San Lucas 16

1Li Jesuse laj yalbe yan lo'il li yajchanc'optaque: “Oy jun vinic, lec jc'ulej. Oy jchabina yu'un. Li jchabinae bat tic'batuc smul ta stojol li yajvale. Li smul itic'bate, yu'un la slajesbe c'usitic oy yu'un li yajvale. 2Li vinique laj yic' li jchabina yu'une, jech laj yalbe: ‘Laj ca'ay ti chopol c'usi chapase. Albun ca'ay c'u x'elan oy scotol li c'usitic aventainoje, yu'un mu xa xu' chachabibun jna’, xut. 3Li jchabinae jech lic snop: ‘¿C'usi ta jpas, yu'un chisloq'uesun ta abtel li cajvale? Mu xu' cu'un chi'abtej ta banamil; chiq'uexov noxtoc me ta jc'an limosnae. 4Ta jna' xa c'usi ta jpas c'alal me liloc' ta cabtele, yu'un jech oy boch'o chixc'uxubinun, chiyotesicun ta snaic’, xi. 5Jech ta jujuntal laj yic'an li j'iluviletic yu'un yajvale. Jech la sjac'be li boch'o ba'yuc itale: ‘¿C'u yepal avil yu'un li cajvale?’, xut. 6Itac'ov: ‘Vo'vinic (100) baril aceite quich'oj’, xi. Jech laj yalbe: ‘Li' oy li svunal avile. Chotlan, jelo ta anil. Lajuneb yoxvinic (50) baril xa no'ox xats'iba’, xut. 7Jech la sjac'be li yane: ‘Vo'ote, ¿c'u yepal li avile?’, xut. Itac'ov: ‘Vo'vinic (100) coxtal trigo quich'oj’, xi. Jech laj yalbe: ‘Li' oy svunal li avile; chanvinic (80) coxtal trigo xa no'ox xats'iba’, xut. 8Li yajvale jech laj yal: ‘Toj lec bij li vinique’, xi. Yu'un li boch'o ja' batem ta yo'ntonic c'u x'elan lec ch-ech'ic li' ta banamile, ja' toj bijic ta snopel c'usi tspasic. Yan li boch'o oyic ta sac osile, mu sta jech sbijilic. 9“Vu'un chacalboxuc: Li c'usitic oy avu'unic ti ja' no'ox ac'biloxuc aventainique, tunesic sventa chasa' boch'o lec chavil aba achi'uquic. Jech c'alal tsta yorail chlaj sc'oplal li ac'ulejalique, oy boch'o chayic'oxuc ochel ta sna ta sbatel osil. 10“Li boch'o lec xtojob ta sventainel li c'usi mu'yuc tsots sc'oplale, ja' no'ox jech lec xtojob ta sventainel noxtoc li c'usi tsots sc'oplale. Yan li boch'o mu xtojob ta sventainel c'usi mu'yuc tsots sc'oplale, ja' no'ox jech mu xtojob ta sventainel li c'usi tsots sc'oplale. 11Me mu xana'ic stunesel li ac'ulejalic li' ta banamile, ¿boch'o ta xch'un ti xu' avu'unic sventainel li mero ac'ulejalique? 12Yu'un me mu xana'ic lec stunesel li c'usi mu ja'uc avu'unique, mu me xanopic ti cha'ac'batic li c'usi ja' avu'un atuquique. 13“Me junuc mozo mu xu' yu'un chtun ta chib yajval. Yu'un xu' chopol chil li june; xu' ja' lec chil li yane. Xu' ja' lec chich' ta muc' li june; xu' ja' mu xich' ta muc' li yane. Ja' jech mu xu' chatunic yu'un Dios me ja' batem avo'ntonic yu'un li taq'uine”, xi li Jesuse. 14C'alal jech laj ya'yic li fariseoetique, la slabanic li Jesuse, yu'un stalelic ti xpich'et no'ox yo'ntonic yu'un taq'uine. 15Li Jesuse jech laj yalbe: “Li vo'oxuque chavaq'uic ta ilel ta stojol cristianoetic ti tuc' avo'nton avalojique, pero li Diose xotquin li avo'ntonique. Yu'un li boch'o chac' sba ta ich'el ta muc' ta stojol cristianoetique ja' mu'yuc stu ta stojol li Diose. 