1 San Pedro 5

1Vo'oxuc li jcholc'opoxuque, chacalboxuc c'usi lec ta pasel, yu'un co'ol oy cabteltic. Xchi'uc vu'un laj quil c'u x'elan laj yich' vocol li Cristoe, xchi'uc co'ol ta jchi'in ta slequilal c'alal me icha'sut tale. 2Chabiic me li xchijtac Dios ti ac'bil aventainique. Mu me ta sujeluc xapasic; yutsiluc me avo'nton xapasic jech chac c'u cha'al tsc'an li Diose. Mu me ja'uc ta scoj ti xpich'et avo'ntonic yu'un taq'uine. Scotoluc avo'nton xapasic li avabtelique. 3Mu me xacuy abaic ta jpasmantal ta stojol li boch'otic aventainojique. Ja' tsc'an vo'oxuc chavaq'uic ta ilel c'usi lec ta pasel ta stojolic. 4Yu'un jech c'alal chtal li Banquilal yu'un jchabichijetique, chavich' amotonic ti toj jun yutsile ti mu sna' xlaj oe. 5Jech ec li vo'oxuque queremetic, ich'ic me ta muc' li jcholc'opetique. Acotolic tsc'an talbat chavich' abaic ta muc'; biq'uit xavac' abaic, yu'un jech ts'ibabil: “Li Diose chopol chil li jtoybaetique; yan li boch'o biq'uit chac' sbaique ja' chc'uxubin”, xi ts'ibabil. 6Ja' yu'un biq'uit me xavac' abaic ta stojol li Dios ti ech'em stsatsale, jech chayac'oxuc ta ich'el ta muc' ti c'alal ta sta yoraile. 7Ac'beic sventain Dios scotol li slo'il avo'ntonique, yu'un oy ta yo'nton tsc'an ta scoltaoxuc. 8Bijanic me, viq'uiluc me asatic yu'un li avajcontraique, ja' li pucuje, yu'un xjoyet no'ox jech chac c'u cha'al león ti x'avet no'ox ta sa'el li boch'o tsc'an tsti'e. 9Contrainic li pucuje, j'ech'el oyuc o xch'unojel avo'ntonic. Na'ic me ti ja' jech chich'ic vocol ec li jch'unolajeletic ti buyuc no'ox oyic ta sbejel banamile. 10Me icuch avu'unic li vocol ti jliquel no'ox li' chquich'tique, li Dios ti toj ep slequil yo'ntone, ti laj yic'oxuc yu'un ac'o bat achi'inic ta slequilal ta sventa ti ach'unojic li Jesucristoe, chayac'boxuc lec stsatsal avo'ntonic, chaspasboxuc ta jun avo'ntonic, chasnacanboxuc lec avo'ntonic. 11Ja' ac'o spas mantal stuc sbatel osil li Diose. Jechuc. 12Li Silvanoe, ja' li jchi'iltic ti jun yo'nton ta jtojole, ja' la sts'ibabun li cha'oxbel c'usi chacalboxuc tal li'i, yu'un ta jbijubtasoxuc, xchi'uc chacalboxuc ta jamal ti ta melel ataojic xa li c'uxubinel yu'un Diose. J'ech'el me c'anic o li c'uxubinel yu'une. 13Chabanucoxuc la xal li jtsob jch'unolajeletic li' ta Babilonia ti co'ol t'ujbilutic yu'un Dios jchi'uctique. Chabanucoxuc la xal ec li Marcos ti xco'laj xchi'uc jnich'one. 14Chabanuc xavalbe abaic ta jujuntal. Te tsacbo aba ac'obic, ja' svinajeb ti ac'anoj abaic ta sventa ti co'ol ach'unojic Diose. Ac'o junuc avo'nton acotolic, vo'oxuc ti oyoxuc ta stojol li Jesucristoe.


Copyright
Learn More

will be added

X\