San Lucas 20

1Ta yan c'ac'al c'alal te chchanubtasvan ta ch'ulna li Jesuse, te la xcholbe ya'yic cristianoetic li Lequil A'yeje. Te italic jayibuc banquilal paleetic xchi'uc li boch'otic lec xchanojic smantal Diose xchi'uc li banquilaletique. 2Jech la sjac'beic li Jesuse: —Albun ca'icutic ¿c'usi abtelal avich'oj ti chapas li c'usitic chapase? ¿Boch'o laj yac'bot avabtel? —xutic. 3Itac'ov li Jesuse: —Oy c'usi ta jac'boxuc jbeluc ec. Albicun ca'ay. 4Li ich'vo' laj yac' Juane ¿boch'o i'ac'bat yabtel? ¿Me ac'bil yu'un Dios, o me ac'bil yu'un cristiano? —xut. 5Jech lic yalilanbe sbaic: “Me ta xcaltic ti ja' i'ac'bat yabtel yu'un Diose, jech ta xalbutic: ‘¿C'u yu'un muc xach'unic cha'e?’, xijyututic. 6Me ta xcaltic ti ac'bil yu'un cristianoe, chijyac'butic ton li jchi'iltactique, yu'un scotol xch'unojic ti ja' yaj'alc'op Dios li Juane”, xut sbaic. 7Jech laj yalbeic li Jesuse: —Mu jna'cutic boch'o i'ac'bat yabtel —xutic. 8Li Jesuse jech laj yalbe: —Ja' jech mu'yuc ta xcalboxuc ec boch'o laj yac'bun cabtel ti jech ta jpase —xut. 9Li Jesuse lic yalbe lo'il li cristianoetique, jech laj yal: “Oy jun vinic la sts'un ep ts'usub ta yosil. La sa'be yajval boch'o ta xchabiic li ts'usubtic yu'une. Jech ibat ta nom li yajvale; ep c'ac'al te ijoc'tsaj. 10C'alal ista yorail i'ic'ub li sat sts'usube, la stac tal jun yaj'abtel, yu'un tal sc'an batel ti c'u yepal sc'oplal chich'e. Pero li jchabits'usubtique la stsaquic, la smajic. Jeche' xmeymun sc'ob ibat yu'unic. 11Li yajval ts'usubtique la stac tal yan yaj'abtel noxtoc. Pero la smajic, la xchopolc'optaic noxtoc. Me jutuc mu'yuc c'usi laj yac'beic batel. 12La stac tal yan yaj'abtel noxtoc. Ja' yoxibal xa velta la stac tal, pero li jchabits'usubtique la smajic noxtoc. Tuch'emic xa la snutsic loq'uel. 13“Li yajval ts'usubtique jech la snop: ‘¿C'uxi ta xcut? Ja' lec ta jtac batel li jnich'on ti lec jc'anoje; ja' van ta xich'ic ta muc'’, xi ta yo'nton. 14Pero c'alal laj yilic jchabits'usubtic ti ja' xnich'on li yajval osile, jech laj yalbe sbaic: ‘Le'e ja' xa ta xich' comel scotol. Ja' lec jmiltic, jech vu'utic ta xquich'tic o comel’, xut sbaic. 15Jech la sloq'uesic ta pat ts'usubtic; te la smilic. “C'alal ta sut tal li yajval ts'usubtique, ¿c'usi ta xc'ot yich'ic pasbel xana'ic li jchabits'usubtique? 16Ta xvul smil li jchabits'usubtique, yan xa boch'o ta xac'be xchabi li ts'usubtic yu'une”, xi li Jesuse. C'alal laj ya'yic jeche, jech laj yalic: —¡Mu me xc'ot ta pasel jech! —xiic. 17Li Jesuse la sq'uelbe sat li cristianoetique, jech laj yalbe: —¿C'usi smelol ti jech ts'ibabil ta sc'op Diose: ‘Li ton ti mu'yuc lec laj yilic li jpasnaetique, ja' ono'ox i'och ta mero chiquin na’, ti xie? 18Li boch'o ta xbalch'uj ta sba yac'ol li ton le'e, ta xlaj o. Yan me ja' chbalch'uj ta sba yac'olic li tone, toj lilijel chc'otic o —xi li Jesuse. 19Li banquilal paleetique xchi'uc li boch'otic lec xchanojic smantal Diose tsc'an ta stsaquic ta ora li Jesuse, yu'un laj ya'yic ti ja' sc'oplal stuquic li lo'il i'albatique. Pero ixi'ic yu'un li cristianoetique. 20La staquic batel jayibuc boch'o chbat sq'uelbeic yo'nton li Jesuse. Jun xa yo'ntonic ta stojol Jesús yilel ti c'alal ibatique, yu'un oy c'usi chbat sjac'beic, yu'un ta sq'uelic me oy c'usi chopol chloc' ta ye, yu'un jech xu' ta stsaquic batel, chbat yaq'uic ta sc'ob li ajvalile. 21Jech c'ot sjac'beic li Jesuse: —Jchanubtasvanej, ta jna'cutic ti tuc' c'usi chavale, ti tuc' chachanubtasvane. Muc t'ujbiluc no'ox chapas; co'ol lec jamal chavalbe ya'yic c'usi tsc'an li Diose. 