1 Tesalonicenses 5

1Yu'un mu'yuc boch'o sna' jayib c'ac'al, ti jayib jabil sc'an xtal li Cajvaltique, quermanotac, mu persauc ta jts'ibacutic tal. 2Yu'un xana'ic xa lec acotolic ti ja' jech chtal jech chac c'u cha'al chtal j'elec' ta ac'ubaltique. 3C'alal jech chal li cristianoetique: “Jun co'ntontic, mu'yuc c'usi xi'bal sba”, me xiique, ja'o ta ora no'ox chvul ta loq'uel tsots vocol ta stojolic. Ja' jech chac c'u cha'al jun ants ti ta ora no'ox chlic xa'ay c'alal oy xch'ute. Me junuc mu'yuc boch'o xu' chjatov. 4Pero li vo'oxuque quermanotac, mu'yucoxuc xa ta ic' osil, jech mu ch'ayeluc avo'ntonic chvul staoxuc jech chac c'u cha'al li boch'o ch'ayem yo'nton chtaat yu'un jun j'eleq'ue. 5Yu'un li vo'oxuque acotolic oyoxuc xa ta sac osil, oyoxuc xa ta c'ac'altic. Mu'yucoxuc xa ta sventa ic' osil; mu'yucoxuc xa ta sventa ac'ubaltic. 6Ja' yu'un mu me xijvayutic jech chac c'u cha'al li yantique. Viq'uiluc me jsatic, cuxuluc me co'ntontic. 7Yu'un li boch'otic chvayique, chvayic ta ac'ubaltic. Li boch'otic chyacubique, chyacubic ta ac'ubaltic. 8Pero vu'utic ti oyutic xa ta c'ac'altique, cuxuluc me co'ntontic. Ja'uc me smac sna co'ntontic chc'ot li xch'unojel co'ntontique xchi'uc ti chijc'anvane. Ja'uc me smac joltic chc'ot ti jun co'nton ta jmalatic chijcolutique. 9Yu'un ma'uc laj yic'utic Dios sventa ac'o bat jtoj jmultic. Laj yic'utic yu'un ac'o colcutic sbatel osil ta sventa li Cajvaltic Jesucristoe. 10Ja' li boch'o icham ta scoj jmultique. Jech ac'o me cuxulutic to, o me chamenutic xa c'alal chtal, tsc'an ti co'ol chijcuxiutic jchi'uctique. 11Ja' yu'un tsatsubtasbo aba avo'ntonic; coltao abaic ta jujuntal jech chac c'u cha'al chapasic ono'oxe. 12Quermanotac, ta jc'anboxuc vocol ta atojolic ti tsc'an chavich'ic ta muc' li boch'otic oy yabtelic te ta atojolique, ti sventainojoxuque, ti chastojobtasoxuc ta sventa Cajvaltique. 13Tsc'an chavich'ic lec ta muc', tsc'an chac'anic lec ta sventa li yabtelique. Mu me xacontrain abaic; jmojuc me avo'nton acotolic. 14Ta jc'anboxuc vocol noxtoc quermanotac, albeic me mantal li boch'otic ch'ajique. Tsatsubtasbeic me yo'nton li boch'otic mu'yuc stsatsal yo'ntonique. Coltaic me li boch'otic aluben no'ox cha'yique. Mu me x'ech' avo'ntonic; talbat xacolta abaic. 15Q'uelo me abaic, mu me xapacbe abaic li c'usi chopol chapasbe abaique. Ja' tsc'an lec c'usi chapasbe abaic scotol c'ac'al li jujunoxuque. Jech noxtoc lec c'usi xapasbeic scotol li cristianoetique. 16Cuxetuc o me avo'ntonic. 17C'opanic Dios scotol c'ac'al. 18Tojbeic ta vocol Dios scotol. Yu'un jech oy ta yo'nton Dios tsc'an chapasic ta sventa ti oyoxuc ta stojol li Cristo Jesuse. 19Mu me xapajesbeic yabtel li Ch'ul Espiritue. 20Mu me xana'leic li boch'otic chalic c'usi ch-ac'bat sna'ic yu'un Diose. 21A'yo lec ava'yic scotol; ja' xach'unic ti bu melele. 22Pajeso abaic ta spasel scotol li c'usitic chopole. 23Li Dios ti chac' jun o'ntonale, ac'o slecubtasoxuc o batel, ac'o slecubtas o atalelic xchi'uc ajol avo'ntonic xchi'uc abec'talic, yu'un jech mu'yuc amulic chvul staoxuc c'alal chtal li Cajvaltic Jesucristoe. 24Li Dios ti laj yic'oxuc ta stojole mu sna' sjelilan sc'op; ta spas ono'ox li c'usi yaloje. 25Quermanotac, c'opanbun Dios ta jtojolcutic ec. 26Chabanuc xavalbeic scotol li jch'unolajeletique; tsacbo aba ac'obic ta sventa ti lec ac'anoj abaique. 27Ta sbi Cajvaltic chacalboxuc tal, aptabo me ya'yic scotol jch'unolajeletic ec li jcartacutic li'i. 28Ac'o xc'uxubinoxuc o acotolic li Cajvaltic Jesucristoe.


Copyright
Learn More

will be added

X\