2 Corintios 10

1Vu'un Pabloun. Ta sventa smuc'ul yo'nton, yutsil yo'nton Cristo ta jc'anboxuc vocol ta atojolic, vo'oxuc ti oy chavalic ti biq'uit cac'oj jba c'alal te oyun ta atojolique, ti ja' toj tsots ta jpas jba c'alal nom oyune. 2Jech avocolicuc mu me xavaq'uic ti tsots chc'ot jpas jba c'alal chic'ot ta atojolique. Yu'un jnopoj ti tsots chc'ot jpas jba ta stojol li boch'otic chal ti ja' no'ox jech ta jpas jech chac c'u cha'al tspas li cristianoetique. 3Ta melel cristianouncutic no'ox, pero muc ja'uc jech ta jtsatsal jtuccutic ta jpascutic c'op jech chac c'u cha'al tspas li cristianoetique. 4Li cabtejebcutic sventa ta jpascutic o c'ope ma'uc sventa cristiano; ja' ta sventa svu'el li Diose. Yu'un jech xu' ta jlilincutic, ta jlajesbecutic sc'oplal sbijilic, srazonic li boch'otic bij scuyoj sbaique. 5Jech mu'yuc stu chcom o li c'usi chapal yu'unique xchi'uc li stoyobbailic ti ja' tsmac ta be yotquinel li Diose. Jech xu' ta jlajesbecutic yip scotol li c'usi tsnopique, yu'un jech xu' chlic xch'unic li Cristoe. 6Chapaluncutic xa chcac'becutic stoj smul li boch'otic mu xch'unic mantale, ti me vo'oxuc lec chach'unic c'usi chacalbotcutique. 7Li vo'oxuque ta sba no'ox chaq'uelic. Li boch'otic chayalboxuc ti ja' yu'untac Cristoe, na'ic me, li vu'uncutique ta melel vu'uncutic mero yu'ununcutic li Cristoe. 8Ac'o me oy bu xco'laj xchi'uc ta jtoy jba ta sventa ti ech'em chbat yalel cu'un ti oy cabtele, mu xiq'uexov o. Yu'un melel ac'bilun cabtel sventa ta jtsatsubtasoxuc, ma'uc sventa ta jsoquesoxuc. 9Yu'un jech mu me xanopic ti ja' no'ox ta jsibtasoxuc ti jech chacalboxuc tal ta cartae. 10Yu'un oy boch'o chal ti ja' no'ox toj tsots, toj ech'em chbat cu'un li c'usi ta jts'iba ta jcartae. Yan ti c'alal te oyun ta atojolique, mu'yuc yip li jc'ope; mu'yuc stu li c'usi chcale. 11Pero li boch'o jech chale ac'o me sna' lec. Ti c'u x'elan chic'opoj tal ta carta c'alal nom oyune, ja' no'ox jech chc'ot jc'opan ti c'alal te oyun ta stojole. 12Li vu'uncutique ma'uc ta jchancutic, ma'uc jech co'ntoncutic jech chac c'u cha'al li boch'otic ja' no'ox chal sc'oplal stuquique. Yu'un stuquic no'ox chal sc'oplalic, stuquic no'ox chac' sbaic ta ich'el ta muc'; mu'yuc smelol li c'usi tspasique. 13Yan li vu'uncutique mu ja'uc ta jtoy jba jchi'ucutic ti bu mu ja'uc jventacutique. Ja' no'ox chcalcutic ti bu c'alal laj yac'bun jventaincutic li Diose. Yu'un jech la sc'an Dios ti lic'otcutic to te c'alal yo' bu oyoxuque. 14Muc jeche'uc ta jcuy ta cabtelcutic ti bu muc ja'uc te c'alal ac'biluncutique. Mu yu'unuc mu'yuc xi'aycutic te ta atojolic; ja' vu'uncutic ba'yuc te ay jcholboxuc li Lequil A'yej ta sventa Cristoe. 15Mu ja'uc no'ox ta jtoy jbacutic ta sventa yabtel yan. Li vu'uncutique ja' no'ox ta jmalacutic ti ac'o ch'ianic lec ta xch'unel li Cristoe, yu'un jech chmuq'uib lec cabtelcutic ta atojolic, yu'un ja' te c'alal jventainojcutic. 16Ts'acal chbat jcholcutic Lequil A'yej noxtoc ta stojol li jnaclumetic ta jelovel to yo' bu oyoxuque. Ma'uc chbat jventainbecutic yabtel yantic; ma'uc ta jtoy jba jchi'uccutic ti bu mu ja'uc cabtelcutique, ti cholbil xa ono'ox ya'yique. 17Li boch'o chal ti lec xu' yu'une, ac'o yal ti xu' yu'un ta sventa li Cajvaltique. 18Yu'un li boch'o lec chal sc'oplal stuque muc vu'emuc yu'un; ja' vu'em yu'un li boch'o lec sc'oplal ta sventa Cajvaltique.


Copyright
Learn More

will be added

X\