16“Li smantaltac Diose xchi'uc li c'usitic laj yalic j'alc'opetique ja' laj ava'yic o c'alal to ital li Juan j'ac'vanej ta vo'e. Ja'o te lic yich' cholel tal noxtoc li ventainel yu'un Diose. Jech scotolic chaq'uic persa tsc'an ch-ochic ta scotol yo'ntonic. 17“Li vinajel banamile ta anil chlaj. Yan li jbel no'ox smantal Diose mu xlaj sc'oplal o. 18“Li boch'o ta xicta yajnile, me ta xic' yan antse, ja' no'ox ta xmulivaj xchi'uc. Jech ec, li boch'o ta xic' ictabil antse ja' no'ox ta xmulivaj xchi'uc”, xi li Jesuse. 19Li Jesuse jech laj yal noxtoc: “Oy to'ox jun vinic lec jc'ulej. Puru yax'elan poc', xchi'uc puru lequil lino no tslap. Scotol c'ac'al puru lequil ve'lil tsve'. 20Oy jun vinic noxtoc, Lázaro sbi. Ja' jc'anlimosna. Te ta xc'ot chotanatuc ta sti' sna li jc'ulej vinique, nojem ta c'a'al chinetic sbec'tal. 21Li Lazaroe chac ac'batuc sve' ya'ay li c'usitic chbaj yalel ta yolon xmexa li jc'ulej vinique. Pero ja' no'ox te chtal lec'batuc ta ts'i'etic li sc'a'emale. 22Ta yan c'ac'al icham li jc'anlimosnae, i'ic'at batel yu'un yaj'almantaltac Dios yo' bu oy li Abrahame. Icham ec li jc'ulej vinique, imucat. 23“C'alal ja'o te chich' vocol ta c'atinbaque, la stoy sat. Laj yil batel ta nom li Abrahame, xchi'uc li Lázaro te xchi'inoje. 24Li jc'ulej vinique tsots i'avan, jech laj yalbe li Abrahame: ‘Jmoltot Abraham, c'uxubinun. Taco tal li Lazaroe. Ac'o sts'aj tal sni' sc'ob ta vo'; ac'o tal sicubtasbun li coq'ue, yu'un toj ep ta xquich' vocol li' ta yat c'oq'ue’, xi. 25Li Abrahame jech laj yalbe: ‘Totil, na'o ava'ay ti toj lec c'usi laj ata yu'un li ac'ulejal c'alal cuxulot to'oxe. Yan li Lazaroe puru vocol no'ox la sta. Pero li stuque li' xa oy ta lequilal. Li vo'ote te xa chavich' o vocol. 26Mu'yuc boch'o xu' ta xtal te yo' bu oyote, yu'un oy muc'ta xab pasbil ta o'lol. Jech mu'yuc boch'o xu' ta xjelov tal li' ec’, xi. 27“Itac'ov li jc'ulej vinique: ‘Me mu xu'e tati, ja' no'ox ta jc'anbot tsots vocol ti ac'o atac batel ta sna li jtote. 28Yu'un oy to vo'ob quits'inab, ac'o bat yalbe ti mu me xtalic li' ta yavil tsatsal vocole’, xi. 29Li Abrahame jech laj yalbe: ‘Te yich'ojbeic svun li Moisese xchi'uc li yan yaj'alc'optac Diose. Xu' ja' ac'o xch'unic li c'usitic chale’, xut. 30Itac'ov li jc'ulej vinique: ‘Tati, le'e mu xch'unic. Pero ti oyuc boch'o ta xcha'cuxi ti te chbat c'opanaticuque, ja' to ta sutes yo'ntonic’, xi. 31Li Abrahame jech laj yalbe: ‘Me mu sc'an xch'unic c'usitic yaloj li Moisés xchi'uc yan yaj'alc'optac Diose, ac'o me ta xc'ot c'opanaticuc yu'un li boch'o chcha'cuxie, mu ono'ox xch'unic noxtoc’, xut”, xi li Jesuse.


Copyright
Learn More

will be added

X\