Hechos 23

1Li Pabloe la sq'uelbe lec sat scotol li jchapanvanejetic ta ch'ulnae, jech laj yalbe: —Jchi'iltac, li vu'une bats'i jun co'nton oyun o ta stojol li Diose. Ja' jechun o c'alal to tana —xi. 2Ja' yu'un li banquilal pale Ananiase laj yal mantal ti ac'o smajbeic ye Pablo li boch'otic te nopol va'ajtique. 3Li Pabloe jech laj yalbe: —Ja' ta xlic smajot stuc li Diose, vo'ot ti ja' jechot jech chac c'u cha'al pac'benal na ti bonbil lec ta tane. Chotolot xa chachapanun ta sventa smantaltac Dios acuyoj aba. Pero vo'ot atuc chabajbe smantal Dios ta sventa ti laj aval ac'o smajbicun quee —xut. 4Li boch'otic te va'ajtique jech laj yalbeic li Pabloe: —¿Me ta melel chachopolc'opoj ta stojol li banquilal pale yu'un Diose? —xutic. 5Itac'ov li Pabloe: —Jchi'iltac, mu jna' me ja' banquilal pale le'e. Yu'un jech ts'ibabil ta sc'op Dios: ‘Mu me xachopolc'opojic ta stojol li banquilaletic avu'unic te ta alumalique’, xi ts'ibabil —xut. 6Li Pabloe la sna' ti oy saduceoetic xchi'uc fariseoetic te oyique, jech tsots lic c'opojuc te ta stojol li jchapanvanejetic ta ch'ulnae: —Jchi'iltac, li vu'une fariseoun. Bats'i xnich'onun fariseo. Ja' yu'un ta xchapanicun ta sventa ti jmalaoj, ti jch'unoj ti ta xcha'cuxiic animaetique —xi. 7C'alal laj yal jeche, li fariseoetic xchi'uc saduceoetique lic stsaquilan sbaic ta c'op stuquic ta sventa li c'usi xch'unojique. Jech te la svoq'uilan sbaic. 8Yu'un li saduceoetique chalic ti mu'yuc cha'cuxesele, ti mu'yuc j'almantale, xchi'uc ti mu'yuc jch'uleltique. Yan li fariseoetique xch'unojic ti oy scotol jech chac le'e. 9Jech te iliquic o ta vochlajetel. Te lic sva'an sba jayibuc boch'otic lec xchanojic mantaletic ti xch'unojic fariseoe. Tsots lic c'opojicuc, jech laj yalic: —Mu'yuc la jtabetic smul li vinic li'i. Oy yic'al yu'un oy ic'opanat yu'un junuc li c'usi mu xquiltique, o me ic'opanat yu'un junuc yaj'almantal Dios —xiic. 10Jech tsots ilic c'op yu'unic. Ja' yu'un li mero banquilal soldadoe ixi' me biq'uitic tslilinic li Pabloe, jech la stac batel soldadoetic, yu'un ac'o bat yiq'uic loq'uel tal ta anil ta stojol li jsa'c'opetique, yu'un ac'o yiq'uic ochel yan velta ta snail li soldadoetique. 11Ta yac'ubalil laj yac' sba ta ilel Cajvaltic ta stojol li Pabloe, jech laj yalbe: “Pablo, oyuc me lec stsatsal avo'nton. Ti c'u x'elan lac'opoj ta jventa li' ta Jerusalene, ja' no'ox me jech xac'opoj ta jventa te ta Roma noxtoc”, xut. 12Ta yoc'omal la stsob sbaic jayibuc judioetic; la xchapanic ti ta smilic o li Pabloe. Laj yalic ta stojol Dios ti ac'o tuch'batuc yorailic me muc xcham yu'unique. Ja' yu'un laj yalic ti mu'yuc ta xve'ic, ti mu'yuc c'usi ta xuch'ic oe, ja' to me icham yu'unique. 13Ech'em ta cha'vinic (40) viniquetic ti jech la xchapanique. 14Jech bat yalbeic li banquilal paleetique xchi'uc li moletic yu'unique: —Li vu'uncutique laj xa calcutic ta jamal ti ta jip jbec'talcutic oe. Me jutuc mu'yuc c'usi ta jtuncutic o, ja' to me icham cu'uncutic li Pabloe. 15Ja' yu'un vo'oxuc li jchapanvanejoxuc ta ch'ulnae, avocolicuc albeic mero banquilal soldado ti ac'o yic' loq'uel tal ta atojolic li Pabloe. Albeic ti oy c'usi lec chac'an chajac'beic ta sventa li smul tic'bile. Li vu'uncutique chapaluncutic xa sventa ta jmaccutic ta be —xutic. 16Pero li c'usi la snopique laj ya'ay yichoc' li Pabloe. Jech i'och batel ta snail li soldadoetique, bat yalbe li svome. 