Hebreos 9

1Li c'usi ba'yuc chapanbile, oy lec mantal yu'un c'u x'elan chich'ic ta muc' li Diose, xchi'uc oy lec jbej xch'ulnail li' ta banamil. 2Yu'un li ch'ulna pasbil ta nucule ja' jech pasbil chac li'i: Li sba c'olal scuartoal yo' bu oy li candelero xchi'uc mexae xchi'uc li pan ac'bil ta stojol Diose, ja' ch'ul cuarto sbi. 3Li xchibal cuarto ta spat poq'ue ja' bats'i lequil ch'ul cuarto sbi. 4Ja' te oy li scajleb xchic'ubil pom pixbil ta c'anal taq'uine, xchi'uc li xcaxail smantal Dios pixbil ta c'anal taq'uin ta yut xchi'uc ta spate. Ja' te tiq'uil li jun bin pasbil ta c'anal taq'uin sventa yavil manavaje. Xchi'uc ja' te tiq'uil noxtoc li snamte' Aarón ti inichine, xchi'uc li cha'pech ton yo' bu ts'ibabil smantaltac Diose. 5Ta sba smac caxae ja' te oy sloc'obal li querubinetic ti oy xojobalique, ti smacojic ta xiq'uic yo' bu chich' ch'ayel mulile. Mu xu' chacalboxuc sc'oplal scotol le'e. 6C'alal ichapaj yu'unic scotole, li paleetique te lic ochilanicuc scotol c'ac'al ta sba c'olal cuarto sventa tspasic li yabtelic sventa Diose. 7Yan ta xchibal cuartoe ja' no'ox jun velta ta jabil i'och stuc li banquilal palee. C'alal ch-oche, persa chich' ochel ch'ich' ta stojol Dios sventa tspasbat perdón yu'un smul stuc xchi'uc smul xchi'iltac. 8Ti jech la spas li banquilal palee, Ch'ul Espíritu chac' jna'tic ti yu'un mu to'ox xu' chij'och ta ch'ul cuartoe, yu'un mu'yuc to'ox jamal be ti c'alal ja' to'ox chtun li ch'ulna pasbil ta nucule. 9Le'e ja' senyail li c'usi c'otem ta pasel li' ta orae. Yu'un li matanaletic xchi'uc li milbil matanaletique mu'yuc c'usi ivu' yu'un, yu'un muc j'ech'eluc xlecubic o; muc spas o ta jun yo'ntonic li boch'otic jech la spasique. 10Yu'un ja' no'ox mantaletic sventa sba sbec'talic, sventa ve'liletic, sventa c'usitic chuch'ic, xchi'uc c'usitic yan tspasic sventa tslecubtas sbaic. Ja' jech la spasic o c'alal to la spas ta ach' li Diose. 11Pero li' ta orae te xa oy li Cristoe, ja' li Banquilal Pale ta sventa li c'usitic lec la jtatique. Ja' te ch-abtej ta Ch'ulna ti ja' toj lec, ti ja' lec ts'acale, ti muc xa pasbiluc ta sc'ob cristianoe, ti muc xa ja'uc li' ta banamile. 12Muc xa ta sventauc xch'ich'al tot tentsun, xch'ich'al ch'ium tot vacax i'och ta bats'i lequil ch'ul cuarto li Banquilal Pale cu'untique; ta sventa xa xch'ich'al stuc i'och. Jun no'ox velta i'och ta bats'i lequil ch'ul cuarto, yu'un j'ech'el la smanutic o ta xch'ich'al. 13Li xch'ich'al tot vacax, me xch'ich'al tot tentsun, o me stanil ch'ium me' vacax ti lec c'aq'uem te ta xchic'ubil smoton Diose, itun sventa laj yich' vijel o li boch'o tsbolibtas sbae, jech lecubtasbil icom ta sventa sba sbec'tal. 14Buuc xa li xch'ich'al Cristoe, j'ech'el la spocbutic o loq'uel ta jol ta co'ntontic li c'usi mu'yuc stu la jpastique, yu'un jech ja' xa chlic tuncutic yu'un li cuxul Diose. Yu'un li stuque mu'yuc smul ta stojol li Diose. Stuc laj yac' sba ta smoton Dios ta jventatic sventa sbatel osil ta sventa li Ch'ul Espiritue. 