Efesios 6

1Alab nich'nabetic, ch'unbeic smantal atot ame'ic ta sventa Cajvaltic, yu'un ja' jech tsc'an pasel. 2Li sba mantal ti oy c'usi ta jtatic c'alal ta jch'untique, jech chal: “Ich'o ta muc' atot ame', 3yu'un jech lec chabat, jech jal chacuxi li' ta banamil”, xi. 4Vo'oxuc totil me'iletic, mu me xasa'beic sc'ac'al yo'nton li avol anich'onique. Tuc' xats'itesic, tojobtasic lec, chanubtasic lec ta sventa li Cajvaltique. 5Vo'oxuc ti ochemoxuc ta mozoile, ch'unbeic smantal li avajvalic ti co'ol cristianooxuc achi'uquique. Ich'ic ta muc', xi'anic me yu'un. Junuc avo'nton chatunic yu'un, jech chac c'u cha'al chijtun yu'un li Cristoe. 6Mu me ja'uc no'ox lec xa chapasic yilel ti c'alal te sq'uelojoxuc avajvalic jech chac c'u cha'al li boch'otic ja' no'ox tsc'an lec ch-ilatic yu'un cristianoe. Ac'o jechucoxuc jech chac c'u cha'al yajtunel Cristo chava'yic. Scotoluc avo'nton pasic c'usi tsc'an li Diose. 7Yutsiluc avo'nton xa'abtejic, nopic ti ja' Cristo cha'abtejic yu'une, ti muc ja'uc cristianoe. 8Yu'un xana'ic ti ja' chc'ot jtatic ta stojol Cajvaltic li c'usitic lec ta jpastic jujunutique, ac'o me ochemutic ta mozoil, o me muc ochemuticuc ta mozoil. 9Vo'oxuc li yajvaloxuque, ja' no'ox me jech lec xapasic ta stojol ec li amozoique. Mu me puru sibtaseluc xavac'beic. Na'ic me ti te oy Avajval achi'uquic ta vinajele, xchi'uc ti mu'yuc tst'uj boch'o chc'uxubin li Diose. 10Slajeb xa chacalboxuc tal, oyuc me lec atsatsalic ta sventa ti jun oyoxuc xchi'uc li Cajvaltique, xchi'uc ta sventa li svu'el ti toj ech'em stsatsale. 11Lapic me scotol li amaquic, li avabtejebic yac'oj Diose, yu'un jech chcuch avu'unic li lo'lael chac' tal li pucuj ti toj lec ya'yele. 12Yu'un ma'uc ta jpastic c'op jchi'uctic li boch'o oy sbec'tal, oy xch'ich'alique. Ja' ta jtsal jba jchi'uctic li pucujetic ti tsots tspasic mantale, ti tsots svu'elique, ti ch-ilbajinvanic li' ta banamil ti oy ta ic' osile, ti ta ic' chanovique ti mu'yuc sbec'talique. 13Ja' yu'un ich'ic me scotol li amaquic, li avabtejebic yac'oj Diose, yu'un jech xu' avu'unic li tsots pleito c'alal chc'ot ta atojolique. Me ivu' avu'unic scotol jech chac le'e, lec jun avo'nton va'al chacomic o. 14Ja' yu'un chaplanic me lec cha'e. Chuquino me lec li achuquique, ja' li c'usi melele. Aq'uic me smac li sna avo'ntonique, ja' li c'usitic tuq'ue. 15Lapo me lec li axonobique, ja' ti chapalucoxuc xchi'uc li Lequil A'yej ti tspas ta jun co'ntontic yu'une. 16Tsaquic me lec li amaquique, ja' li xch'unojel avo'ntonique, yu'un ja' sventa chamacbeic o yabtejeb li pucuj ti tsanajtic sni' tsjip tal ta atojolique. 17Aq'uic me li smac ajolique, ja' ti ach'unoj ti chacolique. Tsaquic me li avespadaic chayac'boxuc Ch'ul Espiritue, ja' li sc'op Diose. 18Ta sventa ti chac'opanic Dios scotol orae, c'anbeic Dios ta sventa Ch'ul Espíritu li c'usi chac'anique. Viq'uiluc me lec asatic ta sventa li c'usi chavalic ta stojol Diose. C'anbeic vocol ta stojol ec li yantic yu'untac Diose. 19Xchi'uc c'anbicun vocol ta jtojol ec li vu'une, yu'un ac'o sjambun que, jech jamal ac'o cal c'usi toj lec ta jtatic yu'un li Lequil A'yej ti mu'yuc to'ox vinajeme. 20Yu'un ja' tacbilun ta xcholel, ja' yu'un ti li' chuculun ta cadenae. Jech ta jc'an ti ac'o oyuc lec stsatsal co'nton ta xcal jech chac c'u cha'al tsc'an chic'opoje. 21Ti c'u cha'al xu' chava'yic c'u xi'elan eq'ue xchi'uc ti c'u x'elan chbat cu'une, ja' chc'ot yalboxuc scotol li quermanotic Tíquico ti lec c'anbile, ti jun yo'nton chtun yu'un Cajvaltique. 22Yu'un ja' ta jtac tal ta atojolic sventa chtal yalboxuc, yu'un jech chana'ic c'u xi'elancutic, xchi'uc ja' chtal smuq'uibtasboxuc avo'ntonic. 23Li Diose ja' li Totile xchi'uc li Cajvaltic Jesucristoe ac'o spasbe ta jun yo'nton li jch'unolajeletique, xchi'uc ac'o yac' c'anvanicuc, xchi'uc ac'o oyuc lec xch'unojel yo'ntonic. 24Ac'o c'uxubinaticuc yu'un Dios scotol li boch'otic sc'anojic o ta scotol yo'ntonic li Cajvaltic Jesucristoe.


Copyright
Learn More

will be added

X\