Santiago 4

1Li sliqueb c'op, li sliqueb utbail avu'unique ¿me mu ja'uc ta scoj ti mu xapajes abaic ta sc'upinel li c'usi chac'anique? ¿Me mu ja'uc chastsaloxuc li xpich'etel avo'ntonique? 2Bats'i juteb avo'ntonic yu'un, pero mu xataic. Jech chlic milvanan achi'uquic, chlic acontrain abaic, chlic ati'-o'nta abaic, chlic asa'ic c'op, pero mu xataic o li c'usi chac'anique. Mu xataic ta scoj ti mu xac'anbeic li Diose. 3Ac'o me chac'anbeic li Diose, pero mu xataic, yu'un chopol c'usi oy ta avo'ntonic. Ja' no'ox chac'an chalajesic o ta spasel li c'usi tsc'an avo'ntonique. 4¡Jmulaviloxuc ta stojol Dios! ¿Me mu xana'ic ti yajcontra Dios chijc'ot me ja' ta jc'antic c'usi sventa banamile? Li boch'o ja' lec chil sba xchi'uc li c'usitic sventa banamile, ja' yajcontra Dios chc'ot. 5Mu me xanopic ti mu'yuc stu ti jech ts'ibabil ta sc'op Diose: “Li Diose laj yac' ta co'ntontic ti tsc'an stuc no'ox ac'o quich'tic ta muq'ue”, xi ts'ibabil. 6Pero li Diose slequil no'ox yo'nton chixc'uxubinutic, ja' yu'un jech ts'ibabil: “Li Diose tscontrain li jtoybaetique; yan li boch'o biq'uit chac' sbaique ja' ta xc'uxubin”, xi. 7Ja' yu'un ac'o abaic ta sc'ob li Diose. Ja' contrainic li pucuje, jech chjatov loq'uel ta atojolic. 8Nopajanic ta stojol li Diose, jech chnopaj ta atojolic ec. Comtsanic c'usitic chopol chapasic vo'oxuc jpasmuliletic. Lecubtaso avo'ntonic vo'oxuc ti cha'jot bu avac'oj avo'ntonique. 9Ato avo'ntonic, oc'tao abaic. Li tse'ej chapasique ac'o c'atajuc ta avoq'uelic. Li xcuxetel avo'ntonique ac'o c'atajuc ta yatel avo'ntonic. 10Ja' lec biq'uit xavac' abaic ta stojol li Cajvaltique, jech lec muc' chac'otic yu'un. 11Quermanotac, mu me xachopolc'opta abaic. Li boch'o ta xchopolc'opta xchi'ile, me mu'yuc stu chile, ja' xa ta xchopolc'opta o c'usi chal li mantaletique. Ja' xa mu'yuc stu chc'ot yu'un li mantaletique. Me jech vo'ot mu'yuc stu avu'un li mantale, mu xa vo'ocot chach'un li mantale; vo'ot xa jchapanvanejot chac'ot yu'un. 12Pero jun no'ox Boch'o laj yac' li mantale, xchi'uc ja' Jchapanvanej noxtoc. Ja' xu' yu'un chiscoltautic, xchi'uc ja' xu' yu'un chijyulesutic. Li vo'ote ¿c'usi avabtel ti chaval c'u x'elan li achi'ile? 13Li' ta orae a'yo me ava'yic vo'oxuc ti jech chavalique: “Tana, o me oc'ome, batic ta junuc lum. Te jalijcutic junuc jabil, te manulajcutic; te bolomajcutic, jech ta jtatic ep taq'uin”, xachiic. 14Pero mu xana'ic me cuxuloxuc ta yoc'omal. Yu'un ja' jechoxuc jech chac c'u cha'al lumal toc ti ta anil no'ox ta xtale, xchi'uc ti ta anil no'ox ta sacch'ay batele. 15Li c'usi tsc'an chavalique ja' jech chac li'i: “Me jech to tsc'an Cajvaltic cuxulutique, xu' ta jpastic jech”, chianic no'ox. 16Pero li vo'oxuque ta atoyobbailic no'ox li c'usi chavalique. Scotol li toybaile ja' chopol. 17Li boch'o sna' c'usi lec ta pasel, me mu spase, ja' mulil.


Copyright
Learn More

will be added

X\