22Albun ca'icutic c'usi lec ta jpascutic li vu'uncutique. ¿Me lec ti ta xcac'be jpatancutic li Cesare, o me mu lecuc? —xutic. 23Li Jesuse la sna' ti ja' no'ox ta xlo'lavanique, jech laj yalbe: 24—Ac'bicun jq'uel jsepuc li denario taq'uine —xut. Jech la sjac'be: —¿Boch'o sloc'obal li'i? ¿Boch'o sbi li'i? —xut. Itac'ovic: —Ja' César —xiic. 25Li Jesuse jech laj yalbe: —Ac'beic César c'usi ja' yu'un li Cesare. Ac'beic Dios c'usi ja' yu'un li Diose —xut. 26Jech muc xu' yu'unic la slo'laic te ta sat cristianoetic li Jesuse. Ja' no'ox te ich'ay yo'ntonic ta sventa ti c'u x'elan itac'ove. Jech te imac yeic o. 27Te ic'otic noxtoc jayibuc saduceoetic, ja' ti xch'unojic mu'yuc cha'cuxesele. Jech la sjac'beic li Jesuse: 28—Jchanubtasvanej, li Moisese jech la sts'ibabuncutic comel chac li'i: ‘Me oy ta xcham jun vinic, me mu'yuc xnich'on chcome, li its'inale ac'o yic'be yajnil li anima sbanquile, yu'un jech ac'o xq'uextabe sts'unubal li sbanquile’, xi ts'ibabil. 29Oy to'ox vucub queremetic xchi'il no'ox sbaic ta voq'uel. Li banquilale la sa' yajnil. Pero icham, mu'yuc xnich'on icom. 30Li its'inale laj yic'be yajnil li sbanquile. 31Li yoxibal its'inale laj yic'be yajnil noxtoc li anima sbanquile. Ja' jech la spas svucubalic, pero mu'yuc xnich'onic c'alal ichamic. 32Ts'acal to icham ec li antse. 33C'alal ta xcha'cuxiique, ¿boch'o junucal yajnil chc'ot li antse?, yu'un svucubalic laj yic' yajnilinic —xutic. 34Itac'ov li Jesuse: —C'alal li' to oyic ta banamil li cristianoetique, ta to xic' sbaic li vinic xchi'uc antsetique. 35Pero li boch'otic t'ujbilic sventa chcha'cuxiic loq'uel ta smuquinalic sventa chcuxiic sbatel osile, mu'yuc xa nupinel, mu'yuc xa ic'bail. 36Yu'un mu xa xchamic o, co'olic xa jech chac c'u cha'al yaj'almantal Dios. Xnich'nab xa Dios chc'otic o, yu'un icha'cuxiic xa. 37Ta sventa ti ja' melel ta xcha'cuxiic animaetique, lec xvinaj ta sventa c'usi i'albat yu'un Dios li Moisés ta jtec' biq'uit ch'ixe. Jech i'albat: ‘Vu'un Diosun yu'un Abraham, Diosun yu'un Isaac, Diosun yu'un Jacob’, x'utat. 38Yu'un li Diose mu ja'uc Dios yu'un li boch'otic chamenic oe; ja' Dios yu'un li boch'otic cuxajtique. Yu'un ta stojol Diose cuxajtic —xi li Jesuse. 39Ja' xa itac'ovic jayibuc li boch'otic lec xchanojic smantal Diose, jech laj yalic: —Jchanubtasvanej, toj lec li c'usi laj avale —xutic. 40Mu'yuc xa c'usi yan ivu' yu'un la sjac'beic li Jesuse. 41Li Jesuse jech lic sjac': —¿C'u yu'un ta xalic ti ja' smomnich'on David li Cristoe? 42Yu'un li Davide jech la sts'ibabe sc'oplal ta svunal q'ueojetic li Cristoe: ‘Li Cajvale jech i'albat yu'un li Diose: Chotlan ta jbats'ic'ob, 43ja' to me laj cac' atec'ubin li avajcontrataque, x'utat’, xi li Davide. 44Li Davide ‘Cajval’ xi. ¿C'u yu'un ‘Cajval’ xi, me ja' smomnich'one? —xi li Jesuse. 45C'alal te cha'yic scotol cristianoetic c'usi chal li Jesuse, jech laj yalbe li yajchanc'optaque: 46“¿Q'uelo me abaic yu'un li boch'otic lec xchanojic smantal Diose? Yu'un ja' no'ox lec cha'yic ti nat sc'u' tslapic c'alal chloq'uic ta xanubale, xchi'uc ti nupbil sc'obic ta jujun cuxub o'ntonal ta yut lume, xchi'uc ti ja' ta st'ujic sliqueb chotlebal ta nail tsobobbailetique xchi'uc ti c'alal yorail oy lec ve'ele. 47Jech noxtoc ta spojbeic c'usi oy yu'un li me'on antsetique. Lec xa jal ta sc'opanic Dios scuyoj sbaic yilel. Le'e tsots ta x'ac'bat stoj smulic”, xi li Jesuse.


Copyright
Learn More

will be added

X\