Santiago 1

1Vu'un Santiagoun,, vu'un yajtunelun Dios xchi'uc li Cajvaltic Jesucristoe. Chabanuc chacalboxuc tal vo'oxuc li lajcha'chop sts'unubaloxuc Israel ti butic puquemoxuc batel ta yantic banamile. 2Quermanotac, cuxetuc no'ox avo'ntonic c'alal me chtal ep ta chop preva ta atojolique, 3yu'un xana'ic me ta xich' q'uelel xch'unojel avo'ntonic ta sventa li prevae, ta x'ayin lec smuc'ul avo'ntonic ta sts'iquel li vocoletique. 4Me oy smuc'ul avo'ntonique, tsc'an lec chbat yabtelal noxtoc, jech lec ts'acal chbat avu'unic; mu'yuc xa c'usi yan sc'an avu'unic. 5Me oy boch'o mu'yuc sbijil avu'unique, c'anbeic li Diose; ja' chayac'boxuc. Yu'un li stuque yutsil yo'nton ta xac'; mu sna' x'ech' yo'nton ta c'anbel. 6Pero tsc'an oy xch'unojel avo'ntonic ti c'alal chac'anique; tsc'an mu chibuc avo'ntonic. Yu'un li boch'o chib yo'nton tsc'ane, ja' jech chac c'u cha'al nab ti chich' yuq'uilanel ta jujujot yu'un iq'ue. 7Li boch'o jech yo'nton le'e, mu me snop ti oy c'usi ch-ac'bat yu'un Cajvaltique. 8Yu'un tsjelilan li c'usi tsnope; mu junuc no'ox li be tstam batele, yu'un xtal xbat no'ox li yo'ntone. 9Li jch'unolajel ti toj abul sbae, cuxetuc no'ox yo'nton ta sventa ti oy xa c'usi toj lec staoje. 10Li jc'uleje biq'uit ac'o yac' sba, yu'un li sc'ulejale ja' jech chac c'u cha'al xnich ts'i'lal ti mu xjalije. 11C'alal ta xloc' c'ac'ale, c'alal tsots ta xc'uxube, ta xtaquij li ts'i'lale. Li xniche ta xlilij yalel jech ta xch'ay o li st'ujumale. Ja' no'ox jech ec li jc'uleje, c'alal yochel sa'el sc'ulejale, te ta xch'ay o batel xchi'uc. 12Xcuxet no'ox yo'nton li boch'o ta xcuch yu'un li preva chtal ta stojole, yu'un me lec iloc' yu'une, ta xich' scorona sventa chcuxi; yu'un yaloj ono'ox Dios ta xac'be li boch'o sc'anojic Diose. 13Li boch'o tsujat ta spasel c'usi chopole, mu me snop ti ja' tsujat yu'un li Diose. Yu'un li Diose mu sujat ta spasel c'usi chopol li stuque, jech mu xisujutic ta spasel c'usi chopol noxtoc. 14Li jujunutique scoj yu'un jech co'nton ta jpastic li c'usi chopole, jech chijyic'utic, chislo'lautic. 15Yu'un c'alal chcac'tic ayinuc li xpich'etel co'ntontique, ta xlic voc'uc li mulile. C'alal me laj xa xchanbe yipale, chac' lajel. 16Quermanotac, vo'oxuc ti lec jc'anojoxuque, mu me xalo'la abaic. 17Scotol li c'usi leque xchi'uc li c'usitic lec tuc' chij'ac'bate ja' te ta xlic tal ta vinajel. Ja' chistacbutic tal li Jtotic Dios ti la spas li c'usitic chac' xojobale. Li Diose ja' jech oy o; mu sna' sjelilan c'usi chijyac'butic. 18Ta sventa ti jech la sc'an stuc li Diose, jech laj yac' cha'voc'cutic ta sventa li sc'op ti ja' melele, jech vu'utic sliqueb lijc'ot yu'un scotol li c'usitic spasoje. 19Quermanotac, vo'oxuc ti lec jc'anojoxuque, a'yo lec ava'yic li c'usi cha'albatique. Mu xac'opojic ta anil; mu xa'ilinic ta anil. 20Yu'un li boch'o ta x'iline, mu xa ja'uc tspas li c'usi lec chil Diose. 21Ja' yu'un li vo'oxuque, comtsanic scotol li c'usitic mu xtune xchi'uc li c'usitic chopol ti epajem xae. Biq'uit xavac' abaic c'alal chava'yic li sc'op Dios ti ts'unbil xa ta avo'ntonique, yu'un ja' oy stsatsal xu' chacolic yu'un. 22Pasic me li c'usi chava'yic ta sc'op Diose. Mu me ja'uc no'ox chava'yilanic, yu'un jech mu ja'uc no'ox chalo'la abaic. 23Li boch'o ja' no'ox cha'yilan sc'op Diose, me mu spase, ja' jech chac c'u cha'al jun vinic ti ta sq'uel sat ta nene. 24Ac'o me laj yil c'u x'elan li sate, pero ich'ay ta yo'nton; lec no'ox cha'ay sba ti c'alal chanov batele. 25Yan li boch'o mu xch'ay ta yo'nton c'usi cha'ye, ti ja' te oy o ta yo'nton li lequil mantal ti ja' chac' colcutique, xchi'uc ti chch'un o li c'usi chale, xcuxet no'ox yo'nton yu'un li c'usi ta spase. 26Me oy boch'o chal ti lec xch'unoje, pero me mu sna' spajesel yee, ja' no'ox ta slo'la sba. Mu'yuc stu chc'ot li c'usi xch'unoje. 27Me ta melel lec xch'unoje, mu'yuc c'usi chopol tspas ta stojol li Jtotic Diose. Ja' no'ox jech tspas chac li'i: Ta sq'uel me'on ololetic xchi'uc me'on antsetic ti c'alal oy svocolique, xchi'uc mu soques sba ta sventa li c'usitic chopol li' ta banamile.


Copyright
Learn More

will be added

X\