diose xchi'uc ta scoltael jchameletic. 3Jech laj yalbe: —Mu me c'usi xavich' batel ta sventa abeic. Mu me xavich' batel anamte'ic, anuti'ic, ave'elic, xchi'uc ataq'uinic. Mu me xavich' batel cha'lic ac'u'ic. 4Ti bu junucal na chac'otique te oyanic o, ja' to me laloq'uic batele. 5Ti bu junucal lum mu xasc'anoxuque, loc'anic batel. Lilinic comel spucucal avacanic. Ja' sna'ubil yu'unic ti bajbil chcomic oe —xi li Jesuse. 6Jech iloq'uic batel, xquechet ixanovic batel ta tsobtsobnaetic. La xcholic batel li Lequil A'yeje xchi'uc la scoltaic batel jchameletic ti buyuc no'ox ibatique. 7Li ajvalil Herodese laj ya'ay c'usi tspas li Jesuse. Ep ilo'ilaj yo'nton, yu'un oy boch'o laj yalic ti ja' icha'cuxi li Juan j'ac'vanej ta vo'e. 8Oy yantic laj yalic ti ja' li j'alc'op Eliase. Oy yantic laj yalic ti ja' icha'cuxi junuc li yaj'alc'optac Dios ta vo'onee. 9Li Herodese jech laj yal: —Vu'un laj cac' ta c'ocbel sjol li Juane. ¿Boch'o noxtoc ti chca'ibe sc'oplal ep c'usitic tsots tspase? —xi. Jech chac sq'uel ya'ay li Jesuse. 10C'alal isutic batel li yajtacbolaltac Jesuse, c'ot yalbeic scotol li c'usitic la spasique. Li Jesuse laj yic' batel li yajtacbolaltaque; la svoc' sbaic batel ta lum Betsaida. 11C'alal laj ya'yic cristianoetic bu ibat li Jesuse, te nabalic batel. Li Jesuse lec laj ya'ay ti c'alal ic'otique. Te lic yalbe ti yorail xa chventainvan li Diose, xchi'uc la scolta li jchameletic ti tsc'an coltael laj yile. 12C'alal bat xa'ox c'ac'ale, li lajchabique jech laj yalbeic li Jesuse: —Taco me batel li cristianoetique; ac'o baticuc ta tsobtsobnaetic xchi'uc ta naetic ti li' no'ox nopolique. Ac'o bat xch'aman snaic, xchi'uc ac'o bat sa' sve'elic, yu'un xocol banamil li'i —xutic. 13Itac'ov li Jesuse: —Ac'beic sve'el vo'oxuc —xi. Itac'ovic: —Mu'yuc c'usi yan oy cu'uncutic. Ja' no'ox vo'ob pan xchi'uc cha'cot choy. ¿Me yu'un chac'an vu'uncutic chbat jmanbecutic tal li sve'elique? —xiic. 14Ti c'u yepal te tsobolique oy van vo'miluc (5,000) li viniquetique. Li Jesuse jech laj yalbe li yajchanc'optaque: —Albeic cristianoetic ti ac'o chotiicuc ta lajlajuneb yoxvinic (50) ta jujutsobe —xut. 15Jech laj yalbeic ti ac'o chotiicuc ta jujutsobe. 16Li Jesuse la stsac li vo'ob pane xchi'uc li cha'cot choye. La sq'uel muyel vinajel; la stojbe ta vocol Dios. La svoc' li pane xchi'uc li choye. Laj yac'be li yajchanc'optaque, yu'un ja' ac'o spucbeic li cristianoetique. 17Scotolic ive'ic; lec inojic o. La stsobbeic li scomelaltaque; lajchab moch la staic. 18Ta yan c'ac'al c'alal slecoj la sc'opan Dios stuc li Jesuse, jech la sjac'be li yajchanc'optaque: —¿Boch'oun ta xalic li cristianoetique? —xi. 19Itac'ovic: —Oy ta xalic ti vo'ot Juan j'ac'vanejot ta vo'e. Oy yan ta xalic ti vo'ot Eliasote. Oy yan ta xalic ti vo'ot jun yaj'alc'opot Dios ta vo'one ti lacha'cuxie —xutic. 20—Li vo'oxuque ¿boch'oun chavalic ec? —xut. Itac'ov li Pedroe: —Vo'ot Cristoot ti t'ujbilot yu'un Diose —xi. 21Li Jesuse tsots laj yalbe mantal yajchanc'optac ti mu to me boch'o xalbeic ti ja' Cristo li Jesuse. 