2 Corintios 8

1Li' ta orae quermanotac, ta jc'an chacalbotcutic ti ivinaj xa slequil yo'nton Dios ta stojolic li jujutsob jch'unolajeletic li' ta Macedonia banamile. 2Yu'un c'alal ja'o oy ep svocolique, yo'to ital ep xcuxetel yo'ntonic. C'alal ja'o ipasic ta me'on ta scoj li vocole, yo'to i'ayin ep slequil yo'ntonic. 3Yu'un laj quil jtuc ti scotol yo'nton laj yaq'uic ti c'u yepal xu' yu'un jujunique. Bats'i ep laj yaq'uic; solel ijelov to ti bu c'alal yipal yu'unique. 4Ja' stuquic lic sc'anbicun vocol me xu' chcac'be spasic li jun abtel sventa tscoltaic li yantic yu'untac Diose. 5Toj ech'em ep laj yaq'uic jech chac c'u cha'al jnopojcutique. Yu'un ba'yuc laj yac' sbaic ta stojol li Cajvaltique; ts'acal laj yac' sbaic ta jtojolcutic ec jech chac c'u cha'al tsc'an li Diose. 6Ja' yu'un la jc'anbecutic vocol Tito ti ac'o tal svu'es stsobel jech chac c'u cha'al la sliques te ta atojolique, ti ta yutsil avo'nton laj aliquesique. 7Yu'un li vo'oxuque ataojic xa scotol. Oy xch'unojel avo'ntonic, lec xu' avu'un chac'opojic, oy lec abijilic, oy ta avo'nton chapasic scotol, xchi'uc laj xa achanic c'anvanej ta jventacutic. Ja' yu'un ja'uc me jech ep slequil avo'ntonic ta stsobel noxtoc li coltael chavaq'uique. 8Mu yu'unuc ta jpasoxuc ta mantal. Ja' no'ox ta jc'an ta jq'uel me oy ta avo'nton chacoltavanic, xchi'uc me ta melel chac'anvanic ec li vo'oxuque. 9Yu'un xavotquinbeic xa c'u x'elan slequil yo'nton li Cajvaltic Jesucristoe. Li stuque toj c'ulej, pero la spas sba ta me'on, yu'un jech vu'utic la yac'butic jc'ulejaltic. 10Chacalboxuc ava'yic li c'usi lec ac'o apasique. Li vo'oxuque ba'yuc laj aliquesic stsobel li taq'uine; ech' jabil no'ox laj aliquesic. Ma'uc no'ox laj anopic jutuc ti chapasique; scotol avo'ntonic laj aliquesic o. 11Ja' yu'un tsc'an chavu'esic o spasel. Jech chac c'u cha'al oy ta avo'ntonic chac'an chapasic ox ta anile, ja' jech oyuc ta avo'ntonic vu'esic ta ora noxtoc, ja' ti c'u yepal c'usi oy avu'unic jujunoxuque. 12Yu'un me yutsil co'nton chcac'tic jech chac c'u cha'al yepal oy cu'untique, lec tsacbil chc'ot. Yu'un mu ja'uc chisc'anbutic li c'usi mu'yuc cu'untique. 13Ti jech chacalboxuque, mu yu'unuc ta jc'an ja' ac'o staic ep c'usi oy yu'unic, yu'un jech vo'oxuc abul aba chacomic. Ja' no'ox ta jc'an ti co'oluc mu'yuc avocol acotolique. 14Yu'un li' ta orae oy ep c'usi oy avu'unic li vo'oxuque, jech ac'o tunuc yu'unic ec li boch'o mu'yuc c'usi oy yu'unique. C'alal me ja'o oy ep c'usi oy yu'unic eq'ue, xu' chayac'boxuc ec ti c'alal ja'o vo'oxuc mu'yuc c'usi oy avu'unique. Yu'un jech co'ol oy c'usi oy avu'unic. 15Ja' jech chc'ot jech chac c'u cha'al ts'ibabil ta sc'op Diose: “Li boch'o ep la stsobe mu'yuc spas sobrail yu'un. Li boch'o mu'yuc ep la stsobe mu'yuc c'usi sc'an laj ya'ay”, xi ts'ibabil. 16Coliyal Dios ti laj yac'be ta yo'nton Tito jech chac c'u cha'al co'nton ta atojolique. 17Jech la xch'un ti c'alal laj calbe ac'o taluque. Pero ta sventa noxtoc ti te oy yo'nton ta atojolique, jech stuc la snop ti chtal sq'ueloxuque. 18Ja' chcac'becutic xchi'in tal jun jch'unolajel ti lec sc'oplal yu'un scotol steclumal Cristoe, ti otquinbil ti ja' yabtel xcholel li Lequil A'yej ta sventa Cajvaltique. 19Jech noxtoc ja' t'ujbil yu'un steclumal Cristo sventa ta jchi'in batel c'alal chbat cac' li taq'uin chatsobic ti la jliquescutic stsobel ta atojolic sventa ch-ich'at ta muc' li Cajvaltique, xchi'uc sventa chvinaj ti oy slequil co'ntontique. 20Yu'un jech mu'yuc boch'o xu' chisa'bun jmulcutic ta sventa li smoton Dios chquich'cutic batele, yu'un ep li taq'uin chbat cac'cutique. 21Yu'un ta jc'an lec tuc' ac'o batuc scotol li c'usitic ta jpase. Ma'uc no'ox ta jc'an lec chil li Diose; ja' ta jc'an lec chil noxtoc li cristianoetique. 22Jech noxtoc ta xcac'becutic xchi'inic tal jun jch'unolajel ti ep xa ta velta quilojbecutic c'u x'elan yo'ntone, xchi'uc ti xcotquincutic xa lec ta sventa c'usitic tspase. Li' ta orae solel oy ta yo'nton chtal, yu'un toj jun yo'nton cha'ay ta aventaic. 23Yan li Titoe xana'ic ti ja' jchi'ile xchi'uc ti co'ol li'abtejcutic te ta atojolique. Jech noxtoc li chib quermanotic ta xchi'in tale, xana'ic xa ti ja' t'ujbilic yu'un steclumal Cristoe, lec ich'bil ta muc' Cristo ta sventaic. 24Ja' yu'un aq'uic me ta ilel ti ac'anojic li quermanotic te chtalique, yu'un jech tsna'ic scotol li jujutsob jch'unolajeletic bu liquemic tale. Xchi'uc jech mu alticuc chc'ot ti lec caloj ac'oplalique.


Copyright
Learn More

will be added

X\