San Juan 14

1Li Jesuse jech laj yalbe li yajchanc'optaque: —Mu me xlo'ilaj avo'ntonic. Ch'unic ti chascoltaoxuc li Diose, jech ch'unic ti chajcoltaoxuc eq'ue. 2Te ta sna li Jtote, ep ta c'ol na te oy. Ti manchuc jech quiloje, mu jechuc ta xcalboxuc ti jechuque. Ja' yu'un ba'yuc chibat, chbat jchapan bu chac'otic li vo'oxuque. 3Me chibate, xchi'uc me ichapaj cu'un li avavilique, chisut tal yan velta; vu'un jtuc chtal quic'oxuc muyel, yu'un jech xu' te chac'otic ec ti bu oyune. 4Xana'ic xa ti bu chibate; xana'ic xa bu xbat li sbelale —xut. 5Li Tomase jech laj yal: —Cajval, mu jna'cutic bu chabat. ¿C'uxi xu' ta jna'becutic bu xbat sbelal? —xut. 6Li Jesuse jech laj yal: —Vu'un li beune, vu'un li melelune, vu'un li cuxlejalune. Mu'yuc boch'o xu' chbat ta stojol Jtot ti me mu xtal ta jtojole. 7Me xavotquinicun xa leque, jech xavotquinic xa ec li Jtote. Li' ta orae xavotquinic xa; laj xa avilic —xi. 8Li Felipee jech laj yal: —Cajval, ac'bun cotquincutic li Jtotic Diose jech cux xi co'ntoncutic —xut. 9Li Jesuse jech laj yalbe: —Ep xa c'ac'al li' jchi'inojoxuc. ¿Me mu to xavotquinun, Felipe? Li boch'otic laj xa yilicune laj xa yilic o li Jtote. ¿C'u yu'un chavalbun: ‘Ac'bun cotquincutic li Jtotic Diose’, xachi? 10¿Me mu xach'un ti vu'un jun oyuncutic jchi'uc li Jtote? Li c'usi ta xcalboxuc ava'yique mu jc'opuc jtuc. Ja' sc'op li Jtot ti li' jchi'uque. Ja' stuc tspas li abteletic ta jpase. 11Ch'unic ti vu'un jun oyuncutic jchi'uc li Jtote. Me mu xach'unique, ch'unic ta sventa li c'usitic ta jpas chavilique. 12Jamal chacalboxuc ava'yic, li boch'o ta xch'unicune, xu' chlic spasic ec jech chac c'u cha'al ta jpase. Toj ven tsotsic c'usitic chlic spasic, yu'un li vu'une ta xa xibat yo' bu oy li Jtote. 13Scotol c'usiuc chac'anbeic ta jbi li Totile, vu'un ta xcac'boxuc, yu'un jech ich'bil ta muc' ac'o c'otuc ta jventa li Totile. 14Me oy c'usi chac'anic ta jbie, vu'un ta xcac'boxuc. 15“Me ac'anojicune, chach'unbicun scotol li jmantaltaque. 16Vu'un ta jc'anbe vocol Jtot ti ac'o yac'boxuc tal li Jpat-o'ntonale, yu'un jech j'ech'el te chaxchi'inoxuc o. 17Ja' li Ch'ul Espíritu ti ja' Melele. Li cristianoetique mu xu' ta xich'ic, yu'un mu xilic, xchi'uc mu xotquinic. Yan li vo'oxuque chavotquinic, yu'un te chnaqui ta atojolic; j'ech'el te ch-och o ta avo'ntonic. 18“Muc me'on ololuc chacomic cu'un; ta xtal jchi'inoxuc. 19Mu xa jaluc li' oyun. Li cristianoetic li' ta banamile mu'yuc xa bu chiyilicun o. Pero li vo'oxuque ta to xavilicun, yu'un li vu'une cuxulun o; ja' no'ox jech chacuxiic ec li vo'oxuque. 20C'alal me la sta sc'ac'alil chtal li Ch'ul Espiritue, jech chach'unic o ti jun oyun jchi'uc li Jtote, xchi'uc ti jun oyutic eq'ue, xchi'uc ti te oyun o ta atojolique. 21Li boch'o te oy ta yo'nton li jmantaltaque, me ta xch'une, le'e ja' li boch'o sc'anojicune. Li boch'o sc'anojicune ta xc'anatic yu'un ec li Jtote. Jech jc'anojic ec; ta xcac' jba ta ilel ta stojolic —xi li Jesuse. 22Jech laj yal li Judase, pero mu ja'uc li Judas Iscariotee: —Cajval, ¿c'u yu'un ti vu'uncutic no'ox chavac' aba ta ilel ta jtojolcutique? ¿C'u yu'un mu xavac' aba ta ilel ta stojol ec li cristianoetique? —xut. 23Itac'ov li Jesuse: —Li boch'o chisc'anune ta xch'unbun li jc'ope. Jech ta xc'anat yu'un li Jtote. Ta xtal jchi'incutic; te chinaquicutic o ta yo'nton. 24Yan li boch'o mu xisc'anune mu xch'un li jc'ope. Li c'op laj calboxuc ava'yique, muc vu'cun jc'op; ja' sc'op li Boch'o la stacun tale. 25“Jech ta xcalboxuc yu'un yo'to li' jchi'inojoxuc. 26Yan li Jpojvanej ta stacboxuc tal ta jventa li Jtote, ja' li Ch'ul Espiritue. Ja' ta xac'boxuc ana'ic scotol; ja' ta xchanubtasoxuc. Ja' ta svulesboxuc ta ajolic scotol li c'usi laj calboxuque. 27“Ta xcac'boxuc comel jun avo'ntonic. Li jun o'ntonal oy cu'une ja' ta xcac'boxuc comel. Li jun o'ntonal chcaq'ue mu jechuc jech chac c'u cha'al chac' li cristianoetique. Ja' yu'un mu me xlo'ilaj avo'ntonic; mu me xaxi'ic. 28Laj xa ava'yic ti jech laj calboxuque: ‘Ta xibat, pero ta to xtal jchi'inoxuc. Me ac'anojicune, xcuxet no'ox avo'ntonic ti chibate. Yu'un ja' te chisut batel ta stojol li Jtote. Yu'un ja' ech'em smuc'ul jech chac c'u cha'al li vu'une’, xacutoxuc. 29Jech ta xcalboxuc, yu'un yo'to mu'yuc chc'ot ta pasel chibat, yu'un jech xu' chach'unic ti c'alal chc'ot ta pasele. 30“Mu xa xu' jal ta jc'opanoxuc, yu'un ta xa xtal li banquilal jpasmantal li' ta banamile, pero mu'yuc c'usi xu' yu'un chispasbun. 31Ja' no'ox sventa ac'o yilic scotol cristianoetic ti lec jc'anoj li Jtote, ti ja' ta jch'unbe smantale. “Licanic, loc'cutic xa batel —xi li Jesuse.


Copyright
Learn More

will be added

X\