22Jech laj yalbe noxtoc li yajchanc'optaque: —Vu'un ti Xnich'on cristiano lic'ote, ta persa ta xquich' ep vocol. Mu xisc'anicun li banquilaletique xchi'uc li banquilal paleetique xchi'uc li boch'otic lec xchanojic smantal Diose. Ta xismilicun, pero chicha'cuxi ta yoxibal c'ac'al —xi. 23Li Jesuse jech laj yalbe scotolic: —Li boch'o tsc'an chixchi'inune, mu me xc'uxubin sba. Ac'o xq'uech scruz jujun c'ac'al, jech xu' chixchi'inun. 24Yu'un li boch'o tsots sc'oplal cha'ay xcuxlejale, ja' ta xch'ayes li xcuxlejale. Yan li boch'o mu tsotsuc sc'oplal cha'ay xcuxlejal ta jcoje, ja' ta xcuxi. 25¿C'usi tsta o jun cristiano me chu'unin scotol c'usitic oy li' ta banamil, me ja' chch'ayes sba stuque? 26Yu'un li boch'o ta xq'uexov ta jtojol, xchi'uc chq'uexov ta xch'unel jc'ope, ja' no'ox jechun ec vu'un ti Xnich'on cristiano lic'ote chiq'uexov yu'unic c'alal chital xchi'uc jxojobal, xchi'uc xojobal Jtot, xchi'uc xojobal li j'almantaletique. 27Melel li c'usi chacalboxuque, oy jayibuc avu'unic ti mu'yuc to ta xchamique ja' to me laj yilic chlic ventainvanuc li Diose —xi li Jesuse. 28I'ech' xa'ox vaxquibuc c'ac'al c'alal jech laj yal li Jesuse, ja'o imuy batel ta jol vits, bat sc'opan Dios. Laj yic' batel Pedro, Santiago, xchi'uc Juan. 29C'alal ja'o tsc'opan Dios li Jesuse, ic'ataj sat. Isacub li sc'u'e, i'ayin xojobal. 30Te ivinaj chib viniquetic la xchi'inic ta lo'il li Jesuse; ja' Moisés xchi'uc Elías. 31Oy xojobalic ec. Ja' la slo'iltaic c'u x'elan ta xcham li Jesús te ta Jerusalene. 32Li Pedro xchi'uc xchi'iltaque solel chtal svayelic. Pero la svic' lec satique, jech laj yilbeic xojobal li Jesuse xchi'uc li chib viniquetic te xchi'inojic Jesuse. 33C'alal laj yilic ti ta xa xbat li chib viniquetique, li Pedroe jech laj yalbe li Jesuse: —Jchanubtasvanej, ja' lec ti li' oyutic oe. Ta jpascutic oxbej vacaxna li'i, jun avu'un, jun yu'un Moisés, jun yu'un Elías —xut, yu'un mu xa sna' c'usi chal. 34C'alal ja'o chlo'ilaj li Pedroe, ital jun toc. Macbil ic'otic ta toc scotolic. Toj xi'el ic'otic ti c'alal macbil ic'otic ta toque. 35Laj ya'yic oy boch'o ic'opoj ta yut toc, jech laj yal: “Li'i ja' Jnich'on, T'ujbil cu'un. A'ibeic sc'op”, xi. 36C'alal ich'abi li boch'o ilo'ilaje, stuc xa no'ox te oy li Jesuse. Li yajchanc'optaque la smac yeic; ep c'ac'al mu'yuc boch'o laj yalbeic li c'usi laj yilique. 37Ta yoc'omal c'alal iyalic tal ta jol vitse, ibat nupatuc ta be yu'un epal cristianoetic li Jesuse. 38Oy jun vinic te oy ta epal cristianoetic, tsots i'avan, jech laj yal: —Jchanubtasvanej, avocoluc coltabun jnich'on, yu'un c'ajumal jun li jnich'one. 39Yu'un ta x'uts'intaat yu'un jun pucuj. Ta x'avan, ta xtu'p yic', ta xvocan ye. Mu scomtsanat, solel te tsacbil o. 40Laj xa jc'anbe vocol avajchanc'optac ti ac'o sloq'uesic li pucuje, pero muc xloc' yu'unic —xut. 41Li Jesuse jech laj yal: —Toj abul abaic vo'oxuc ti li' cuxuloxuc ta orae. Mu xac'an xach'unic, solel ch'ayemoxuc. Ep xa c'ac'al li' jchi'inojoxuc; ep xa la jts'icboxuc ti c'u xa'elanique —xut. Jech laj yalbe li vinique: —Ic'o tal li anich'one —xut. 42C'alal inoch'aj tal li quereme, ta ora ijipat ta lum yu'un li pucuje, itu'pbat yic'. Li Jesuse laj yut loq'uel li chopol pucuje, jech icol o li quereme. Li Jesuse laj yac'be ta sc'ob stot li quereme. 