2 Timoteo 3

1Yu'un tsc'an chana' ti c'alal po'ot xa slajebal c'ac'ale ta to xlic tsots vocol. 2Yu'un li cristianoetique ja' no'ox tspasic c'usi tsc'an stuquic. Ta xbat yo'ntonic yu'un taq'uin. Tstoy sbaic. Stuc no'ox xa'ay sbaic. Yan xich' xalic. Mu xch'unbeic smantal stot sme'ic. Mu c'usi sna' stojic ta vocol. Mu'yuc ta yo'ntonic yich'el ta muc' Dios. 3Mu'yuc slequil yo'ntonic, mu'yuc xc'uxul yo'ntonic, ta sa'beic smul yantic, mu'yuc spajeb cha'yic li c'usi tsc'an yo'ntonique, solel mu xq'uexovic o, simaronijemic o ta jyalel, ja' tscontrainic o li c'usitic leque. 4Ta x'ac'vanic ta c'abal; sujoj no'ox sbaic o. Toj muc' chac' sbaic. Ja' batem ta yo'ntonic o li c'usi tsc'an stuquique; mu ja'uc tsa'ic li Diose. 5Jch'unolajel scuyoj sbaic, pero mu xaq'uic ta ilel ti oy stsatsal li Diose. Li boch'otic jech tspasique mu me xachi'in. 6Yu'un oy boch'otic yu'unic ta x'ochic ta naetic, jech te ta slo'laic o li antsetic ti c'unic ta lo'laele, ti oy sbolil yo'ntonique, ti talbat no'ox yo'ntonic yu'un li c'usi tsc'anique. 7Ja' chac' o ta yo'ntonic xchanel li c'usi ch-albatique, jech mu baq'uin xlic yotquinic o li c'usi melele. 8Ja' jech chac c'u cha'al li Janes xchi'uc Jambres ti la scontrainic li Moisese, ja' jechic ec li viniquetic le'e. Ja' ta scontrainic li c'usi melele, yu'un boliben xa o sjol yo'ntonic; me jutuc mu'yuc xch'unojic o. 9Pero mu xu' yu'unic jal jech ta spasic. Yu'un li sbolilique ta xlic yotquinic scotol cristianoetic, jech chac c'u cha'al ic'ot ta pasel yu'un li chib viniquetic le'e. 10Pero li vo'ote, ja' ach'unoj ti c'u x'elan lichanubtasvane, ti c'u x'elan jtalele, li c'usi oy ta co'ntone, ti c'u x'elan jch'unoje, li smuc'ul co'ntone, ti lec chic'anvane, xchi'uc ti chcuch cu'un scotole, 11xchi'uc ti c'u x'elan icuch cu'un scotol uts'intael xchi'uc vocole. Ana'oj c'u x'elan lipasbat ta AntioquĂ­a, ta Iconio, xchi'uc ta Listra. Yan to sba li uts'intael laj quich'e, pero ja' Cajvaltic la scoltaun scotol. 12Yu'un li boch'o scotol yo'nton chtun o yu'un li Jesucristoe ta ono'ox xich' ep uts'intael. 13Yan li boch'otic toj chopolique xchi'uc li jlo'lavanejetique, yo'to ech'em ta soquic o batel. Ta xlo'lavanic, pero jech lo'labil stuquic ec. 14Pero li vo'ote ja' me tamo o batel li c'usi laj achane. Yu'un xana' lec ti ja' melele, xchi'uc xana' lec c'u x'elan li boch'o la xchanubtasote. 15Yu'un ta abic'tal ono'ox laj avotquin li sc'op Dios ts'ibabile; jech labijub, jech chacol ta sventa ti laj ach'un li Jesucristoe. 16Yu'un scotol li sc'op Dios ts'ibabil comele ja' laj yac' ta na'el ta sventa svu'el stuc li Diose. Jech lec chtun ta sventa chanubtasel, ta sventa taq'uiel, ta sventa tuq'uibtasel, xchi'uc ta sventa bijubtasel ta spasel c'usi tuc'. 17Jech chijbijub vu'utic ti jch'unolajelutic yu'un Diose, jech lec chapalutic ta spasel scotol lequil abtel.


Copyright
Learn More

will be added

X\