San Juan 13

1C'alal yu'un xa ta xlic li q'uin Coltaele, li Jesuse sna'oj ti ja' xa yorail ta scomtsan li banamile ti ta sut batel ta stojol li Stote. Ti c'u x'elan sc'anoj li yu'untac ta sliquebe, ja' jech sc'anoj o c'alal ta slajeb. 2C'alal te tsobol chve'ic scotolique, li Judas Iscariotee ja' li xnich'on Simone, albil xa ono'ox ta yo'nton yu'un banquilal pucuj ti ac'o yac' ta c'abal li Jesuse. 3Li Jesuse sna'oj ti i'ac'bat xa ta sc'ob scotol yu'un li Dios Totile, xchi'uc sna'oj ti te liquem tal ta stojol li Diose, xchi'uc ti te ta sut batel noxtoque. 4Jech iva'i ti c'alal chve'e. La sloc' li snatilc'u'e; ja' stsac jlic poc', ja' la smac o xch'ut. 5La sq'ueb vo' ta pocobc'obal, lic spocbe yacan li yajchanc'optaque, la scusbe o ta poc' ti smacoj o xch'ute. 6C'alal ic'ot yo' bu chotol li Simón Pedroe, jech laj yalbe li Jesuse: —Cajval, ¿me smelol ti vo'ot chapocbun cacane? —xut. 7Itac'ov li Jesuse: —Li c'usi ta jpase mu xu' chava'ibe smelol ta ora. Ts'acal to xu' chava'ibe smelol —xut. 8Li Pedroe jech laj yal: —Li vu'une mu xcac' apocbun o li cacane —xut. Itac'ov li Jesuse: —Me mu'yuc ta jpocote, mu xu' ta jchi'in jbatic —xut. 9Itac'ov li Simón Pedroe: —Cajval, pocun cha'e, pero mu me ja'uc no'ox xapocbun li cacane. Pocbun c'alal ta jc'ob, xchi'uc tsebiltasun noxtoc —xut. 10Li Jesuse jech laj yalbe: —Li boch'o atinem xa ono'oxe mu xa persauc ta xich' poquel scotlijil. Xu' xa no'ox ja' chich' pocbel li yacane, yu'un atinem xa ono'ox. Li vo'oxuque sacoxuc xa, ac'o me muc acotolicuc —xut. 11Yu'un sna'oj xa ono'ox li boch'o ta x'ac'van ta c'abale, ja' yu'un laj yal ti mu scotolicuc pocbilique. 12C'alal la spocbe yacan scotol li yajchanc'optaque, la slap yan velta li snatilc'u'e. Ichoti ta ti'mexa, jech laj yal: —¿Me xana'ic c'u yu'un ti jech la jpasboxuque? 13Li vo'oxuque, ‘Jchanubtasvanej, Cajval’, xavuticun. Lec ti jech chavalbicune, yu'un vu'un ta melel. 14Pero me la jpocboxuc avacanic, vu'un li Avajvalicun, vu'un li Jchanubtasvanejun avu'unique, ja' tsc'an ec ti jech chapocbe aba avacanic li vo'oxuque. 15Ti c'u x'elan laj cac'boxuc avilique, ja' jech xapasic ec. 16Jamal chacalboxuc ava'yic, li boch'o mozo no'oxe ma'uc muc' c'otem ta stojol li yajvale. Jech noxtoc li boch'o tacbil no'ox ta spasel c'usi tspase, ma'uc muc' c'otem ta stojol li boch'o itacvane. 17Me laj ava'yic lec scotol li c'usitic tsc'an chapasique, me jech chapasique, xcuxet no'ox avo'ntonic. 18“Muc acotolicuc jech chacalboxuc. Li vu'une xcotquin li boch'otic t'ujbilic cu'une. Pero tsc'an ac'o c'otuc ta pasel ti jech ts'ibabil comel ta sc'op Diose: ‘Li boch'o co'ol chive' jchi'uque ja' xa cajcontra ic'ot’, xi ono'ox ts'ibabil. 