43Scotolic toj ch'ayel ic'ot yo'ntonic ta sventa ti toj ech'em svu'el li Diose. C'alal te to ch'ayem yo'nton scotolic ta sventa c'usi la spas li Jesuse, jech laj yalbe li yajchanc'optaque: 44—Li c'usi chacalboxuc li'i ta jc'an ti chatic' lec ta avo'ntonique. Vu'un ti Xnich'on cristiano lic'ote ta to xi'ac'at ta sc'ob li cristianoetique —xut. 45Li yajchanc'optaque muc xa'ibeic smelol li c'usi laj yale, yu'un mu to x'ac'bat ya'yic c'usi smelol. Pero ixi'ic ta sjac'bel smelol noxtoc. 46Li yajchanc'optac Jesuse lic stsaquilan sbaic ta c'op ta sventa boch'o banquilal ta xc'ot yu'unic. 47Li Jesuse la sna' li c'usi tsnopilanique, jech laj yic' tal jun olol, la sva'an ta sts'el. 48Jech laj yalbe li yajchanc'optaque: —Li boch'o chich' ta muc' li jun olol li'i, ti vu'un ta jventa tspase, ja' vu'un chiyich'un o ta muc'. Li boch'o chiyich'un ta muq'ue, ja' chich' o ta muc' li Jtot ti la stacun tale. Ja' yu'un li boch'o biq'uit ta xac' sba avu'unique, ja' banquilal ta xc'ot —xi li Jesuse. 49Li Juane jech laj yalbe li Jesuse: —Jchanubtasvanej, oy boch'o laj quilcutic ta sloq'ues pucujetic ta abi. Pero la jpajescutic, yu'un muc li'uc jchi'inojtic —xut. 50Itac'ov li Jesuse: —Mu me xapajesic, yu'un li boch'o mu'yuc ta scontrainutique, ja' jchi'iltic —xut. 51C'alal jutuc xa sc'an sta yorail ch-ic'at muyel ta vinajel li Jesuse; solel sujbil yo'nton tsc'an chbat ta Jerusalén. 52Jech ba'yuc la stac jelovel boch'o bat xch'amanic na. Jech ibatic. Te ic'otic ta tsobtsobnaetic ta Samaria banamil. 53Pero li samariaetique muc xac' ta ch'amanel snaic, yu'un laj ya'yic ti ta Jerusalén ta xbatique. 54C'alal jech laj yilic li Santiago xchi'uc Juane, jech laj yalbeic li Jesuse: —Cajval, me chac'ane, ta jc'ancutic yalel tal c'oc' ta vinajel jech chac c'u cha'al la spas li Eliase, yu'un jech ac'o chamicuc —xutic. 55Li Jesuse laj yut li chib yajchanc'ope. 56Ts'acal ibatic ta yan tsobtsobnaetic. 57C'alal ja'o chanovic batele, li Jesuse jech i'albat yu'un jun vinic: —Cajval, ta jchi'inot batel ti buyuc no'ox chabate —xi. 58Itac'ov li Jesuse: —Li vetetique oy xch'enic; li mutetique oy stasic. Pero vu'un ti Xnich'on cristiano lic'ote mu'yuc bu xu' ta jmochan jba —xi. 59Li Jesuse oy boch'o yan jech laj yalbe: —Chi'inun batel —xut. Itac'ov li vinique: —Cajval, coltaun to batel, chbat jmuc comel ba'yuc li jtote; ja' to chtal jchi'inot —xi. 60Itac'ov li Jesuse: —Te ac'o smuc sba stuquic li boch'otic chamenique. Yan li vo'ote bat albo ya'yic cristianoetic li ventainel yu'un Diose —xut. 61Oy boch'o yan jech laj yal: —Cajval, ta jc'an ta jchi'inot batel, pero coltaun to batel, yu'un ta to xbat jc'opan comel li boch'otic te oyic ta jnae —xi. 62Li Jesuse jech la stac'be: —Li boch'o stsacoj ta sc'ob yabtejeb vacax sventa slocobil banamile, me ta sq'uel sutel sva'lupate, le'e mu xtun ta sventa xcholel li ventainel yu'un Diose —xut.


Copyright
Learn More

will be added

X\