Hechos 18

1C'alal jech ic'ot ta pasele, iloc' batel ta Atenas li Pabloe; ibat ta lum Corinto. 2Te c'ot sta ta lum Corinto jun judío vinic, Aquila sbi. Te voq'uem ta Ponto banamil. Ach' to iloq'uic ta Italia banamil xchi'uc li yajnile, Priscila sbi, yu'un laj yal mantal muc'ta ajvalil Claudio ta Roma ti ac'o loq'uicuc scotol li judioetique. Jech ibat svu'lan li Pabloe. 3Ta sventa ti co'ol yabtelique, jech te la xchi'in sbaic ta naclej; te co'ol i'abtejic. Li yabtelique ja' ta sts'isic nucul sventa carpanaetic. 4Ta jujun sc'ac'alil ta xcux yo'ntonique ibat ta nail tsobobbail li Pabloe; te la xchi'in ta lo'il li judioetique xchi'uc li yanlumetique, yu'un oy ta yo'nton chac'be sutes yo'ntonic. 5C'alal iloq'uic tal ta Macedonia li Silas xchi'uc Timoteoe, te italic ta Corinto. Li Pabloe te yac'ojbe yipal xcholel sc'op Dios. Jamal laj yalbe judioetic ti ja' Cristo li Jesuse. 6Pero li israeletique lic scontrainic, lic chopolc'optaic. Jech te la slilin sc'u' ta stojolic, jech laj yalbe: —Te chacuch comel atuquic li amulique. Li vu'une mu'yuc jmul. Tana li'i ja' te chibat ta stojol li yanlum cristianoetic ti mu xotquinic Diose —xut. 7Jech iloc' batel ta nail tsobobbail li Pabloe; ibat ta sna jun vinic, Ticio Justo sbi. Ja' lec yich'oj ta muc' Dios. Te oy sna ta sts'el nail tsobobbail. 8Te oy jun vinic, Crispo sbi; ja' banquilal te ta nail tsobobbail. La xch'unic Cajvaltic scotolic te ta sjunul sna. Ep Corinto cristianoetic la xch'unic noxtoc, jech te laj yich'ic vo'. 9Ja' yu'un li Cajvaltique ta ac'ubaltic laj yac' sba ta ilel ta stojol li Pabloe, jech laj yalbe: “Mu me xaxi'. Cholo ono'ox li jc'ope; mu me xacomtsan xcholel. 10Vu'un ta jchi'inot. Me junuc mu'yuc boch'o xu' chac' sc'ob ta atojol sventa oy c'usi chaspasbicot, yu'un oy ep cu'untac li' ta lume”, x'utat. 11Jech te ijoc'tsaj o'lol xchibal jabil li Pabloe; te ichanubtasvan ta sc'op Dios. 12Pero c'alal i'och ta ajvalilal ta Acaya banamil li Galione, li judioetique jmoj lic stsob sbaic ta scontrainel li Pabloe. Laj yiq'uic batel ta stojol li ajvalile, 13jech c'ot yalbeic: —Li vinic li'i mu'yuc lec c'u x'elan chac'be yich' ta muc' Dios li cristianoetique; ja' tscontrain li mantaletic yu'un Romae —xiic. 14C'alal ta ox xlic c'opojuc li Pabloe, li Galione jech lic yalbe li judioetique: —Judioetic, ti yu'unuc oy smule, xchi'uc ti oyuc c'usi tsots la spase, xu' ta xca'iboxuc lec ac'opic ti jechuque. 15Pero me ta sventa no'ox c'usitic c'opal, c'usi biiletic, xchi'uc me ta sventa no'ox mantal avu'un atuquique, te q'uelo atuquic. Li vu'une mu jc'an jtic' jba ta xchapanel —xi. 16Jech la stacan loq'uel ta spasubmantal. 17Pero li yanlumetique la stsaquic jun israel vinic, Sóstenes sbi. Ja' banquilal te ta nail tsobobbail yu'un li israeletique. La smajic te ta yeloval spasub mantal li ajvalile. Pero li Galione muc stuc'ulan. 18Li Pabloe ep to c'ac'al te icom ta Corinto. Ts'acal to la sc'opan comel scotol li jch'unolajeletique; iloc' batel, bat stsac barco, yu'un tsut batel ta Siria banamil. Te la xchi'in batel li Aquila xchi'uc Priscilae. C'alal mu'yuc to'ox tstsac sbarco te ta Cencreae, laj yac' ta loq'uel sjol, yu'un laj xa spas li c'usi yaloj ta stojol Dios tspase. 19C'alal ic'otic ta lum Efesoe, te la scomtsan li Aquila xchi'uc Priscilae. Li stuque bat ochuc ta nail tsobobbail li Pabloe. Te la stsaquilan sbaic ta lo'il xchi'uc li judioetique. 20Li Aquila xchi'uc Priscilae la sc'anbeic vocol Pablo ti te to ac'o comuc ep c'ac'ale, pero li Pabloe muc xch'un. 21La sc'opan comel, jech laj yalbe: “Ta yan velta ta xtal jq'ueloxuc me jech la sc'an Diose”, xut. Jech i'och ta barco, iloc' batel ta Éfeso. 22C'alal iloc' ta barco ta lum Cesarea li Pabloe, te ibat sc'opan li jtsob jch'unolajeletic ta Jerusalene. Ts'acal to ibat ta Antioquía. 23Te ijoc'tsaj jayibuc c'ac'al. Ts'acal to iloc' batel, xquechet bat sq'uel scotol li jch'unolajeletic ta jujun lum ta Galacia banamil xchi'uc ta Frigia banamile. La stsatsubtasbe lec comel yo'ntonic ta stojol Dios. 24Ja'o te ic'ot ta Éfeso jun judío vinic, Apolos sbi, liquem ta lum Alejandría. Lec sna' xlo'ilaj, xchi'uc lec xchanoj sc'op Dios. 25Lec chanubtasbil ta sventa c'usitic tsc'an li Cajvaltique. Ta scotol yo'nton ta xcholilan, xchi'uc lec jamal chchanubtasvan ta sventa li Jesuse, ac'o me ja' to no'ox ya'yojbe sc'oplal li ich' vo' laj yac' Juane. 26Tsots yo'nton jamal la xchol ta nail tsobobbail. C'alal laj ya'yic li Aquila xchi'uc Priscilae, slecoj laj yiq'uic loq'uel, jech te i'albat lec smelol c'usitic tsc'an li Diose. 27Li Apolose tsc'an ta xbat ta Acaya banamil. Li jch'unolajeletique lec laj ya'yic ti te ta xbate. Jech la sts'ibabeic batel carta li jch'unolajeletique, yu'un ac'o yich'ic ta muc' li Apolose. C'alal ic'ot ta Acaya banamil li Apolose, lec itun yu'unic li jch'unolajeletic ti xch'unojic xa ta sventa slequil yo'nton Diose. 28Yu'un tsots yo'nton jamal laj yac' ta ilel ta satilal ti mu jechuc c'u x'elan xch'unojic li xchi'iltac ta judioale. Laj yac'be yilic bu ts'ibabil ta sc'op Dios ti ja' Cristo li Jesuse.


Copyright
Learn More

will be added

X\