Hechos 17

1Li Pablo xchi'uc Silase te ijelovic batel ta lum Anfípolis xchi'uc ta lum Apolónia. Te ic'otic ta lum Tesalónica yo' bu oy jun nail tsobobbail yu'un li judioetique. 2Li Pabloe jech stalel o ti ta xbat ta nail tsobobbaile, jech bat ochuc oxib velta ta nail tsobobbail ti c'alal yorail ta xcux yo'ntonique. Te la stsac sbaic ta lo'il ta sventa sc'op Dios xchi'uc li xchi'iltaque. 3Laj yac'be yil, laj yac'be lec sna'ic ti jech ono'ox ts'ibabil ta sc'op Dios ti ta persa ta xich' vocol li Cristoe, xchi'uc ti ta persa ta xcha'cuxie. Jech laj yalbe: —Ja' li Jesús ti li' chacalboxuc sc'oplale, ja' li Cristoe —xut. 4Oy jayibuc israeletic la xch'unic Cajvaltic, jech la xchi'inic li Pablo xchi'uc Silase. Xchi'uc ep yanlum cristianoetic la xch'unic ec ti yich'ojic ono'ox ta muc' Diose. Xchi'uc ep antsetic lec ich'bilic ta muc' la xch'unic noxtoc. 5Pero li judioetic ti mu xch'unique ven it'ix yo'ntonic. Jech la stsobic jayibuc chopol viniquetic ti te no'ox xva'etic ta ch'ivite. C'alal ep xa stsoboj sbaique, lic socbeic sjol scotol li cristianoetic te ta lume. Jech scotolic ibatic ta sna jun vinic Jasón, yu'un tsc'an ta snitic loq'uel li Pablo xchi'uc Silase, yu'un chbat yaq'uic ta sc'ob li cristianoetique. 6Pero mu'yuc te la staic, ja' yu'un ja' la stsaquic tal li Jasone xchi'uc jayibuc jch'unolajeletic. C'ot yaq'uic ta stojol li j'abteletic te ta lume. Tsots i'avanic, jech laj yalic: —Oy viniquetic ti ja' ta socbeic sjol cristianoetic ta sbejel banamile; vulemic xa li' ta jlumaltic noxtoc. 7Li Jasón li'i laj yic' ochel ta sna. Scotolic mu sc'an xch'unic mantal yu'un li Cesare, yu'un chalic ti oy yan muc'ta ajvalile, ja' la Jesús sbi —xiic. 8C'alal laj ya'yic scotol li cristianoetique xchi'uc li j'abteletic te ta lume, iliquic ta vochlajetel scotolic. 9Pero li Jasón xchi'uc xchi'iltaque laj yaq'uic taq'uin, jech icoltaatic batel. 10Li jch'unolajeletique ta ora no'ox la staquic batel ta ac'ubaltic ta lum Berea li Pablo xchi'uc Silase. C'alal ic'otic ta Bereae, te i'ochic ta nail tsobobbail yu'un li judioetique. 11Li israeletic te ta Bereae ja' lec yo'ntonic. Mu jechuc yo'ntonic jech chac c'u cha'al li israeletic ta Tesalonicae. Yu'un ta scotol yo'ntonic laj ya'ibeic sc'op li Pabloe. Scotol c'ac'al la sq'uelic li sc'op Diose, yu'un tsq'uelic me xco'laj xchi'uc c'usi ta xchol li Pabloe. 12Jech ep israeletic la xch'unic, xchi'uc ep greciaetic la xch'unic noxtoc. Ep antsetic lec ich'bilic ta muc' la xch'unic ec, xchi'uc ep viniquetic la xch'unic noxtoc. 13Li judioetic te ta Tesalonicae laj ya'yic ti te xa ta xchol sc'op Dios ta Berea noxtoc li Pabloe, jech bat socbeic yo'nton noxtoc li cristianoetic te ta Bereae. 14Li jch'unolajeletique ta ora la staquic batel ta ti'nab li Pabloe. Yan li Silas xchi'uc Timoteoe te icomic ta Berea. 15Li boch'otic ay yaq'uic li Pabloe te to ay yaq'uic comel ta lum Atenas. C'alal tsutic xa'oxe, laj yich'ic tacbel batel mantal yu'un Pablo ti ac'o c'ot yalbeic Silas xchi'uc Timoteo ti ac'o baticuc ta ora yo' bu oy li Pabloe. Jech isutic batel. 16C'alal te chmalavan ta Atenas li Pabloe, chopol yo'nton laj ya'ay c'alal laj yil ti puru loc'ometic scuyoj ta sdiosic li cristianoetic te ta lume. 17Jech te la stsac sbaic ta lo'il ta sventa sc'op Dios xchi'uc li xchi'iltaque xchi'uc li yanlumetic ti yich'ojic ta muc' Diose. Jujun c'ac'al laj yalbe sc'op Dios li boch'otic te la sta ta ch'ivite. 