Colosenses 4

1Vo'oxuc li yajvaloxuque ja' me xapasic c'usi lec, c'usi tuc' ta stojol li amozoique. Na'ic me ti oy Avajvalic te ta vinajel ec li vo'oxuque. 2Jechuc me avo'ntonic o ti chac'opanic Diose. Viq'uiluc me asat achi'uquic; tojbeic ta vocol li Diose. 3C'alal chac'opanic Diose, c'opanbuncutic Dios ta jtojolcutic ec, yu'un jech ac'o sjam lec ti'na li Diose. Jech xu' ta jpucbecutic li sc'ope, jech chlic ya'ibeic sc'oplal li Cristoe, ja' ti mu'yuc to'ox vinajeme. Yu'un ja' ta sventa ti li' tiq'uilun ta chuquele. 4Jech c'opanbicun Dios ta jtojol, yu'un jech xu' cu'un jamal chcal batel jech chac c'u cha'al tsc'an alele. 5Bijanic me c'alal chachi'inic li boch'otic mu'yuc xch'unojic Diose. Tunesic me lec li c'ac'al chjelov avu'unique. 6Li c'usi chavalique oyuc me lec smuil, oyuc me lec xchi'il. Nopo lec c'usi chavalbeic li boch'otic chataic ta c'opanele. 7Ti c'u xi'elan li'i, ja' chtal yalboxuc scotol li quermanotic Tíquico ti lec c'anbile, ti jun yo'nton ch-abteje, ja' li jchi'il ta abtel ta sventa Cajvaltique. 8Ja' ta jtac tal ta atojolic sventa chtal yalboxuc, yu'un jech chana'ic c'u xi'elancutic, xchi'uc jech chpat avo'ntonic ec. 9Ja' ta xchi'in tal li Onesimoe, ja' li achi'ilique. Ja' li quermanotic ti jun yo'ntone, ti lec c'anbile. Ja' chtal yalboxuc xchibalic scotol li c'usi chc'ot ta pasel li'i. 10Chabanuc xayalboxuc tal li Aristarco ti li' xchi'inojun ta yut chuquinabe. Chabanuc xayalboxuc tal ec li Marcose, ja' li yuts' yalal Bernabee. Ja' ti albiloxuc ono'ox sc'oplal tsc'an chavich'ic ta muc' c'alal me chc'ot sq'ueloxuque. 11Chabanuc xayalboxuc tal noxtoc li Jesús, ja' li Justo yan sbie. Le'e ja' jchi'iltac ti co'ol quich'oj circuncisión jchi'uque. Ja' no'ox stuquic ep chiscoltaicun ta xcholel li ventainel yu'un Diose. Lec chpat co'nton yu'unic. 12Chabanuc xayalboxuc tal li Epafrase, ja' li achi'ilique, ja' li yajtunel Cristoe. Scotol c'ac'al yac'oj persa tsc'opan Dios ta atojolic, yu'un tsc'an ti ac'o junuc avo'ntonic o ta stojol Diose, ti ac'o tsatsubanic leque, xchi'uc ti ac'o ana'ic lec scotol c'usi tsc'an Diose. 13Vu'un quiloj jtuc ti solel oyoxuc ta yo'ntone, xchi'uc oy ta yo'nton noxtoc li jch'unolajeletic ta lum Laodiceae, xchi'uc ta lum Hierapolise. 14Chabanuc xayalboxuc tal li jpoxtavanej Lucase, ja' ti lec c'anbile, xchi'uc li Demase. 15Chabanuc xavalbeic li jch'unolajeletic te ta lum Laodiceae, xchi'uc li quermanatic ants Ninfase, xchi'uc li jtsob jch'unolajeletic te tstsob sbaic ta snae. 16C'alal me laj xa ava'yic c'usi chal li jcarta li'i, tacbeic batel ec li jtsob jch'unolajeletic ta Laodiceae; ac'o ya'yic ec. Jech a'yic c'usi chal ec li scartaique. 17Albeic Arquipo ti ac'o me sventain lec li yabtel i'ac'bat yu'un Cajvaltique, ac'o me c'otuc ta pasel yu'un. 18Li spatubil avo'ntonic cu'un li'i, vu'un ta jts'iba tal ta jc'ob jtuc, vu'un li Pabloune. Mu me xch'ay ta avo'ntonic ti li' chuculune. Ac'o xc'uxubinoxuc o li Diose.


Copyright
Learn More

will be added

X\