Hebreos 4

1Ja' yu'un xi'cutic me; ma'uc me oy mu xij'och ec ti bu sc'oplal ta jcux co'ntontique, yu'un sc'oplal to xu' chij'och. 2Yu'un li vu'utique ca'yojtic xa ec li Lequil A'yej jech chac c'u cha'al laj ya'yique, pero li c'usi laj ya'yique muc xtun yu'unic; muc xac' ta yo'ntonic. 3Yan li vu'utic ti laj xa jch'untique, chij'ochutic ti bu ta jcux co'ntontique, yu'un jech laj yal li Diose: “Ja' yu'un ta sc'ac'al co'nton laj cal ti j'ech'el mu x'ochic o ti bu caloj chcux yo'ntonique”, xi. Ac'o me jech laj yal li Diose, pero li yabtele ivu' ono'ox yu'un ti c'alal imeltsaj yu'un li banamile. 4Yu'un oy bu ts'ibabil c'usi la spas ta svucubal c'ac'al li Diose, jech chal: “Li Diose la xcux yo'nton ta svucubal c'ac'al, yu'un meltsajem xa yu'un scotol”, xi. 5Ts'acal to laj yal noxtoc jech chac c'u cha'al laj xa ca'itique: “J'ech'el mu x'ochic o ti bu caloj chcux yo'ntonique”, xi. 6Ja' yu'un sc'an to sta li boch'o xu' ch-ochique. Yu'un li boch'otic ba'yuc i'albatic Lequil A'yeje muc x'ochic ta scoj ti muc xch'unique. 7Ja' yu'un li Diose laj yac'be yan yorail, ja' ti “li' ta ora”, xie. Ja' yu'un la xch'amanbe ye li David ta vo'onee, pero ep xa'ox jabil i'ech'ic ta banamil li boch'otic muc xch'unique, jech la xcha'al li Davide: “Me chava'yic chasc'opanoxuc Dios li' ta orae, mu me xatsatsubtas avo'ntonic”, xi. 8Ti ja'uc bats'i xcuxubil yo'ntonic ti bu i'ic'atic ochel yu'un Josué ta vo'onee, li Diose muc xal yan velta ti tsta yorail oy boch'o chac'be xcux yo'ntonic ti jechuque. 9Ja' yu'un oy to jun xcuxubil yo'ntonic li steclumal Diose. 10Yu'un li boch'otic ch-ochic yo' bu chcux yo'ntonique chcux yo'ntonic ta abtel noxtoc, jech chac c'u cha'al la xcux yo'nton ta yabtel ec li Diose. 11Ja' yu'un oyuc ta co'ntontic chij'och ti bu sc'oplal ta jcux co'ntontique. Yu'un jech mu'yuc boch'o chc'ot ta stojol cu'untic jech chac c'u cha'al ic'ot ta stojol li jbajmantaletique. 12Yu'un li sc'op Diose cuxul, oy stsatsal, ech'em to jech chtuch' jelovel yu'un jech chac c'u cha'al espada ti cha'jot lec yee. Ch-och c'alal to ta yut jol co'ntontic. Tsli' jelovel c'alal to ta jts'acaliltic, c'alal to ta jch'uxuviltic. Xchi'uc sna' c'usi oy ta co'ntontic, xchi'uc c'usitic ta jnoptic. 13Yu'un mu'yuc c'usi pasbil ti xu' nac'al chcom ta stojole. Scotol chajal ta sba ta sat stuc li Boch'o tsta yorail chc'ot calbetic c'usi la jpastique. 14Ja' yu'un oy xa Banquilal Pale cu'untic ti i'och xa batel ta vinajele, ja' li Jesús Xnich'on Diose. Jech j'ech'eluc me staoj yav jun co'ntontic ac'o jch'untic o jech chac c'u cha'al calojtique. 15Yu'un mu ja'uc jun banquilal pale cu'untic ti mu sna' c'u x'elan jvocoltic ta scoj ti mu'yuc jtsatsaltique. Ja' jun Banquilal Pale ti laj yich' pasbel preva scotol jech chac c'u cha'al vu'utique, pero li stuque mu'yuc smul. 16Ja' yu'un junuc co'ntontic ac'o nopajcutic batel ta stojol li Jc'uxubinvaneje, yu'un jech xu' ta jtatic c'uxubinel, yu'un jech xu' ta jtatic coltael ti c'alal yorail oy jvocoltique.


Copyright
Learn More

will be added

X\