17Li Pabloe laj yic' jun banquilal soldado, jech laj yalbe: —Ic'o batel ta stojol mero banquilal soldado li querem li'i yu'un oy ya'yej ta xalbe —xut. 18Li banquilal soldadoe laj yic' batel ta stojol mero banquilal soldado li quereme, jech c'ot yalbe: —Li Pablo te tiq'uil ta chuquele laj yic'un. Laj yalbun ti ac'o quic' tal ta atojol li querem li'i yu'un la oy c'usi chayalbot —xut. 19Li mero banquilal soldadoe la stsacbe sc'ob li quereme; laj yic' loq'uel jutuc, jech la sjac'be: —¿C'usi chac'an chavalbun? —xut. 20Itac'ov li quereme: —Li jchi'iltaccutic ta judioale laj xa xchapanic ti chtal sc'anbicot vocol ti oc'om ac'o avic' batel ta stojol jchapanvanejetic ta ch'ulna li Pabloe, yu'un la oy c'usi lec ta sjac'beic. 21Pero mu me xach'un li c'usi ta xalique. Yu'un ech'em ta cha'vinic (40) vinic la xchapanic ti ta smaquic ta be li Pabloe. Laj xa yalic ta jamal ta stojol Dios ti mu'yuc ta xve'ic, ti mu'yuc c'usi ta xuch'ique ja' to me icham yu'unique. Ta ora le'e chapalic xa. Ja' xa no'ox tsmalaic li c'usi chavale —xi li quereme. 22Li mero banquilal soldadoe la stac batel li quereme, jech laj yalbe: —Mu me boch'o xavalbe li c'usi laj avalbune —xut. 23Li mero banquilal soldadoe la stac ta iq'uel chib banquilal soldado, jech laj yalbe: —Chapanic lajunvinicuc (200) avajsoldadoic, xchi'uc lajuneb xchanvinic (70) cajajtic ta ca', xchi'uc lajunvinic (200) oy slanzaic. Yu'un chabatic c'alal ta Cesarea ta baluneb ora ac'ubal tana. 24Chapanic ca'etic noxtoc sventa ta xcaji batel ec li Pabloe. Yu'un chaviq'uic batel ta stojol li ajvalil Felicse. Lec me ac'o c'otuc avu'unic —xut. 25Li mero banquilal soldadoe la stacbe batel carta li Felicse. Jech laj yal batel: 26“Muc'ul ajvalil Felics, ta jc'opanot tal ta carta. Chabanucot chacalbot tal, vu'un Claudio Lisiasun. 27Li vinic li'i itsacat yu'un li xchi'iltac ta judioale; ta ox sc'an tsmilic. Pero vu'un ay jpoj loq'uel tal jchi'uc li cajsoldadotaque, yu'un laj ca'ay ti ich'bil ta venta yu'un Romae. 28Laj cac' ta stojol li jchapanvanejetic ta ch'ulna yu'unique, yu'un ta jc'an chca'ay c'usi smul. 29Pero laj ca'ay ti ja' no'ox tsc'an ta stic'beic smul ta sventa li mantaletic yu'unique. Mu'yuc smul ti xu' ta xmilate; mu'yuc smul ti xu' ta xchucate. 30C'alal laj ca'ay ti chapal xa yu'unic c'u x'elan xu' ta smilique, ja' yu'un la jnop ti ta jtac tal ta atojole. Li jtic'muliletique laj xa calbeic ti te ac'o tal yalic ta atojol li c'usi smul yu'unique. Ja' no'ox jech ta jc'opanot tal”, xi batel ta carta. 31Li soldadoetique la spasic li c'usi i'albatique. Laj yiq'uic batel ta ac'ubaltic li Pabloe; te ic'otic ta lum Antípatris. 32C'alal isacub osile, te no'ox isutic tal ta snaic li soldadoetic ti ta yacan chanovique. Ja' xa no'ox la xchi'inic batel Pablo li boch'otic cajajtic ta ca'e. 33C'alal ic'otic ta Cesarea li yantique, c'ot yac'beic vun li ajvalile, xchi'uc c'ot yaq'uic ta c'abal noxtoc li Pabloe. 34C'alal la sq'uel vun li ajvalile, la sjac'be bu slumal li Pabloe. C'alal laj ya'ay ti ta Cilicia banamil voq'ueme, 35jech laj yalbe: —Te ta xca'ay c'usi chaval c'alal me ivulic li boch'otic ta stiq'uic amule —xut. Laj yal mantal ti ac'o yich' chabiel ta cabildo ti pasbil yu'un ajvalil Herodese.


Copyright
Learn More

will be added

X\