1 San Pedro 3

1Jech ec li vo'oxuque antsetic, ich'ic me ta muc' li amalalique. Yu'un me oy mu'yuc xch'unojic sc'op Dios li amalalique, c'alal chilic ti lecubenoxuque, xu' ta xlic xch'un ta aventaic. Mu persauc chavalbeic, 2yu'un chilic ti lec c'usi chapasique xchi'uc ti lec avich'ojic ta muc' Diose. 3Mu me ja'uc ta sventa sba abec'talic ac'o vinajuc li at'ujumalique. Mu me ja'uc ta sventa ti toj yan xa sba c'u x'elan chapas li ajolique, xchi'uc ti chac'ac'umtas abaic ta c'anal taq'uine, xchi'uc ti toj c'upil sba li ac'u' apoq'uique. 4Ja'uc me ta sventa ti lecuben yut avo'ntonique, xchi'uc ti oy smuc'ul avo'ntonique, yu'un ja' mu xlaj sc'oplal. Le'e ja' toj lec chil li Diose. 5Yu'un ja' jech la spasic ec li antsetic ta vo'onee; ja' st'ujumalic ic'ot ec li slequil yo'ntonique. Ja' no'ox la spat yo'ntonic ta stojol li Diose, jech ivu' yu'unic laj yich'ic ta muc' li smalalique. 6Ja' jech la spas ec li Sarae, la xch'unbe smantal li Abrahame, yu'un la sna' ti ja' totil te ta snae. Ja' jech li vo'oxuque yalaboxuc Sara chac'otic me ja' chapasic li c'usi leque, me mu'yuc c'usi chaxi'ic yu'une. 7Ja' no'ox jech ec li vo'oxuque viniquetic, nopic me c'u x'elan lec jun avo'nton achi'uc li avajnilique. C'ux me xava'yic, ich'ic me ta muc'. Na'ic me ti ja' c'unic li stuquique xchi'uc ti co'ol ic'biloxuc yu'un Dios xu' chavich'ic li cuxlejal ti mu sna' xlaje. Me jech chapasique, mu'yuc macal chc'ot ta be ac'opic ti c'alal chac'opanic Diose. 8Slajeb xa chacalboxuc, co'oluc me avo'nton ta acotolic. C'ux me xava'ay abaic, c'ano me abaic, yu'un jun xa atotic. Oyuc slequil avo'ntonic; biq'uit me xavac' abaic. 9Mu me chopoluc c'usi xapasbeic ec li boch'o chopol c'usi chaspasboxuque. Mu me xachopolc'optaic ec li boch'o ta xchopolc'optaoxuque. Ja' tsc'an chac'anbeic slequilalic, yu'un jech ac'o staic bendición. Yu'un ic'biloxuc yu'un Dios ti jech ac'o apasique, yu'un jech ac'o avich'ic bendición. 10Yu'un jech chal ta sc'op Dios: “Li boch'o tsc'an jun yo'nton chcuxie, ti tsc'an xcuxet no'ox yo'nton chjelov li' ta banamile, ac'o spajes ye ta yalel c'usi chopol, xchi'uc ac'o spajes ye ta epalc'op. 11Ac'o svoc' sba ta sventa li c'usi chopole, ja' ac'o spas li c'usi leque. Ac'o sa'ilan li c'usi ja' sventa jun yo'ntone, ja' ac'o spasilan o batel. 12Yu'un li Cajvaltique ja' te oy sat ta stojol li boch'o tuc' c'usi tspasique; lec stuc'ulanbe sc'op ti c'alal chc'opanate. Yan li boch'o chopol c'usi tspasique ja' chopol ch-ilatic yu'un li Cajvaltique”, xi ts'ibabil. 13Mu'yuc boch'o chopol c'usi chaspasboxuc me vo'oxuc batem avo'ntonic ta spasel c'usitic leque. 14Me ta scoj lec c'usitic chapasic chavich'ic vocole, cuxetuc no'ox avo'ntonic li vo'oxuque. Mu me xaxi'ic yu'un; mu me xlo'ilaj avo'ntonic yu'un. 15Ich'ic no'ox ta muc' Cajvaltic Cristo ta avo'ntonic. Chapalucoxuc me scotol c'ac'al c'usi chatac'beic me oy boch'o chasjac'boxuc ta sventa li c'usi apatoj avo'nton chamalaique. 16Pero ta smuc'uluc avo'nton xavalic; ich'vananic me ta muc'. Mu me xapasic li c'usi xu' chac' slo'il ajol avo'ntonique, yu'un jech chq'uexovic li boch'otic chopol chilic li c'usi lec chapasic ta sventa Cristoe. 17Ja' lec me ta xquich'tic vocol ta sventa c'usi lec ta jpastic me jech tsc'an Diose. Ja' vocol me ta scoj chopol c'usi ta jpastique. 18Yu'un li Cristoe laj ono'ox yich' vocol ec ti c'alal icham ta scoj jmultique. Jun no'ox velta j'ech'el la xch'aybutic o. Li stuque mu'yuc smul, pero laj yich' vocol ta scoj jpasmuliletic, yu'un jech chijyic'utic batel ta stojol Dios. Icham xchi'uc sbec'tal, pero icha'cuxi xchi'uc ach' sbec'tal ta sventa Espíritu. 19Li xch'ulele ay yalbe ya'ay ch'ulelaletic yo' bu chucajtic ti ivu' xa yu'une. 20Ja' li jbajmantaletic ta vo'one ti c'alal cuxul to'ox li Noee, ti imalaatic yu'un Dios ac'o xch'unic c'alal ja'o chich' pasel barcoe. Pero mu'yuc ep boch'o icolic; ja' no'ox vaxquib icolic ta sventa li vo'e. 21Li vo' le'e ja' senyail li vo' chquich'tique, jech chijcolutic. Li vo' chquich'tique mu ja'uc sventa chispocbutic jbec'taltic. Ja' sventa ti lecuben xa jol co'ntontic ta stojol Dios ta sventa ti icha'cuxi li Jesucristoe. 22Ja' li boch'o imuy batel ta vinajel, ti te xa oy ta sbats'ic'ob Diose, ti ich'bil ta muc' yu'un li j'almantaletic xchi'uc li pucujetic ti tsots svu'elique.


Copyright
Learn More

will be added

X\