Efesios 5

1Ja' chanbeic yo'nton li Diose, yu'un xnich'naboxuc xa, lec sc'anojoxuc. 2C'ano abaic jech chac c'u cha'al la sc'anutic li Cristoe, yu'un laj yac' sba ta milel ta jcojtic. Ja' smoton Dios ic'ot, ja' milbil matanal ti oy lec smuil laj ya'ay li Diose. 3Ja' yu'un li vo'oxuque, mu me xalo'iltaic, mu xa me xavalbeic sc'oplal li mulivajele, li c'usitic yan chopole, xchi'uc li xpich'etel avo'ntonique. Yu'un mu xa jechuc tsc'an tspas li yu'untac Diose. 4Mu xavalic c'usi mu'yuc stu, bol lo'il, xchi'uc ixtol lo'il, yu'un mu xa smeloluc. Ja' xa no'ox xatojbeic ta vocol li Diose. 5Yu'un xana'ic xa lec, li boch'otic chmulivajique xchi'uc ti tspasic c'usitic yan chopole, xchi'uc li boch'otic xpich'et no'ox yo'ntonique ti xco'laj xchi'uc ja' sdiosic c'otem li c'usi batem yo'nton xchi'uquique, mu xu' ch-ochic yo' bu chventainvan li Cristoe xchi'uc li Diose. 6Mu me xaslo'laoxuc li boch'otic mu meleluc c'usi chalique. Yu'un li boch'otic mu xch'unic c'usitic yaloj Diose, chapal xa sc'oplal chbat stojic. 7Ja' yu'un mu me xanaban abaic ta spasel ec jech chac c'u cha'al tspasique. 8Yu'un ta vo'onee oyoxuc to'ox ta ic' osil, pero li' ta orae oyoxuc xa ta sac osil ta sventa li Cajvaltique. Ja' yu'un xanovanic jech chac c'u cha'al li boch'o chanov ta sac osile. 9Yu'un li yabtelal sac osile ch-ayin slequil co'ntontic yu'un, chijtuq'uib yu'un, melel scotol c'usi chcaltic yu'un. 10Xchi'uc ja' oy ta co'ntontic o ta jpastic li c'usitic lec chil Cajvaltique. 11Mu me xatic' abaic ta spasbel yabtelal ec li ic' osil ti mu'yuc stue. Ja' lec ac'beic tsots taq'uiel li boch'otic jech tspasique. 12Yu'un toj q'uexlal sba li c'usi tspasic ta mucule, mu stac' alel. 13Pero me chlic vinajuc ta sventa yabtelal sac osile, chlic jamuc scotol. Yu'un li sac osile ja' yabtel chac' ta ilel scotol. 14Ja' yu'un chc'ot ta pasel ti jech albil sc'oplale: “Lican, vo'ot ti vayemote; totsan tal ta stojol li animaetique, jech chlic yac' xojobal ta atojol li Cristoe”, xi. 15Ja' yu'un q'uelo me abaic lec ta sventa li c'usitic chapasique. Mu me jechucoxuc jech chac c'u cha'al li boch'o bolique, ja'uc jechoxuc jech chac c'u cha'al li boch'o bijique. 16Tunesic lec li c'ac'al chjelov avu'unique, yu'un yantic tsoc batel li banamile. 17Ja' yu'un mu me bolucoxuc, na'ic lec c'usi tsc'an yo'nton li Cajvaltique. 18Mu me xayacubic, yu'un ja' chabolibic yu'un. Ja' ac'o nojuc ta avo'ntonic li Ch'ul Espiritue. 19Ja' lo'iltabo abaic c'usi chal li salmoetique, li q'ueojetique, xchi'uc li bic'tal q'ueojetic yu'un Diose. Q'uejintaic, ich'ic ta muc' Cajvaltic ta scotol avo'ntonic. 20Scotol li c'usiuc no'ox chc'ot ta atojolique tojbeic ta vocol Jtotic Dios scotol ora ta sventa li Cajvaltic Jesucristoe. 21Tsc'an chavich' abaic ta muc' ta sventa ti avich'ojic xa ta muc' li Cristoe. 22Li antsetique ac'o yich' ta muc' smalalic jech chac c'u cha'al chich'ic ta muc' li Cajvaltique. 23Yu'un li vinique ja' jolil c'otem yu'un li yajnile, jech chac c'u cha'al li Cristoe ja' Jolil c'otem yu'un scotol li steclumale, ja' li sbec'tal c'oteme. Xchi'uc ja' Jcoltavanej yu'un. 24Jech chac c'u cha'al chquich'tic ta muc' Cristo, vu'utic li steclumalutique, ja' jech ac'o yich' ta muc' smalal li antsetique, ac'o spasic scotol li c'usi oy ta sventaique. 25Viniquetic, c'ano me avajnilic jech chac c'u cha'al sc'anoj steclumal li Cristoe, yu'un laj yac' sba ta milel ta scoj. 26Yu'un jech la slecubtas, la spoc ta sventa li sc'ope. 27Yu'un jech toj jun yutsil chc'ot c'alal te tsobol ta stojol li steclumale; me jutuc mu'yuc yic'ubal, mu'yuc c'usi yatinoj, mu'yuc c'usi oy o. Jech bats'i lec, bats'i jun yutsil chc'ot o. 28Ja' yu'un li viniquetique tsc'an jech ac'o sc'an yajnilic ec jech chac c'u cha'al c'ux ta yo'nton sbec'tal stuquique. Li boch'o lec sc'anoj yajnile ja' sc'anoj sba stuc chc'ot. 29Yu'un mu'yuc boch'o tsbaj li sbec'tal stuque. Lec tsmac'lin, lec chc'uxubin jech chac c'u cha'al tspasbe steclumal li Cristoe. 30Yu'un vu'utic jujuchop sbec'tal Cristo c'otemutic. 31Ja' yu'un jech ts'ibabil ta sc'op Dios: “Li vinique ta scomtsan stot sme', yu'un ta xic' sbaic xchi'uc yajnil. Li chibic to'oxe jun no'ox sbec'tal ta xc'otic”, xi ts'ibabil. 32Le'e toj muc' smelol. Pero vu'un chcal ti ja' smelol c'u x'elan tspas ta sventa steclumal li Cristoe. 33Ja' yu'un viniquetic, c'ano me avajnilic jujunoxuc jech chac c'u cha'al c'ux ta avo'nton abec'tal atuquique. Jech ec li antsetique, ac'o yich' ta muc' li smalalique.


Copyright
Learn More

will be added

X\