1 Timoteo 5

1Mu me xavut li boch'o mol xae. Taq'uio ta lequil c'op, cuyo jech chac c'u cha'al atot. Li queremetique cuyo jech chac c'u cha'al avits'in. 2Li me'eletique cuyo jech chac c'u cha'al ame'. Li tsebetique cuyo jech chac c'u cha'al avixlal; tuc'uc me avo'nton ta stojolic. 3Oyuc me ta avo'nton li me'on antsetic ti mu'yuc boch'o oy yu'unique. 4Pero me oy me'on ants ti oy yalabtac, o me syal'alabtaque, li alab nich'naletique, ja' ba'yuc tsc'an chchanic xc'uxubinel li boch'otic oy yu'unique, yu'un ja' yabtelic. Ac'o spaquic jech chac c'u cha'al c'uxubinbilic ich'iic tale. Me jech tspasique, toj lec chil li Diose. 5Li me'on antsetic ta melele, ja' ti stuquic xae, ti ja' xa no'ox spatoj yo'ntonic o ta stojol li Diose, ti mu scomtsanic sc'opanel Diose, ti te xvocoletic o ta c'ac'al ta ac'ubale. 6Yan li boch'o ja' no'ox batem ta yo'nton c'usi tsc'an stuque, ac'o me cuxul, pero chamen ch-ilat. 7Li c'usi laj calbot li'i albo me ya'yic noxtoc, yu'un jech mu xtabat smulic. 8Yu'un li boch'o mu'yuc ta yo'nton yuts' yalaltaque, me ja'uc li stot sme'e xchi'uc li yajnil xnich'nabe, altic chal ti xch'unoj Cajvaltique. Ja' xjelov xchopolil jech chac c'u cha'al li boch'o mu'yuc xch'unojique. 9Li me'on antsetic ti xu' ch-och ta vun sbiique, ja' li boch'otic yich'ojic xa oxvinic (60) jabile, ti jun yo'nton laj yich'ic ta muc' anima smalalique, 10xchi'uc ti lec sc'oplalic ta sventa yabtelique: me la sts'ites lec yalabic, me i'ic'van ochel ta snaic, me oy la spocbeic yacan li yu'untac Diose, me oy la scoltaic li boch'otic oy svocole, xchi'uc me oy c'usitic yan lec la spasique. 11Pero li me'on antsetic ti mu to sta oxvinic (60) sjabilalique, mu xu' chatsacbe ta vun sbiic, yu'un naca me ipich'aj to yo'ntonic, naca me la snop to chmalijic, jech chlic scomtsanic spasel li c'usi yalojic ta stojol Cristoe. 12Jech oy smul chc'otic, yu'un muc xc'ot ta pasel li c'usi ba'yuc laj yal tspasique. 13Xu' ta xliquic ta puru vu'lal ta naetic noxtoc; te ta xlic pasicuc ta ch'aj. Ma'uc no'ox ti ta xch'ajubique, ta xlic lo'iltavanicuc noxtoc; buyuc no'ox ta stic' sbaic, chalic batel li c'usi mu sventaicuque. 14Ja' yu'un ja' lec ac'o malijicuc li me'on antsetic ti bu tsebic toe; ac'o oyuc yolic, ac'o sventainic lec snaic, yu'un jech mu jtatic labanel yu'un li boch'o chopol chijyilutique. 15Yu'un oy me'on antsetic laj xa scomtsanic xch'unel li Cajvaltique, ja' xa bat sts'aclinic li banquilal pucuje. 16Me oy jch'unolajel ants ti oy me'on ants yuts' yalale, ac'o xc'uxubin. Mu me ja'uc xac'be svocol li jch'unolajeletique, yu'un jech li jch'unolajeletique xu' yu'un tscoltaic li me'on antsetic ti ta melel mu'yuc boch'o oy yu'unique. 17Li jcholc'opetic ti lec tsventain yabtelique, tsc'an ech'em ac'o ich'aticuc ta muc'. Ja' ech'em ac'o ich'atuc ta muc' li boch'o yac'oj yo'ntonic ta xcholel sc'op Diose, xchi'uc ta xchanubtasvanique. 18Yu'un jech ts'ibabil ta sc'op Dios: “Mu me xavac'be svozal avacaxic ti c'alal tstec' loq'uel sbec' trigoe”, xi ts'ibabil. Jech ts'ibabil noxtoc: “Li boch'o ta x'abteje persa ta xich' stojol”, xi ts'ibabil. 19Mu me xatuc'ulan me oy ta xtic'bat smul jun jcholc'ope, ja' to me oy chib oxib testigoe. 20Li boch'o oy smulique, taq'uio ta stojol scotol jch'unolajeletic, yu'un jech ac'o xi'icuc ec li yantique. 21Ta xcalbot mantal ta stojol Dios, xchi'uc ta stojol Cajvaltic Jesucristo, xchi'uc ta stojol li yaj'almantaltac st'ujoje. Ja' me jech xapas batel jech chac c'u cha'al laj calbot li'i. Co'ol me xapas; mu me t'ujbiluc no'ox boch'o jech xapasbe. 22Mu me boch'o xavac' ac'ob ta sjol ta anil no'ox, yu'un naca me amaquibe smulic. Q'uelo me lec aba. 23Jna'oj ti ep xa velta i'ipaj ach'ute. Mu xa me xavuch' puru vo' no'ox; uch'an jutuc pasem ya'lel ts'usub ta sventa li ach'ute. 24Oy boch'o ta xvinaj ta ora smulic ti c'alal mu'yuc to chich'ic chapanele, pero oy ts'acal to ta xvinaj. 25Jech noxtoc oy boch'o ta xvinaj ta ora li c'usi lec ta spasique; oy bu mu xvinaj ta ora, pero muc teuc mucul chcom o.


Copyright
Learn More

will be added

X\