2 Corintios 11

1Lec ti oyuc c'uxi ats'icbicun jutuc ec ti chcal jbolil jtuque; avocolicuc ts'icbicun jutuc. 2Ti jech toj juteb co'nton ta atojolique ja' ta sventa li Diose. Yu'un jun no'ox vinic laj cac' amalinic ya'yel, ja' yu'un tsots sc'oplal chca'ay ti chc'ot jva'anoxuc ta stojol Cristo jech chac c'u cha'al jun tojol tsebe. 3Ja' chixi' me chalo'laatic jech chac c'u cha'al ilo'laat yu'un chon li Evae, yu'un toj bij c'u x'elan ilo'lavan li chone. Jech chlic yanijuc avo'ntonic, mu xa junuc avo'ntonic ta stojol li Cristoe. 4Yu'un c'alal oy boch'o yan chc'ot yalboxuc sc'oplal Jesús ti mu xco'laj xchi'uc jech chac c'u cha'al laj calboxuque, o me chayalboxuc sc'oplal Ch'ul Espíritu ti mu xco'laj xchi'uc jech chac c'u cha'al sc'oplal li Ch'ul Espíritu avich'ojique, o me chayalboxuc yan lequil a'yej ti mu xco'laj xchi'uc li Lequil A'yej ach'unojique, ja' lec chava'yic. 5Pero li vu'une mu'yuc bu biq'uit c'otemun yu'unic chca'ay li muc'tiquil jcholc'opetic avich'ojic ta muq'ue. 6Ac'o me jeche' no'ox xi'alet chic'opoj chavilic, pero ta jbijile mu jechucun. Yu'un laj xa cac'boxuc lec avilic, laj xa avotquinic lec ta sventa scotol c'usi la jpas. 7¿Me ja' jmul ic'ot avu'unic ti biq'uit laj cac' jba ta atojolic, yu'un vo'oxuc muc' lac'otic ta sventa ti mu'yuc c'usi la jc'anboxuc c'alal la jcholboxuc Lequil A'yej yu'un Diose? 8Yu'un ja' la jpojbe staq'uinic ya'yel li yantic steclumal Cristoe, yu'un la jtsac li coltael laj yac'bicun c'alal te li'abtej ta atojolique. 9C'alal te oyun ta atojolique, oy jvocol ta sventa c'usitic itun cu'un, pero mu'yuc laj cac' avicatsic. Li c'usi mu'yuc cu'une ja' ay yac'bicun li jch'unolajeletic ta Macedonia banamile. Yu'un oy ta co'nton mu jc'an xcac' avocolic. Ja' jech co'nton o ta jpas batel. 10Melel xcal ta sventa li Cristo ti li' oy ta jtojole, ta scotol li avosilalic ta Acayae mu'yuc boch'o xu' chisloq'uesbun li c'usi toj lec chca'ye. 11¿C'u yu'un ti jech ta jpase? ¿Me yu'un mu'yuc jc'anojoxuc? Sna'oj Dios ti lec jc'anojoxuque. 12Li c'usi ta jpase jech ta jpas o batel. Yu'un jech mu xcac' spas c'usi tsc'an yo'ntonic li boch'otic ja' no'ox tsa'ic c'u x'elan tscuy sbaic ta jcholc'ope, ti tsc'an tsco'lajes sbaic jech chac c'u cha'aluncutique. 13Yu'un li stuquique ja' jlo'lavanej jcholc'opetic, j'eleq'uetic no'ox. Yajtacbolaltac xa Cristo scuyoj sbaic yilel. 14Mu me xch'ay avo'ntonic yu'un. Yu'un li banquilal pucuje toj lec sna' sc'atajes sba ec; xco'laj xa xchi'uc yaj'almantal Dios tscuy sba. 15Ja' yu'un ma'uc toj labal sba me ja' xa yabtelic xcholel c'usi tuc' yilel ec li j'abteletic yu'une. Yu'un ti c'u x'elan tspasique ja' jech chich' stojolic. 