Colosenses 2

1Ta jc'an chana'ic c'u stsatsal chi'abtej ta aventaic, xchi'uc ta sventa li boch'otic te oyic ta lum Laodiceae xchi'uc ta sventa scotol li boch'otic mu'yuc to yilojbicun jsate. 2Ta xcac' persa, yu'un jech xu' tstsatsub yo'ntonic ta stojol Dios. Jech co'ol chac'anan aba acotolic, jech chava'ibeic lec smelol, chavotquinic lec c'usi snopoj li Dios Totil ti mu'yuc to'ox vinajeme, ja' li sc'oplal Cristoe. 3Yu'un ja' te oy ta stojol Cristo scotol li c'usitic toj lec ta jtatic yu'un li bijubtasele, li yotquinel c'usitic ja' sventa Diose. 4Ti jech chacalboxuque, yu'un jech mu me xaslo'laoxuc li boch'otic toj lec ya'yel li c'usitic chalique. 5Yu'un ac'o me mu'yuc te jchi'inojoxuc xchi'uc jbec'tal, pero te jchi'ucoxuc ta co'nton. Jech xcuxet no'ox co'nton, yu'un lec oyoxuc, xchi'uc staoj yav lec jun avo'nton ach'unojic o li Cristoe. 6Ta sventa ti laj xa avich'ic ta muc' li Cajvaltic Jesucristoe, te me oyanic o ta stojol. 7Ac'o lec avibelic, ac'o lec anaclebic ta stojol ta sventa li xch'unojel avo'ntonique. Ja' me pasic o ti c'u x'elan laj avich'ic chanubtasele. Tojbeic me ta vocol scotol c'ac'al. 8Q'uelo me abaic, mu me xaslo'laoxuc li boch'otic bij scuyoj sbaique, ti mu meleluc c'usi chalique, ti stalel no'ox cristianoetique, ti sventa no'ox banamile, yu'un mu ja'uc ta sventa li Cristoe. 9Yu'un li Cristoe yich'ojbe scotol c'u x'elan stalel li Diose. 10Ja' no'ox jech li vo'oxuque avich'ojbeic xa scotol stalel ec li Diose, yu'un oyoxuc xa ta stojol li Cristo ti ja' tspas ta mantal scotol li pucujetic ti tsots tspasic mantale ti tsots svu'elique. 11Xchi'uc ja' ta sventa noxtoc ti avich'ojic xa li circuncisión ti muc pasbiluc ta sc'ob cristianoe, yu'un icom xa avu'un li apoco' talelique, jech ja' xa avich'ojic li circuncisión yu'un Cristoe. 12Jech co'ol lamucat o achi'uquic ti c'alal laj avich'ic vo'e, xchi'uc co'ol lacha'cuxi achi'uquic noxtoc, yu'un laj ach'unic ti oy svu'el li Dios ti la xcha'cuxes loq'uel ta smuquinal li Cristoe. 13Ac'o me chamenoxuc to'ox ta scoj li amulique xchi'uc ta sventa li c'usi tsc'an abec'talique, pero li' ta orae co'ol xa laj yac' cuxianic xchi'uc li Cristoe. La spasboxuc perdón yu'un scotol li amulique. 14La slajesbe sc'oplal noxtoc li mantaletic ti ja' ta sventa ep la jta o jmultic ta stojol Diose. La slajesbe yip, laj yac' ta joc'anel ta cruz. 15La slajesbe stsatsalic noxtoc li pucujetic ti tsots tspasic mantale, ti tsots svu'elique. Laj yac' ta q'uexlal ta satilal; pech'bil ta teq'uel icom o yu'un ti c'alal icham ta cruz li Cristoe. 16Ja' yu'un mu me xatuc'ulanic me oy boch'o oy c'usi chayalboxuc ta sventa li ve'liletique, ta sventa li c'usitic chcuch'tique, ta sventa li sc'ac'alil q'uinetique, ta sventa li sepet ue, xchi'uc ta sventa li cuxub o'ntonale. 17Yu'un scotol le'e ja' no'ox senyail laj yich' pasel ta sventa li Boch'o sc'oplal chtale, ja' mero sc'oplal li Cristoe. 18Mu me xavich'ic ta muc' c'usi chayalboxuc li boch'otic biq'uit chac' sbaic yilele, ti chich'ic ta muc' li j'almantaletique, xchi'uc ti chalic oy c'usi chil ta xvayechique, ti ja' no'ox batem ta yo'nton tstoy sbaic ta sventa no'ox sbec'talique. 19Mu'yuc bu stsacoj sbaic xchi'uc li Sjolique ja' li Cristoe, ti ja' chac' ch'iuc, ti ja' tsmac'lin lec li sbec'tal ta sventa ti lec stsacoj sbaic ta sts'acaliltac xchi'uc ta xch'uxuviltaque, jech lec chch'i batel ta sventa li ts'itesel chac' Diose. 20Yu'un me co'ol lachamic xchi'uc li Cristoe, mu xa xapasic jech chac c'u cha'al tspas li cristianoetic ti ja' sventa no'ox banamile. ¿C'u yu'un ta to xapasic li c'usitic chalique? Xco'laj xchi'uc oyoxuc to ta sventa li banamile. 21Yu'un ta to xach'unic ti c'alal jech chayalboxuque: “Mu me xatsaquic le'e, mu me xalajesic le'e, mu me xapiquic le'e”, ti xayutoxuque. 22Scotol le'e chlaj sc'oplal ti c'alal chich' tunesele. Yu'un smantal, sc'op no'ox cristianoetic, chanubtasel no'ox yu'un cristianoetic. 23Li c'usitic tspasique xijbijubutic xa yu'un yilel, yu'un ep c'usitic chch'unic, biq'uit chac' sbaic yilel, tsots mantal chac'be li sbec'talique. Pero me jutuc mu'yuc c'usi stu o ta sventa tspajes li c'usi chopol tsc'an sbec'talique.


Copyright
Learn More

will be added

X\