3 San Juan 1

1Vu'un jcholc'opun, chabanuc chacalbot tal Gayo, vo'ot ti lec jc'anojot ta melele. 2Vo'ot ti toj lec jc'anojote, ta jc'opanbot Dios ta atojol sventa ac'o lecuc chbat avu'un scotol, xchi'uc ti ac'o tsotsuc lec abec'tal jech chac c'u cha'al oy lec stsatsal avo'nton ta stojol Diose. 3Toj xcuxet no'ox co'nton c'alal laj ca'ay ivul yalbicun jayibuc jch'unolajeletic ti jun avo'nton ach'unoje, xchi'uc ti chapas batel c'usi chal li sc'op Dios ti ja' melele. 4Mu'yuc c'usi yan ti toj xcuxet co'nton yu'une; ja' toj xcuxet co'nton c'alal chca'ibe sc'oplal jnich'nabtac ti ja' tspasic c'usi melele. 5Vo'ot ti lec jc'anojote, lec jun avo'nton chatun yu'un li jchi'iltactic ta jch'unolajel te chc'otic ta atojole ti nom liquemic tale. 6Yu'un li stuquique c'ot yalic ta jamal ta stojol jtsob jch'unolajeletic ti toj lec laj ac'uxubine. Toj lec ti jech chacolta ta sventa sbeique. Ja' toj lec chil Dios ti jech chapase. 7Yu'un ja' ta sventa Jesucristo ti loq'uemique, mu'yuc c'usi tstaic batel ta stojol li boch'otic mu'yuc xch'unojique. 8Jech tsc'an ta jc'uxubintic li boch'o jech chanovique, yu'un co'ol ta jcolta jbatic o ta xcholel li sc'op Dios ti ja' melele. 9Oy xa c'usi la jts'ibabe tal li jtsob jch'unolajeletic tee, pero li Diotrefese muc xich' ta muc', yu'un tsc'an ti ja' chcom ta banquilal stuque. 10Ja' yu'un c'alal me litale, ta xcalbe ya'ay ti chopol c'usi tspase, yu'un chopol chalilan batel jc'oplalcutic. Mu xu' o cha'ay ti jech ta spase. Mu xic' ochel noxtoc li jch'unolajeletic te chc'otique. Li boch'otic ta xotesique ta spajes noxtoc, xchi'uc ta snutsan loq'uel ta stojol jch'unolajeletic. 11Vo'ot ti lec jc'anojote, mu me ja'uc xachan li c'usi chopol ta pasele. Ja' chano li c'usi leque. Li boch'o lec c'usi ta spasique ja' xnich'nab Dios. Yan li boch'o chopol c'usi ta spase mu xotquin li Diose. 12Scotol ta xalbeic sc'oplal ti toj lec li Demetrioe, xchi'uc lec xvinaj ta sventa li c'usi melel xch'unoje. Ja' no'ox jech ec li vu'uncutique ta xcalcutic ti ja' leque. Xana' ti ja' melel c'usi ta xcalcutique. 13Oy to ep c'usi ta jc'an ta xcalbot, pero mu jc'an ta jts'ibabot tal vun. 14Yu'un ta jc'an chtal jq'uelot ta ora, jech xu' ta jc'opan jbatic lec. 15Junuc avo'nton. Chabanuc la xayalboxuc li jch'unolajeletic li'i. Jech chabanuc xavalbeic ta jujuntal ec li jch'unolajeletic te yo' bu oyote.


Copyright
Learn More

will be added

X\