2 San Pedro 1

1Vu'un Simón Pedroun, vu'un yajtunelun xchi'uc yajtacbolalun li Jesucristoe, chabanuc chacalboxuc tal, vo'oxuc ti ach'unojic xa Cajvaltique, ja' ti toj jun yutsil jech chac c'u cha'al jch'unojcutique. Ti Jech la jch'untique, ja' ta sventa ti tuc' c'usi tspas li Diose xchi'uc li Jcoltavanej cu'untique. 2Ac'o ataic ep c'uxubinel, xchi'uc ac'o junuc o avo'ntonic ta sventa ti laj xa avotquinic li Diose xchi'uc li Cajvaltic Jesucristoe. 3Ta sventa ti laj xa cotquintic li Dios ti laj yic'utic ta svu'el stsatsale, jech laj xa yac'butic scotol c'usitic ta xtun cu'untic sventa chijcuxiutic, xchi'uc sventa chquich'tic ta muc'. 4Jech laj xa yac'butic li c'usi toj jun yutsile ti toj muq'ue ti sc'oplal ono'ox chijyac'butique, jech xu' xa chavich'beic batel stalel li Diose, jech xu' chaloq'uic ta sventa li c'usitic toj chopol li' ta banamil ti xpich'et co'ntontic yu'une. 5Jech ma'uc no'ox tsc'an ti oy xch'unojel avo'ntonique; tsc'an noxtoc ti scotol avo'ntonic chavaq'uic persa spasel li c'usi leque. Me chavaq'uic persa spasel li c'usi leque, chlic jamuc lec asatic. 6Me labijubique, xu' avu'un chapajes aba atuquic. Me xu' avu'un chapajes aba atuquique, ch-ayin smuc'ul avo'ntonic. Me i'ayin smuc'ul avo'ntonique, jun avo'nton chavich'ic ta muc' Dios. 7Me jun avo'nton chavich'ic ta muc' Diose, chac'an li achi'iltaquique. Me ac'anoj li achi'iltaquique, oy xa c'anvanej ta avo'ntonic. 8Me laj xa ataic scotol jech chac le'e, me ch-epaj batel avu'unique, oy atuic, jech chvinaj ta avabtelic ti ta melel mu alticuc laj avotquinic li Cajvaltic Jesucristoe. 9Pero li boch'otic mu jechuc ta spase, ja' jechic jech chac c'u cha'al ma'sat ti mu xc'ot sat ta nome, yu'un ich'ay xa ta yo'ntonic ti ipocbat loq'uel li smul la spasic ta vo'onee. 10Ja' yu'un quermanotac, aq'uic persa ti jechuc o avo'ntonique ti j'ech'el ac'o ach'unic o ti ic'biloxuc, ti t'ujbiloxuc yu'un Diose. Me jech chapasique, me jutuc mu xayalic o ta lum. 11Jech lec jamal ti'na ta aventaic, jech ta jbel sc'oplal cha'ochic yo' bu chventainvan sbatel osil li Cajvaltique, ja' li Jesucristo Jcoltavanej cu'untique. 12Ja' yu'un mu xlaj co'nton ta jvulesboxuc ta avo'ntonic scotol le'e, ac'o me ana'ojic xa lec, ac'o me j'ech'el ach'unojic o li c'usi melele. 13Yu'un ti c'alal li' to cuxulune, jech co'nton o chajt'abilanboxuc ta avo'ntonic. 14Yu'un laj xa yac'bun jna' Cajvaltic Jesucristo ti po'ot xa chcom li jbec'tal li'i. 15Pero chcac' persa ta jpas ti bu c'alal xu' cu'une, yu'un jech xu' chavules ta avo'ntonic scotol c'usitic laj calboxuc ti c'alal chamenun xa'oxe. 16C'alal laj calcutic ava'yic c'u x'elan svu'el li Cajvaltic Jesucristoe xchi'uc ti c'u x'elan ta xcha'tale, muc lo'iluc no'ox la jch'uncutic, muc nopbiluc no'ox. Laj quil ta jsat jtuccutic c'u x'elan li smuc'ul stsatsale. 17Yu'un te oyuncutic ti c'alal i'ac'at ta ich'el ta muq'ue ti i'ac'bat slequil yutsilal yu'un Jtotic Diose. Ivinaj tal c'op ta stojol c'alal to ta lequilal: “Li'i ja' Jnich'on, lec jc'anoj, lec jpatoj co'nton yu'un”, xi. 18Laj ca'ay ta jchiquin jtuccutic ti jech ic'opoj tal ta vinajele, yu'un co'ol te oyuncutic xchi'uc Jesús ta sjol ch'ul vits. 19Jech ta jna'tic o ti ja' melel c'usi laj yalic comel li yaj'alc'optac Dios ta vo'onee. Jech tsc'an j'ech'el ac'o ach'unic o ta scotol avo'ntonic. Yu'un ja' chtun cu'untic jech chac c'u cha'al candil ti tsacubtas li ic' osil c'alal to tsacub osile, xchi'uc c'alal to chloc' tal li muc'ta c'anal sventa chac' xojobal ta avo'ntonique. 20Tsc'an chana'ic lec ba'yuc li'i: Scotol li sc'op Dios ts'ibabile mu'yuc boch'o xu' tsloq'uesbe smelol ta stuc no'ox. 21Yu'un li sc'op Diose mu ta yo'ntonuc cristiano iloc' tal. Ja' iventainatic yu'un Ch'ul Espíritu. Ja' viniquetic ic'opojic ta sventa Dios.


Copyright
Learn More

will be added

X\