Hechos 15

1Oy jayibuc viniquetic iliquic batel ta Judea banamil, jech c'ot yalbeic li jch'unolajeletic ta Antioquiae: “Me mu xavich'ic circuncisión jech chac c'u cha'al laj yal li Moisese, mu xacolic”, xutic. 2Li Pablo xchi'uc Bernabee ep ilo'ilajic; ep lic spasic c'op xchi'uc li viniquetic le'e. Jech la snopic ti ja' lec tstaquic batel ta Jerusalén li Pablo xchi'uc Bernabee xchi'uc jayibuc jch'unolajeletic, yu'un ac'o bat sc'opanic li yajtacbolaltac Jesús xchi'uc jcholc'opetique, yu'un jech xu' chchapaj li a'yeje. 3Jech itacatic batel yu'un li jtsob jch'unolajeletic ta Antioquiae. Te ijelovic batel ta Fenicia banamil xchi'uc ta Samaria banamil. Ech' yalbeic jch'unolajeletic ti laj xa sutes yo'ntonic ta stojol Dios ec li yanlum cristianoetic ti mu xotquinic Diose. C'alal laj ya'yique, toj xcuxet no'ox yo'ntonic. 4C'alal ic'otic ta Jerusalene, lec ch'ambil ta be ic'otic yu'un li jch'unolajeletique xchi'uc li jcholc'opetique xchi'uc li yajtacbolaltac Jesuse. Li Pablo xchi'uc Bernabee lic yalic scotol li c'usitic la spas Dios ta sventaique. 5Te oy jayibuc jch'unolajeletic ti xch'unojic to fariseoe, la sva'an sbaic, jech laj yalic: —Ta persa ta xich'ic circuncisión li jch'unolajeletic le'e, xchi'uc persa chavalbeic noxtoc ti ac'o xch'unic li smantaltac Dios laj yal Moisese —xiic. 6Jech te la stsob sbaic ta xchapanel li yajtacbolaltac Jesuse xchi'uc li banquilaletic yu'un jch'unolajeletique. 7C'alal ep xa'ox ilo'ilajique, te la sva'an sba li Pedroe, jech laj yal: —Jchi'iltac, xana'ic ti oy xa sc'ac'alil la st'ujun Dios sventa ta jcholbe ya'yic Lequil A'yej li yanlum cristianoetique, yu'un jech ac'o xch'unic ec. 8Li Dios ti xijyotquinbutic co'ntontic jcotoltique, laj yac'be yilic ti sc'anoj li yanlumetique, jech laj yac'be yich'ic Ch'ul Espíritu ec jech chac c'u cha'al laj yac'butic quich'tique. 9Li Diose co'ol la xc'uxubinutic ta jcha'chopaltic. Jech co'ol la spocbutic co'ntontic ta sventa ti laj xa jch'untique. 10Jech ¿c'u yu'un chasa'beic sc'ac'al yo'nton li Diose? Yu'un xco'laj xchi'uc chavac'beic xcuch alal icatsil li jch'unolajeletique. Chac'an chavac'beic xcuch ec li icatsil ti muc xlic yu'unic li jmoltot jyame'tic ta vo'onee, xchi'uc ti muc xlic cu'untic ec li vu'utique. 11Li vu'utique laj xa jch'untic ti ta yutsil no'ox yo'nton Cajvaltic Jesús chijcolutique; ja' no'ox jech xu' chcolic ec li stuquique —xi li Pedroe. 12Jech ich'abiic scotolic. Laj ya'yic ti laj yal Pablo xchi'uc Bernabé ti ep sq'uelubil stsatsal Dios i'ac'bat spasic ta stojol li yanlum cristianoetic ti mu xotquinic Diose. 13C'alal ilaj yo'ntonic ta lo'ile, lic c'opojuc ec li Santiagoe: —Jchi'iltac, a'yo ava'yic c'usi ta xcal. 14Li Simón Pedroe laj xa yalbutic ca'itic c'u x'elan lic ic'aticuc yu'un Dios li yanlum cristianoetic ti mu xotquinic Diose; laj xa ca'itic c'u x'elan la st'uj yu'un jech ac'o c'otuc ta steclumal. 15Yu'un ja' ono'ox jech la sts'ibaic li yaj'alc'optac Dios ta vo'onee: 16‘C'alal me la sta sc'ac'alile, li Diose ta xlic xcha'va'anbe li sna David ti vuq'uem xae; ta xcha'meltsanbe li yave, ta xcha'toy liquel yan velta. 17Yu'un jech ac'o sa'ic Dios li cristianoetic ti c'u to yepal comenique, xchi'uc jech ac'o yich'ic ta muc' Dios ec li yanlum cristianoetic ti mu xotquinic Diose, 18xi li Dios ti vo'one ono'ox laj yac' ta na'el ti jech snopoje’, xiic li j'alc'opetique. 19“Ja' yu'un li vu'une chcal ti ja' lec mu me xcac'betic svocol li yanlum cristianoetic ti laj xa sutes yo'ntonic ta stojol Diose. 