1 Timoteo 6

1Li boch'otic ochemic ta mozoile tsc'an oy ta yo'nton chich' ta muc' li yajvalique. Jech mu chopoluc chbat sc'oplal yu'unic li Diose xchi'uc li c'usi jch'unojtique. 2Me jch'unolajel li yajvalique, mu me ja'uc mu xich'ic ta muc' ta scoj ti co'ol xch'unojique. Ech'em to ac'o tunicuc yu'un, yu'un ja' xa jch'unolajel li boch'o ta x'abtejic yu'une. Xchi'il xa sbaic ta sventa Dios. Jech me xachanubtas, jech me xavalbe ya'yic. 3Me oy boch'o yan o c'u x'elan ta xchanubtasvan ti mu xco'laj xchi'uc li sc'op Cajvaltic Jesucristo ti toj leque, xchi'uc me mu xco'laj xchi'uc ti c'u x'elan ta ich'el ta muc' Diose, 4ma'sat c'otem ta stoyobbail; mu'yuc c'usi sna'ic o. Ja' no'ox oy ta yo'nton tstsaquilanvanic ta c'op. Ta sventa ti jech tspasique, ta xlic o it'ix o'ntonal, ta xlic o c'op, ta xlic xchopolc'opta sbaic o. Jech chopol chlic yil sbaic o. 5Te tstsaquilan sbaic o ta c'op xchi'uc li boch'o co'ol soquem sjolic xchi'uque, ta scoj ti mu'yuc xch'unojic li sc'op Dios ti ja' melele, ti ja' no'ox oy ta yo'ntonic tsc'an tspasic ta jc'ulej ta sventa li sc'op Dios jch'unojtique. 6Ta melel ja' jc'ulejaltic c'otem ti jch'unojtique, ti jun co'ntontic yu'un ti c'u yepal c'usitic oy cu'untique. 7Yu'un mu'yuc ono'ox jc'ulejaltic ti c'alal lijvoc'utic li' ta banamile. Jech noxtoc mu'yuc c'usi ta xquich'tic batel ti c'alal chijchamutique. 8Me oy jve'eltic xchi'uc jc'u' jpoc'tique, cuxetuc no'ox co'ntontic o. 9Yan li boch'o tsc'an tspas ta jc'uleje, te ta sujat yu'un c'usi chopol, jech te chucbil ta xc'ot o. Ep c'usi chlic svovil c'upin. Mu'yuc lec c'usitic chlic snop, jech te ta soc o yo'nton, jech ch'ayel ta xbat o xchi'uc. 10Yu'un li sc'upinel taq'uine ja' yibel scotol c'usitic chopol. Oy jayibuc ipich'aj yo'ntonic yu'un taq'uin, jech la scomtsanic xch'unel Cajvaltic. Jech la staic ep svocolic. 11Pero vo'ot li yajtunelot Diose, voc'o me aba ta sventa scotol le'e. Ja' sa'o batel li c'usi tuc' ta pasele, li yich'el ta muc' Cajvaltique, li xch'unojel avo'ntone, li c'uxubinvaneje, ti ac'o oyuc lec stsatsal avo'ntone, ti ac'o cuchuc avu'un scotole, xchi'uc ti biq'uit chavac' abae. 12Ac'o me persa xch'unel li Cajvaltique, tsotsan me. Oyuc ta avo'nton chavu'unin o li cuxlejal sbatel osile, yu'un ja' sventa ti la'ic'at yu'un Diose, xchi'uc jech jamal laj aval ta stojol ep jch'unolajeletic ti jech ach'unoje. 13Li' ta orae ta jpasot ta mantal ta stojol Dios, ja' li boch'o chac' cuxiuc scotol c'usitic oye, xchi'uc ta stojol li Jesucristoe, ja' li boch'o jamal laj yal sba ta stojol Poncio Pilatoe. 14Ch'uno me li c'usitic laj calbote. Mu me xapas c'usi chopol; tuc' me ac'o batuc avu'un c'alal to chtal li Cajvaltic Jesucristoe. 15Yu'un me la sta sc'ac'alil yu'un li Diose, ta stac tal li Cajvaltic Jesucristoe. Yu'un ja' no'ox stuc toj ech'em slequilal yutsilal; ja' no'ox stuc ech'em smuc'ul. Ja' Ajvalil yu'un li ajvaliletique; ja' Jpasmantal yu'un li jpasmantaletique. 16Ja' no'ox stuc ti stalel cuxul, ti mu sna' xcham oe. Nacal ta tsots xojobal; mu'yuc boch'o xu' ta xnoch'aj batel. Me junuc cristiano mu'yuc boch'o yiloj, mu'yuc boch'o xu' tsq'uel. Stuc no'ox ac'o ich'atuc ta muc'. Stuc no'ox ac'o spas mantal sbatel osil. Jechuc. 17Li jc'ulejetic li' ta banamile, albo mantal ti mu me stoy sbaique, ti mu me ja'uc spat yo'nton yu'un li sc'ulejalique. Yu'un li c'ulejalile ta xlaj sc'oplal. Ja' ac'o spat yo'ntonic ta stojol li Diose, yu'un ja' chiyac'butic scotol li c'usitic ta xtun cu'untique, yu'un jech xcuxet no'ox co'ntontic. 18Albo ya'yic ti ja' ac'o spasic c'usitic leque, ac'o ja'uc sc'ulejalic ti lec c'usitic tspasique. Mu me xlaj cha'ay chac', mu me chlaj cha'ay tsq'uelan li c'usitic oy yu'unique. 19Jech cac tstsobic batel li sc'ulejalic tstaic ta ts'acale; jech ta xc'ot yich'ic li mero xcuxlejalique. 20Timoteo, chabio me li c'usitic la'ac'bat aventaine. Mu me xatuc'ulan li lo'iletic sventa no'ox banamil ti mu'yuc stue, xchi'uc c'u x'elan tstsaquilanvanic ta c'op li boch'otic lec sna' scuyoj sbaique. 21Oy jayibuc jech laj yalic batel, jech te ich'ayic o ta be xchi'uquic; ja' la scomtsanic o xch'unel li c'usi melele. Ac'o xc'uxubinoxuc o li Cajvaltique.


Copyright
Learn More

will be added

X\