16Chacalboxuc yan velta, mu me xanopic ti bolun, ti mu'yuc jbijile. Pero me chanopic ti bolune, jechuc; yu'un jech xu' ta jtoy jba jutuc ec. 17Yu'un ti c'u x'elan chic'opoj tal li'i, mu jechuc jech chac c'u cha'al tsc'an li Cajvaltique. Ja' jech chic'opoj jech chac c'u cha'al li boch'o bolique, yu'un jech xu' ta jtoy jba jutuc ec. 18Ta sventa ti ep boch'otic tstoy sbaic ta sventa sbec'talique, jech xu' ta jtoy jba jutuc ec. 19Yu'un te ats'icojic ti tstoy sbaic li boch'otic bolique, vo'oxuc ti toj bijoxuque. 20Toj lec sts'ic avu'unic li boch'o chasmozoinoxuque, li boch'o chaslajesboxuc c'usitic oy avu'unique, li boch'o chayelc'anoxuque, li boch'o tstoy sbaic ta atojolique, xchi'uc li boch'o chasmajboxuc asatique. 21Ac'o me ja' jq'uexlalcutic ya'yel, yu'un li vu'uncutique xco'laj xchi'uc mu'yuc c'usi xu' cu'uncutic ta sventa ti mu jechuc la jpascutic ta atojolique. Pero me tstoy sbaique, xu' ta jtoy jba ec. Li'i ja' jech chic'opoj jech chac c'u cha'al li boch'o bolique. 22Ja' hebreoetic, pero hebreoun ec. Ja' israeletic, pero israelun ec. Ja' smomnich'nabtac Abraham, pero smomnich'onun Abraham ec. 23Ja' yajtuneltac Cristo scuyoj sbaic, pero li vu'une mero yajtunelun Cristo, yu'un vu'un ech'em tsots abtejemun. Li'i ja' jech chic'opoj jech chac c'u cha'al li boch'o bolique. Yu'un li vu'une ep ta velta quich'oj nucul, ep ta velta ochemun ta chuquel. Ep ta velta chapal sc'oplal chquich' milel. 24Vo'ob velta laj yac'bicun nucul li judioetique; balunlajuneb xcha'vinic (39) ta moj laj yac'bicun jujun velta. 25Oxib velta laj quich' majel ta te'. Jun velta laj quich' ac'bel ton. Oxib velta ivoc' barco ti c'alal te tiq'uilune. Jun c'ac'al xchi'uc jun ac'ubal te xicajet ta natil nab. 26Ep ta velta nomtic lixanov. Toj xi'bal sba snojelal uc'umetic la jta. Colel xa licol ta milel yu'un j'eleq'uetic xchi'uc jchi'iltac ti jun jlumal jchi'uque xchi'uc li yanlum cristianoetique. Ta buyuc no'ox chibat, toj xi'bal sba c'usi ta jta, me ta lumetic, me ta xocol banamil, me ta nab, o me ta stojol li boch'o jch'unolajeletic ta alele. 27Jech noxtoc toj ep jvocol ta tsatsal abtel, toj ep lubel, ep yavayel, ep vi'nal xchi'uc taqui-o'nal. Oy ep c'ac'al te quipanoj jba o. Toj ep jvocol ta sic; oy bu jeche' t'analun o. 28Oy to ep c'usitic yan. Jujun c'ac'al toj ep slo'il co'nton ta sventa li steclumal Cristoe. 29Me oy boch'o ch-alube, chi'alub chca'ay ec. Me oy boch'o tsocbat yo'ntone, toj chopol chc'ot co'nton. 30Me persa to chcal li c'usi sventa xu' ta jtoy jbae, ja' no'ox chcal ti bu lec xvinaj ti mu'yuc c'usi xu' cu'un jtuque. 31Li Diose, ja' li Stot Cajvaltic Jesucristo ti ich'bil o ta muc' sbatel osile, sna'oj ti ja' melel scotol c'usi chcale, ti mu'yuc chi'epalc'opoje. 32C'alal te oyun ta lum Damascoe, li ajvalil ti ventainbil yu'un li muc'ta ajvalil Aretase laj yac' ta chabiel lec li lume, yu'un jech xu' chistsaquicun. 33Pero chechbil liyal ta jun muc' ta moch ta sventanail li coralton yu'un lume, jech licol loq'uel ta sc'obic.


Copyrighted Material
Learn More

will be added

X\