20Ja' no'ox jpasbetic scartaic. Calbetic ti mu me sti'ic li c'usitic ac'bil ta smoton c'usitic cuybilic ta Diose, ti mu me xmulivajique, ti mu me sti'ic li c'usi mich'bil ta snuc' tsmilique, xchi'uc ti mu me sti'ic ch'ich'e. 21Yu'un ta vo'one ono'ox tal, ta jujun lum c'alal ja'o sc'ac'alil ta xcux yo'ntonique, ja' ono'ox ta xaptaic ta nail tsobobbailetic yu'unic li smantaltac Dios laj yal comel Moisés ta vo'onee —xi li Santiagoe. 22Ja' yu'un li yajtacbolaltac Jesús xchi'uc li jcholc'opetique xchi'uc scotol li jch'unolajeletic ta Jerusalene lec laj ya'yic. Jech la snopic ti ja' lec ac'o st'ujic jayibuc viniquetic, yu'un tstaquic batel ta Antioquía xchi'uc li Pablo xchi'uc Bernabee. Ja' la st'ujic Judas, Barsabás xchibal sbi, xchi'uc Silas. Ja' jcholc'opetic. 23Jech la spasic li cartae; ja' laj yich'ic batel li Judas xchi'uc Silase. Jech laj yalic batel ta vun: “Jchi'iltac ta sventa Cajvaltic, chabanucoxuc, vo'oxuc ti yanlum cristianooxuc te nacaloxuc ta lum Antioquía, xchi'uc ta sjunul Siria banamil, xchi'uc ta Cilicia banamile, ta jc'opanotcutic tal ta carta, vu'uncutic li yajtacbolaluncutic Jesuse, vu'uncutic li jcholc'opuncutique, xchi'uc scotol li jchi'iltactic ta jch'unolajele. 24Laj ca'icutic ti oy jayibuc jchi'iltacutic te italic ta atojolic ti li' iliquic batele. Pero muc ta jmantalcuticuc. Ja' no'ox tal yac' lo'ilajuc avo'ntonic ta sventa li c'usi laj yalboxuque. 25Ja' yu'un li' la jnopcutic ti ta jtacutic tal ta atojolic chib jchi'iltactique. Ja' ta xchi'inic tal li Bernabé xchi'uc Pablo ti lec jc'anojcutique, 26ja' ti sq'uelanoj sbec'talic ta sventa li Cajvaltic Jesucristoe. 27Ja' ta jtaccutic tal li Judase xchi'uc li Silase. Ja' chtal yalboxuc lec ta yeic noxtoc li c'usi la jnopcutique. 28Yu'un jech la sc'an Ch'ul Espíritu xchi'uc vu'uncutic ti mu'yuc ta xcac'cutic ol avicatsique. Ja' no'ox chacalbotcutic tal jech chac li'i: 29Mu me xati'ic c'usitic ac'bil ta smoton li loc'ometic ti cuybilic ta Diose, mu me xati'ic ch'ich', mu me xati'ic li c'usi mich'bil ta snuc' chchame, mu me xamulivajic. Me chach'unic scotol le'e, lec c'usi chapasic. Ja' no'ox jech chacalboxuc tal. Te ac'o xchi'inoxuc li Diose”, xiic batel ta carta. 30Jech ibatic li boch'otic it'ujatique. Te ic'otic ta Antioquía, c'ot stsobic scotol li jch'unolajeletique. Laj yac'beic li cartae. 31C'alal la sq'uelic li cartae, xcuxet ic'ot yo'ntonic ti jech i'ac'batic batel spatubil yo'ntonique. 32Li Judas xchi'uc Silase ja' j'alc'opetic yu'un Dios ec. Jech la spatbeic yo'nton li jch'unolajeletique; itsatsub comel lec yo'nton yu'unic ta sventa ti ep la xchi'inic ta lo'ile. 33Te ijoc'tsajic jayibuc c'ac'al. Ts'acal to jech i'albatic yu'un li jch'unolajeletique: —Lec oy, junuc avo'nton sutanic batel ta stojol li boch'o la stacoxuc tale —x'utatic. 35Li Pablo xchi'uc Bernabee te icomic ta Antioquía ec. Te ichanubtasvanic, la xcholic Lequil A'yej ta sventa Cajvaltic. Oy ep boch'otic yan la xcholic noxtoc. 36C'alal i'ech' jayibuc c'ac'ale, li Pabloe jech laj yalbe li Bernabee: —Bat jvu'lantic yan velta li jch'unolajeletic ta scotol lumetic ti bu la jcholbetic sc'op Cajvaltique. Bat jq'ueltic c'u x'elanic —xut. 37Li Bernabee tsc'an ta xic' batel li Juane, ja' li Marcos xchibal sbie. 38Pero li Pabloe muc sc'an xic' batel. Yu'un c'alal te oyic ta Panfiliae, te la svoc' sba sutel li Marcose; muc xchi'inatic batel ta abtel. 39Ta sventa ti tsots laj yut sbaique, jech te la svoc' sbaic o. Li Bernabee laj yic' batel xchi'in li Marcose; i'ochic ta barco, ibatic ta Chipre banamil. 40Li Pabloe ja' laj yic' batel xchi'in ec li Silase. Li jch'unolajeletique la sc'anbeic Cajvaltic ti ac'o xchi'in batel li chibique, jech ibatic. 41Te ijelovic batel ta Siria banamil xchi'uc ta Cilicia banamil. Ech' stsatsubtasbeic yo'nton li jujutsob jch'unolajeletique.


Copyright
Learn More

will be added

X\