18Jech noxtoc oy jayibuc jchanubtasvanejetic yu'un epicuroetic xchi'uc jchanubtasvanejetic yu'un estoicoetic la stsac sbaic ta lo'il xchi'uc li Pabloe. Oy jayibuc jech laj yalic: —¿C'usi chal li chochob-e vinic le'e? —xiic. Oy yantic jech laj yalic: —Ja' jcholc'op yu'un yan diosetic yilel —xiic. Yu'un li Pabloe ja' la xcholbe sc'oplal li Jesuse, xchi'uc laj yalbe sc'oplal ti icha'cuxie. 19Jech laj yiq'uic batel ta Areópago li Pabloe. Jech laj yalbeic: —¿Me xu' chavalbun ca'icutic ec li c'usi ach' chachanubtasvan oe? 20Yu'un yan to ta a'yel chca'icutic, ja' yu'un ta jc'an chca'ibecutic smelol —xiic. 22Ja' yu'un li Pabloe lic sva'an sba ta o'lol yo' bu stsoboj sbaic ta Areopagoe. Jech laj yalbe: “Atenas viniquetic, ta xquil ti scotol avo'ntonic chac'an chavich'ic ta muc' diosetique. 23Yu'un c'alal lixanov li' ta alumalique, laj quil ti ep c'usitic chavich'ic ta muq'ue. Laj quil noxtoc jun scajleb matanal, jech ts'ibabil chac li'i: ‘JA' SCAJLEB SMOTON LI DIOS TI MU XCOTQUINTIQUE’, xi ts'ibabil. Li Dios ti chavac'beic smoton ti mu xavotquinique, ja' chacalboxuc ava'yic sc'oplal li vu'une. 24“Li Dios ti la spas banamil xchi'uc scotol c'usitic oye ja' yajval li vinajel banamile. Jech mu xnaqui ta ch'ulnaetic pasbil ta sc'ob cristianoetic. 25Muc vu'uticuc ta xcac'betic li c'usi sc'an yu'une. Li stuque ja' ta xac' chijcuxiutic, xchi'uc ja' ta xac' quich'tic ic'. Ja' ta xac'butic scotol. 26“Li Diose jchop no'ox sts'unubal la spas li jaychop cristianoetique, yu'un jech ac'o naquiicuc ta scotol banamil. Xchi'uc bisbil yu'un c'u sjalil yorailic ta jujuchop, xchi'uc chapanbil yu'un bu c'alal yosilalic ta jujuchop. 27Yu'un ti la spas cristianoetic li Diose, yu'un jech ac'o sa'ic li Diose. Me ta sa'ilan ya'yique, xu' ta staic. Yu'un li Diose mu nomuc oy ta jtojoltic jujunutic. 28Yu'un ja' ta sventa ti cuxulutique xchi'uc ti ta jpastic c'usi ta jpastique xchi'uc ti li' oyutic ta sba banamile. Jech chac c'u cha'al laj yalic jayibuc bijil viniquetic avu'unique: ‘Vu'utic xnich'nabutic li Diose’, xiic. 29Ta melel xnich'nabutic li Diose, jech mu xu' ta jnoptic ti ja' Jch'ultotic li c'usitic pasbil ta c'anal taq'uin, ta saquil taq'uin, xchi'uc li c'usitic pasbil ta tone. Yu'un le'e yabtel no'ox cristiano; la snop no'ox stuquic ti jech la spasique. 30Ta vo'onee muc to'ox xac' ta venta c'u x'elan sbol talelic li cristianoetique. Pero li' ta orae oy mantal yu'un Dios ta sventa scotol cristianoetic buyuc no'ox oyic ti ac'o sutes yo'ntonic ta stojol Diose. 31Yu'un li Diose sa'ojbe xa jun sc'ac'alil c'usi ora ta xich'ic chapanel scotol li cristianoetic ta banamile. Tuc' ta xchapanatic ta sventa ti c'u x'elan la spasic jujunique. Ac'bil xa ta ilel li boch'o ta xchapanvane, yu'un icha'cuxesat xa loq'uel ta smuquinal yu'un li Diose”, xi li Pabloe. 32C'alal laj ya'ibeic sc'oplal ti oy boch'o cha'cuxeme, oy jayibuc ja' no'ox ilabanvanic. Oy yantic jech laj yalic: —Ta yan velta xu' ta xca'icutic noxtoc li c'usi laj avale —xutic. 33Jech iloc' batel li Pabloe. 34Oy jayibuc la xch'unic, jech la xchi'inic batel li Pabloe. Oy jun vinic la xch'un, Dionisio sbi. Ja' jun li boch'o te tstsob sbaic ta Areopagoe. Oy jun ants la xch'un noxtoc, ja' Dámaris sbi. Oy to yantic la xch'unic noxtoc.


Copyright
Learn More

will be added

X\