Hechos 22

1“Moletic, jchi'iltac ta acotolic, a'yo ava'yic, li' ta jcholbe lec smelol ca'yej ta atojolic”, xi. 2C'alal laj ya'yic ti ta hebreo c'op ic'opoj li Pabloe, yo'to lec ich'aniic scotolic. Jech lic yal li Pabloe: 3“Vu'une jvinquilal jbatic, judío vinicun ec. Te livoc' ta lum Tarso ta Cilicia banamil, pero li' lich'i ta Jerusalén. Li' la jchan lec vun ta stojol li Gamaliele. Solel lec la xchanubtasun ta sventa scotol li mantaletic yu'un jmoltot jyame'tic ta vo'onee. Tsots sc'oplal laj ca'ay ta jch'unbe smantal Dios ec jech chac c'u cha'aloxuc li' ta orae. 4Ja' to'ox jech laj cuts'inta ec li boch'otic stamojic Lequil Bee; solel ta jc'an ox ta jmilan o. La jtsacan batel viniquetic xchi'uc antsetic; la jtic'an ta chuquel. 5Li banquilal pale xchi'uc j'abteletique yiloj ta satic ti jech la jpase. Yu'un ja' laj yac'bicun batel lec svunal ta sventa li jch'unolajeletic ta Damascoe, yu'un jech xu' ta jchucan tal, chquic' tal li' ta Jerusalén. Yu'un ta jc'an li' ac'o yich'ic uts'intael. 6“Pero c'alal nopol xa'ox xi'ech' batel ta Damascoe, po'ot xa van o'lol c'ac'al, ta ora xleblej yalel tal tsots luz ta vinajel. Joyibtabilun lic'ot ta xojobal. 7Liyal ta lum. Laj ca'ay oy boch'o la sc'opanun: ‘Saulo, Saulo, ¿c'u yu'un chavuts'intaun?’, xiyutun. 8Jech la jac'be: ‘¿Boch'oot?, Cajval’, xcut. Jech laj yalbun: ‘Vu'un Jesusun ti liquemun tal ta Nazarete. Vu'un ti chavuts'intaune’, xiyutun. 9Li boch'otic xchi'inojicun batele laj yilic ec li luze, pero muc xa'yic c'usi laj yal li boch'o la sc'opanune. 10Li vu'une jech la jac'be: ‘¿Cajval, c'usi chac'an ta jpas?’, xcut. Jech laj yalbun: ‘Lican, batan ta Damasco. Te chc'ot avich' albel scotol li c'usi jnopoj chapase’, xiyutun. 11Ta sventa ti imac jsat yu'un saquil li luze, jech nitbilun xa li'och batel ta Damasco yu'un li jchi'iltaque. 12“Oy jun vinic te ta Damasco, Ananías sbi. Scotol yo'nton xch'unojbe smantal li Diose. Lec sc'oplal yu'un scotol li jchi'iltactic ta judioal te ta Damascoe. 13Ja' ital sq'uelun; te ivul ta jts'el, jech laj yalbun: ‘Quermano Saulo, ac'o jamuc asat’, xiyutun. Jech ta ora ijam li jsate; laj quilbe sat li Ananiase. 14Jech laj yalbun: ‘Li Dios yu'un jmoltot jyame'tic ta vo'onee ja' la st'ujot, yu'un ac'o ana' c'usi tsc'an yo'nton, xchi'uc ac'o avilbe sat li Boch'o Tuc' Yo'ntone, xchi'uc ac'o ava'ay c'usi chayalbot. 15Vo'ot testigoot chac'ot yu'un ta stojol scotol cristianoetic, yu'un chavalbe ya'yic li c'usi laj avile xchi'uc li c'usi laj ava'ye. 16Ja' yu'un li' ta orae, mu xamala jal; ich'o vo', ac'o ta poquel amul, c'anbo vocol ta stojol li Cajvaltique’, xiyutun li Ananiase. 17“C'alal lisut tal li' ta Jerusalene, bat jc'opan Dios ta ch'ulna. Pero oy c'usi laj yac'bun quil ta jch'ulel li Diose. 18Laj quil jech laj yalbun: ‘Ac'bo yipal loq'uel ta ora li' ta Jerusalene. Yu'un li achi'iltac li'i mu xich'ic ta muc' li c'usi chavalbe ya'yic ta jventae’, xiyutun. 19Jech laj calbe: ‘Cajval, sna'ojic scotol jchi'iltac ti vu'un la jtic'an ta chuquel, ti la jmajan ta nail tsobobbailetic li boch'otic xch'unojic ac'ope. 20C'alal imilat li avajtunel Estebane, te oyun ec. Toj lec laj ca'ay ti ichame. Vu'un la jchabibe sc'u'ic li boch'otic imilvanique’, xcut. 21Pero jech laj yalbun li Cajvaltique: ‘Batan me, yu'un vu'un ta jtacot batel ta nom ta stojol li yanlum cristianoetique’, xiyutun”, xi li Pabloe. 22C'alal jech yepal ilo'ilaj li Pabloe, tsots lic avanicuc: “¡Ulesic ta banamil li vinic le'e; mu smeloluc me li' cuxul ta banamil!”, xiic. 23Ta sventa ti toj ech'em ch-avanic, ti la sjip sc'u'ic xchi'uc ti ep tsjipic muyel ts'u'ilum ta toyole, 24ja' yu'un laj yal mantal mero banquilal soldado ti ac'o yiq'uic ochel ta snail soldadoetic li Pabloe. Laj yal noxtoc ti ac'o yac'beic nucule, yu'un jech ac'o loc'uc ta ye c'u yu'un ti jech ta xich' contrainel yu'un li xchi'iltaque. 25C'alal laj xa'ox xchucbeic yoc sc'ob ta nucule, li Pabloe jech laj yalbe li banquilal soldado te va'ale: —¿Me oy mantal xu' chavac'beic nucul jun roma vinic ti c'alal mu'yuc to achapanojique? —xut. 26C'alal laj ya'ay li banquilal soldadoe, jech bat yalbe li banquilal yu'une: —Nopo me c'usi chapas. Yu'un li vinique ich'bil me ta venta yu'un Roma —xut. 27Ta ora ital li banquilal soldadoe, jech la sjac'be li Pabloe: —¿Albun ca'ay me melel ti ich'bilot ta venta yu'un Romae? —xut. —Melel —xi itac'ov li Pabloe. 28Li mero banquilal soldadoe jech laj yal: —Li vu'une bats'i ep taq'uin laj cac' ti jech ich'bilun ta venta yu'un Roma lic'ote —xi. Li Pabloe jech laj yal: —Pero li vu'une ta jvoq'uebal ono'ox ich'bilun ta venta yu'un Roma —xi. 29Li soldadoetic ti c'an xa yaq'uic nucule ta ora la scomtsanic li Pabloe. Jech ec li banquilal soldadoe ixi' ti c'alal laj ya'ay voq'uem ta yosilal Roma li Pabloe, yu'un ja' laj yal mantal ti ichucbat yoc sc'obe. 30Ta yoc'omale, li mero banquilal soldadoe tsc'an cha'ay c'u yu'un ti ep ta xtic'bat smul yu'un xchi'iltac ta judioal li Pabloe, jech la sloq'ues ta chuquel. La stacan ta iq'uel li banquilal paleetique xchi'uc scotol li jchapanvanejetic ta ch'ulna yu'un judioetique. C'alal ivulique, laj yic' tal ta stojolic.


Copyright
Learn More

will be added

X\