19Ba'yuc chacalboxuc ava'yic ti c'alal muc to chc'ot ta pasele. Yu'un c'alal chc'ot ta pasele, jech chach'unic o ti ta melel vu'une. 20Jamal chacalboxuc ava'yic: Boch'otic ta xich' ta muc' li boch'o tacbilic cu'une, ja' vu'un chiyich'un o ta muc'. Li boch'otic chiyich'icun ta muq'ue, ja' ta xich'ic o ta muc' li Boch'o la stacun tale —xi li Jesuse. 21C'alal laj yal jech li Jesuse, toj yan sba yo'nton laj ya'ay. Lic yal ta jamal li boch'o ta x'ac'van ta c'abale. Jech laj yal: —Jamal chacalboxuc ava'yic, oy jun avu'unic li'i ti ja' chiyac'un ta c'abale —xi. 22Ja' yu'un li yajchanc'optaque te sq'uelq'uelbe sba satic liquel. Mu sna'ic boch'o sc'oplal yu'unic ti jech i'albate. 23Oy jun yajchanc'op Jesús ti lec ono'ox sc'anoje, te ts'e'el ta sts'el ta ti'mexa. 24Ja' yu'un li Simón Pedroe la spasbe senyail ta sc'ob ti ac'o sjac'be Jesús li boch'o sc'oplale. 25Jech laj to sts'e'an sba jutuc, la sjac'be li Jesuse: —Cajval, ¿boch'o junucal cu'uncutic? —xut. 26Itac'ov li Jesuse: —Ja' li boch'o ta xcac'be ts'ajbil pan sve'e —xut. Jech lic sts'aj li pane; laj yac'be li Judas Iscariotee, ja' li xnich'on Simone. 27C'alal la stsac pan li Judase, iventainbat o yo'nton yu'un li banquilal pucuje. Li Jesuse jech laj yalbe: —Li c'usi anopoj chapase bat paso ta ora —xut. 28Ti jayib te oyic ta mexae, me junuc mu'yuc boch'o la sna' yu'unic c'u yu'un ti jech laj yalbee. 29Yu'un ja' xchabioj yavil taq'uin li Judase, jech oy boch'o la snop me yu'un albil ti ac'o bat sman tal c'usi ta xtun yu'unic ta sventa q'uine, o me yu'un oy c'usi ac'o bat yac'be li me'onetique. 30C'alal la stsac pan li Judase, ta ora iloc' batel. Ic' xa'ox osil. 31C'alal loq'uem xa'ox batel li Judase, jech lic yal li Jesuse: —Li' ta orae chi'ich'at xa ta muc', vu'un ti Xnich'on cristiano lic'ote. Jech ch-ich'at ta muc' ta jventa ec li Diose. 32Me ich'bil xa ta muc' ta jventa li Diose, ja' jech ta xiyac'un ta ich'el ta muc' ec; ta ora no'ox chlic yac'un ta ich'el ta muc'. 33Jnich'nabtac, mu xa epuc c'ac'al li' ta jchi'inoxuc. Ta xasa'icun, pero ja' no'ox jech chacalboxuc ec jech chac c'u cha'al laj calbe li j'abteletic ta ch'ulnae: Ti bu chibate mu to xu' chabatic te li vo'oxuque. 34Ta xcalboxuc comel jun ach' mantal, c'anano me abaic. Jech chac c'u cha'al la jc'anoxuc li vu'une, ja'uc me jech chac'anan abaic li vo'oxuque. 35Me jech chapasique, jech ta sna'ic o scotol cristianoetic ti vo'oxuc cajchanc'opoxuque —xut yajchanc'optac li Jesuse. 36Li Simón Pedroe jech la sjac'be li Jesuse: —Cajval, ¿bu chabat? —xut. Itac'ov li Jesuse: —Ti bu chibate mu to xu' chachi'inun batel ta ora. Ts'acal to xu' chabat —xut. 37Itac'ov li Pedroe: —Cajval, ¿c'u yu'un ti mu xu' ta jchi'inot batel ta orae? Xu' ta xcac' jba ta milel ta aventa —xut. 38Itac'ov li Jesuse: —¿Me ta melel xu' chavac' aba ta milel ta jventa? Jamal chacalbot ava'ay, tana c'alal mu'yuc to'ox ta x'oc' li cotse, oxib xa'ox velta laj amucun ta avo'nton —xut.


Copyright
Learn More

will be added

X\