Santiago 2

1Quermanotac, vo'oxuc ti ach'unojic li Cajvaltic Jesucristo ti toj ech'em slequilale, mu me xat'ujic li boch'o lec chavilique. 2- 3Jech chac c'u cha'al me oy ch-och chib viniquetic c'alal ja'o tsoboloxuque: Li june ven lec sc'u' spoc' slapoj, xchi'uc oy lec yixtolal sc'ob pasbil ta c'anal taq'uin; li yane bats'i me'on, solel mu'yuc lec sc'u' spoc'. Me jech chavalbeic li boch'o lequic sc'u' spoq'ue: “La' chotlan li' ta lequil chotlebale”, me xavutique; yan li me'one jech chavalbeic: “Vo'ote te no'ox va'lan, me mo'oje chotlan ta lumtic”, xavutic, 4¿me mu atuquicuc no'ox chasoques abaic ti jech chapasique? ¿Me mu yu'unuc chopol c'usi chanopic ti jech chat'ujic boch'o chavich'ic ta muq'ue? 5Quermanotac, vo'oxuc ti lec jc'anojoxuque, a'yo lec ava'yic. Li Diose ja' la st'uj li boch'otic me'on li' ta banamile, yu'un jech jc'ulej chc'otic ta sventa xch'unojel yo'ntonic, xchi'uc jech chich'ic c'usi yaloj Dios chac'be li boch'otic sc'anojic Diose. 6Yan li vo'oxuque ja' chabajic li me'onetique. ¿Me mu ja'uc jc'ulejetic ti chayuts'intaoxuc, xchi'uc ti chayic'oxuc batel ta stojol jchapanvanejetique? 7¿Me mu ja'uc noxtoc ti ta xchopolc'optabeic xch'ul bi li Boch'o avich'ojic ta muq'ue? 8Me ta melel chach'unbeic li smantaltac Dios ti ts'ibabil jech chac li'i: “C'ano me achi'il jech chac c'u cha'al c'ux ta avo'nton abec'tal atuc”, xie, ta melel lec c'usi chapasic. 9Yan me chat'ujic no'ox boch'otic lec chavilique, chata amulic, jbajmantaloxuc chac'otic, yu'un mu xach'unbeic li smantaltac Diose. 10Yu'un li boch'o xch'unojbe scotol smantaltac Diose, pero me oy bu ta sbaj junuque, sbajoj chc'ot scotol. 11Yu'un li Boch'o laj yal: “Mu me xamulivaj” xie, ja' laj yal noxtoc ti: “Mu me xamilvan” xie. Ja' yu'un li boch'o mu'yuc ta xmulivaje, pero me ja' imilvane, jbajmantal xa ic'ot o. 12Ja' yu'un tsc'an lec c'usi chavalic; tsc'an lec c'usi chapasic ta stojol li Diose, yu'un ja' chixchapanutic ta sventa li mantal ti laj yac' colem lijc'ote. 13Yu'un li boch'o mu'yuc c'ux ta yo'nton xchi'ile, jech mu'yuc c'ux ta o'ntonal ec ti c'alal ta xchapanate. Yan li boch'o c'ux ta yo'nton xchi'ile, ja' jech c'ux ta o'ntonal ec ti c'alal yorail ta xchapanate. 14Quermanotac, ¿c'usi chtun o li boch'o chal lec xch'unoj ti me mu'yuc chvinaj ta yabtele? ¿Me xu' chcol yu'un ti c'u x'elan xch'unoj cha'ye? 15Jech chac c'u cha'al me oy jch'unolajel, me vinic me ants, ti mu'yuc sc'u' spoc' xchi'uc ti mu'yuc sve'el jujun c'ac'ale, 16me jech chavalbeic: “Junuc avo'nton batan; mu me xalaj ta sic, xchi'uc te bu chata batel ave'el”, me xavutique, pero me mu'yuc chavac'beic jutuc li c'usi ta xtun yu'une, ¿c'usi bal o ti jech chavalbeique? 17Yu'un me ja' no'ox chcaltic oy xch'unojel co'ntontic, me mu'yuc yabtelale, mu'yuc stu; chamen chc'ot o. 18Pero me oy boch'o jech chale: “Vo'ote tsots sc'oplal chava'ay ti lec c'usitic chapase. Yan li vu'une xu' no'ox chca'ay ti oy lec xch'unojel co'ntone”, me xie, jech ta jac'be: “¿C'uxi chquil me ta melel oy xch'unojel avo'nton me mu'yuc chapasbe yabtelale? Vu'une chavil ti oy xch'unojel co'ntone, yu'un ta jpasbe yabtelal”, chcut. 19Li vo'ote xu' no'ox chava'ay ti ach'unoj jun no'ox Dios oye; lec ti jech ach'unoje. Pero ja' jech xch'unojic ec li pucujetique, ja' yu'un oy xi'el cha'yic. 20Bol cristiano, tsc'an chana' lec: Li boch'o chal oy xch'unojel yo'nton ti me mu'yuc tspasbe yabtelale, mu'yuc c'usi stu o. 21Li jmoltotic Abraham ta vo'onee, lec i'ilat yu'un Dios ta sventa li c'usi la spase; ja' ti ta ox xac' ta milbil matanal li xnich'one, ja' li Isaaque. 22Q'uelo lec avil. Li xch'unojel yo'ntone ivinaj ta sventa yabtel. Ta sventa li yabtelal xch'unojel yo'ntone, lec ts'acal ic'ot o. 23Ja' ic'ot o ti jech ts'ibabil ta sc'op Diose: “Li Abrahame lec i'ilat yu'un Dios ta sventa xch'unojel yo'nton”, xi. Ja' yu'un li Abrahame lec laj yil sbaic xchi'uc Dios, xi sc'oplal. 24Laj xa ava'yic ti lec chijyilutic Dios ta sventa c'usi ta jpastique; ma'uc no'ox stuc li xch'unojel co'ntontic tsc'ane. 25Jech noxtoc li jmulavil ants Rahabe, lec i'ilat yu'un Dios ta sventa ti laj yic' ochel ta sna li chib viniquetique, xchi'uc ta yan be xa laj yac' suticuc batel. 26Jech chac c'u cha'al li jbec'taltique, me mu'yuc jch'uleltique, chamen chcom. Ja' no'ox jech ec li xch'unojel co'ntontic me mu'yuc yabtelale, chamen chcom noxtoc.


Copyright
Learn More

will be added

X\