2 Corintios 9

1Ta sventa li scoltael yan yu'untac Diose, mu xa persauc ta jts'ibaboxuc tal, 2yu'un xcotquin xa ti oy slequil avo'ntonique. Jech scotol co'nton laj calbe ac'oplalic li jch'unolajeletic li' ta Macedonia banamile. Laj calbeic ti ech' jabil no'ox chapaloxuc chavaq'uic coltael, vo'oxuc ti te oyoxuc ta Acaya banamile. C'alal laj ya'yic ti toj jun avo'nton chapasique, jech ep boch'otic ic'ot ta yo'nton tspasic ec. 3Ja' yu'un ta jtac tal ta atojolic li oxib quermanotique, yu'un jech mu alticuc chc'ot ti toj jun co'nton laj calbecutic ac'oplalic li jch'unolajeletique, yu'un jech chapal avu'unic jech chac c'u cha'al calojcutic ac'oplalique. 4Yu'un me la jchi'in tal jayibuc jch'unolajeletic li' ta Macedonia banamile, vu'un chcac'be jba q'uexlal me mu'yuc chapal avu'unique. Ma'uc chcal ti vo'oxuc chaq'uexovique, yu'un scotol co'nton calojbe ac'oplalic li jch'unolajeletic li'i. 5Ja' yu'un la jnop ti ja' lec ta jtac jelovel tal li quermanotique yu'un jech chchapaj avu'unic li taq'uin ti avaloj chatsobique. Jech chvinaj ti yutsil avo'nton laj anop atuquic chavaq'uique, ti muc vu'ucun la jsujoxuque. 6Na'ic me, li boch'o jutuc no'ox tsts'une jutuc no'ox tsc'aj. Li boch'o ep tsts'une ep tsc'aj. 7Jech jujunoxuc aq'uic ti c'u yepal chloc' ta avo'ntonique. Mu me ta chibeteluc; mu me ta sujeluc xavaq'uic. Yu'un ja' chc'anat yu'un Dios li boch'o xcuxet no'ox yo'nton chaq'ue. 8Yu'un li Diose xu' yu'un chayepajesboxuc scotol li c'usitic yac'ojboxuque. Jech ch-epaj li c'usi oy avu'unique; mu'yuc c'usi yan sc'an avu'unic. Jech xu' avu'un chapasilanic o lequil abtel. 9Yu'un jech ts'ibabil ta sc'op Dios: “La svoc' li c'usi oy yu'une, laj yac'be me'onetic; li slequil stuq'uil yo'ntone mu xlaj sc'oplal o sbatel osil”, xi ts'ibabil. 10Li Dios ti chac'be sts'unubal c'usi chich' ts'unele, xchi'uc ti ja' chac' c'usitic chich' ve'ele, ja' chayac'boxuc, chayepajesboxuc noxtoc li c'usi chats'unic ta stojole, xchi'uc chayepajesboxuc sat li c'usitic chapasic ta slequil yutsil avo'ntonique. 11Jech jc'ulej chac'otic ta sventa scotol, jech ech'em to ch-ayin yutsil avo'ntonic. Ta sventa li yutsil avo'ntonique, ep chlic yich' tojbel ta vocol Dios, yu'un chquich'cutic batel li coltael chavaq'uique. 12Ta sventa li coltael chquich'beic batele, ma'uc no'ox tsta c'usi sc'an yu'unic li boch'otic voc'bilic yu'un Dios ti oy svocolique; ja' sventa ep chich' tojbel ta vocol noxtoc li Diose. 13Ta sventa li coltael tstaique, chlic yalbeic slequilal Dios ta sventa ti lec chach'unic c'usi chal li Lequil A'yej ta sventa Cristoe, xchi'uc ta sventa ti toj ep yutsil avo'ntonic ta stojolique xchi'uc ta stojol li yantique. 14Jech tsc'opanic Dios ta atojolic, yu'un toj ep sc'anojoxuc ta sventa ti ep slequil avo'ntonic laj yac'boxuc li Diose. 15Bats'i coliyal Dios ti mu xlaj ta alel c'u yepal li matanal yac'ojbutique.


Copyright
Learn More

will be added

X\