Hechos 6

1C'alal ja'o jech orae, i'epajic li jch'unolajeletique. Li israeletic ti griego xc'opojique iliquic ta bic'tal vulajetel ta stojol li israeletic ti hebreo xc'opojique. Laj yalic ti mu'yuc lec chtuc'ulanbatic me'on antsetic yu'unic ti c'alal chich'ic coltael ta jujun c'ac'ale. 2Ja' yu'un li lajchab yajtacbolaltac Jesuse la stsobic scotol li jch'unolajeletique, jech laj yalbeic: —Li vu'uncutique mu lecuc me ja' ta jcomtsancutic xcholel sc'op Dios ta sventa ti vu'uncutic ta jventaincutic ve'lile. 3Ja' yu'un quermanotac, t'ujic vucub viniquetic li' ta atojolic ti bu lec sc'oplalique, ti ventainbil yo'ntonic yu'un Ch'ul Espiritue, xchi'uc ti oy sbijilique, yu'un ja' ta xcac'betic sventainic li abtele li'i. 4Li vu'uncutique ja' ta xcabtelincutic o sc'opanel Dios xchi'uc spuquel li sc'op Diose —xiic. 5Toj lec laj ya'yic scotolic li c'usi i'albatique. Jech la st'ujic Esteban. Ja' jun vinic ti oy lec xch'unojel yo'ntone, ti ventainbil yo'nton yu'un Ch'ul Espiritue. Xchi'uc la st'ujic Felipe, Prócoro, Nicanór, Timón, Parménas, xchi'uc Nicolás liquem ta lum Antioquía, ti co'ol xa xch'unoj xchi'uc li israeletique. 6Jech laj yiq'uic batel ta stojol li yajtacbolaltac Jesuse. La sc'opanbeic Dios ta stojol; laj yac' sc'obic ta sjolic. 7Jech ipuc o li sc'op Diose, i'epajic ta jyalel li jch'unolajeletic te ta Jerusalene. Oy ep paleetic la xch'unic ec. 8Li Estebane inoj ta yo'nton li slequil yo'nton xchi'uc li svu'el Diose, jech la spas ep sq'uelubil stsatsal Dios ta stojol li cristianoetique. 9Jech iliquic jayibuc israeletic te ta nail tsobobbail ti Coltabilic ta Mozoil, xi sbiique, xchi'uc jayibuc liquemic tal ta lum Cirene, ta lum Alejandría, ta Cilicia banamil, xchi'uc ta Asia banamil. Te lic stsaquilanic ta c'op li Estebane. 10Pero muc xu' yu'unic la stsalic ta sventa sbijil xchi'uc ta sventa li Ch'ul Espiritue. 11Jech la stojic tal j'epalc'opetic, yu'un ac'o yalic ti laj ya'yic ichopolc'opoj ta stojol Moisés xchi'uc ta stojol Dios li Estebane. 12Jech la socbeic o sjol li cristianoetique, xchi'uc li banquilaletique, xchi'uc li j'abteletic ta ch'ulnae, xchi'uc li jchanubtasvanejetique. Jech ital stsaquic li Estebane. Laj yiq'uic batel ta stojol li jchapanvanejetic ta ch'ulnae. 13La sva'anic j'epalc'op testigoetic, jech laj yalic: —Li vinic li'i mu xquechan o ti chchopolc'opoj ta sventa li ch'ulna li'i xchi'uc ta sventa li smantal Diose. 14Yu'un ca'yojcutic jech chal: ‘Li Jesús liquem ta Nazarete ta xlic svuq'ues li ch'ulna li'i xchi'uc ta sjel li jtaleltic yac'oj comel Moisés ta vo'onee’, xi —xi i'epalc'opojic. 15Ja' yu'un scotol li jchapanvanejetic ta ch'ulna te chotolique la sq'uelbeic sat li Estebane. Xco'laj xchi'uc sat yaj'almantal Dios laj yilic.


Copyright
Learn More

will be added

X\