15Ja' yu'un ja' xa jc'opojel cu'untic ta sventa li c'usi ach' la xchapan Diose, yu'un ja' la xch'ay ta sventa icham li jmul jtaojtic ta sventa ti muc xch'un cu'untic li c'usi ba'yuc chapanbile. Li boch'otic ic'bilic xae, chich'ic li c'usi albil ono'ox sc'oplal ch-ac'batic sventa sbatel osile. 16Ja' jech chac c'u cha'al li boch'o tsts'iba ta vun boch'o chac'be c'usitic oy yu'une, tsc'an chcham ba'yuc li boch'o laj yale. 17Yu'un me cuxul to li boch'o yaloje, mu to xu' chich' li boch'o sc'oplal chich'e. Ja' to me icham li boch'o yaloje, ja' to chc'ot ta pasel chich'. 18Li sba c'usi chapanbile persa laj yich' tunesel ch'ich' ta sventa. 19Yu'un c'alal ilaj yo'nton ta yaptael scotol mantaletic ta stojol steclumal li Moisese, lic stsac li xch'ich'al ch'ium tot vacaxetique xchi'uc li xch'ich'al tot tentsunetic capal ta vo'e. La stsac noxtoc sc'ob isopo te' xchi'uc tsotsil chij bonbil ta tsoj. La svij ta ch'ich' li svunal mantaletique xchi'uc scotol li steclumale. 20Jech laj yalbe: “Li'i ja' li ch'ich' sventa c'usi chapanbil yu'un Dios ti yaloj tsc'an chapasique”, xut. 21Jech noxtoc la svij ta ch'ich' li ch'ulna pasbil ta nucule, xchi'uc li c'usitic te chtun sventa tspasic c'usitic yaloj Diose. 22Ta xal ta mantaletic ti jutuc mu scotoluc chlecub ta sventa ch'ich'e. Ta xal noxtoc ti manchuc persa chich' malel ch'ich'e, mu'yuc perdón yu'un mulil ti jechuque. 23Li c'usi laj yich' pasel ti ja' senyail sventa vinajele, ja' jech laj yich' lecubtasel chac le'e. Pero li c'usi ja' xa sventa vinajele, ja' xjelov to slequil li matanal laj yich'e. 24Yu'un li Cristoe mu ja'uc i'och ta bats'i lequil ch'ul cuarto li' ta banamil ti senyail no'oxe, ti pasbil no'ox ta sc'ob cristianoetique. Ja' te i'och ta vinajel ti bu mero ja' xa o stuque. Ja' te chc'opoj cu'untic ta stojol Dios sventa chiscoltautic. 25Pero ma'uc sventa yu'un te chaq'uilan smoton Dios ep ta velta jech chac c'u cha'al la spas li banquilal pale ti persa chich' ochel yan ch'ich' c'alal ch-och ta bats'i lequil ch'ul cuarto jun velta ta jujun jabile. 26Ti jechuc tspase, mu xa atbiluc jayib velta icham c'alal to ilic tal banamil ti jechuque. Pero li' ta ora ti slajebtic xa batel c'ac'ale jun no'ox velta laj yac' sba ta milel stuc, yu'un j'ech'el la xch'aybutic o li jmultique. 27Ja' jech chac c'u cha'al ti jun no'ox velta chcham scotol li cristianoetique, ts'acal to ja' xa no'ox chtal chapanel; 28ja' no'ox jech ec li Cristoe, jun no'ox velta laj yac' sba ta milel, yu'un j'ech'el la xch'aybe o smul epal cristianoetic. Ts'acal to c'alal chtal xchibal veltae, mu xa ja'uc sventa chtal xch'ay mulil. Ja' xa no'ox chtal scolta li boch'otic smalaojic coltael yu'une.


Copyright
Learn More

will be added

X\