1 San Pedro 2

1Ja' yu'un tsc'an chacomtsanic scotol li c'usitic chopole, li lo'lavaneje, ti chamacbeic sat achi'ilique, li ti'o'ntavaneje, xchi'uc scotol li lo'iltavaneje. 2Ja'uc jechoxuc jech chac c'u cha'al ololetic ti naca to chvoq'uique, ti tsa'ilan xchu'ique. Ja'uc jechoxuc ta sa'ilanbel sve'el avo'ntonic li vo'oxuque, yu'un jech chach'iic ta sventa li sc'op Dios ti ja' melele, jech chacolic. 3Yu'un laj xa avilic ti toj lec yo'nton li Cajvaltique. 4Ja' yu'un nopajanic ta stojol li Cajvaltic ti ja' jech chac c'u cha'al lequil tone, ti ibajat yu'un li cristianoetique, pero ta stojol Diose lec t'ujbil, oy lec stu. 5Ja' jech li vo'oxuque lequil ton c'otemoxuc, chavich'ic latsel muyel yu'un jech chac'otic ta jbej ch'ulna yu'un Dios. Vo'oxuc ch'ul paleoxuc chac'otic, jech ta sventa Jesucristo xu' chavaq'uic lequil matanal sventa sbatel osil ti lec chil Diose. 6Ja' yu'un jech ts'ibabil ta sc'op Dios: “A'yo ava'yic, ta xcac' jbej lequil ton te ta Sión; lec t'ujbil, tsots sc'oplal. Ja' ta xcom ta sventa chiquin na. Li boch'o ja' tspat yo'nton ta stojole mu xyal o ta q'uexlal”, xi ts'ibabil. 7Vo'oxuc li jch'unolajeloxuque ja' sventa alequilalic. Pero ta sventa li boch'otic mu xch'unique, ja' ta xc'ot ta pasel ta stojolic ti jech ts'ibabil ta sc'op Diose: “Li ton ti la sbajic li jpasnaetique ja' ono'ox icom ta chiquin na”, xi. 8“Ja' sventa ac'o sbosi yacanic o; ja' sventa ac'o yalicuc o ta lum”, xi. Ja' te tsbosi yacanic o ya'yel ta sventa ti mu xch'unic li sc'op Diose, yu'un jech ono'ox ts'ibabil sc'oplalic. 9Pero li vo'oxuque sts'unubaloxuc xa li boch'o t'ujbil yu'un Diose, bats'i pale xa c'otemoxuc ta stojol Dios, ch'ul muc'ta lum xa c'otemoxuc, yu'uninojoxuc xa li Diose. Yu'un jech ac'o apucbeic batel li c'usitic toj lec la spas Diose, ti laj yic'oxuc loq'uel ta ic'al osile, ti laj yac'oxuc ta sac osil ti toj jun yutsile. 10Ta vo'onee muc to'ox steclumalucoxuc li Diose, pero li' ta orae steclumaloxuc xa. Ta vo'onee mu'yuc to'ox c'uxubinbiloxuc yu'un li Diose, pero li' ta orae laj xa xc'uxubinoxuc. 11Vo'oxuc ti lec jc'anojoxuque, ta jc'anboxuc vocol ta atojolic vo'oxuc ti ja' jechoxuc jech chac c'u cha'al yanlum, ti jxanubaletic no'oxe, ti jelovel no'ox chjelovic li' ta banamile. Mu me xach'unic li c'usi tsc'an abec'talique, yu'un scontra sbaic xchi'uc li c'usi tsc'an co'ntontique. 12Lecuc me c'usi chapasic ta stojol li boch'otic mu'yuc yich'ojic ta muc' Diose. Ac'o me chal ac'oplalic ti chopol c'usi chapasique, pero c'alal chilic ti lec c'usitic chapasique, chalbeic slequilal Dios ti c'alal chtal chapanvanuque. 13Ich'ic me ta muc' ta sventa Cajvaltic li boch'otic oy yabtelic li' ta banamile, jech chac c'u cha'al li muc'ta ajvalile, yu'un ja' tsots yabtel yich'oj. 14Jech noxtoc li yantic ajvaliletique, yu'un ja' tacbilic sventa chac'beic stoj smul li boch'otic chopol c'usi tspasique, xchi'uc ti ac'o yalbeic lec sc'oplal li boch'otic lec c'usi tspasique. 15Yu'un li Diose ja' tsc'an ti lec c'usitic chapasic li vo'oxuque, yu'un jech chmac ye avu'unic li boch'otic bolic ti mu c'usi sna'ique. 16Aq'uic ta ilel ti colemoxuc xae. Ti jech colemoxuque, mu me xanopic ti xu' xa chbat apasic c'usitic chopole. Ja' tsc'an chac'otic ta yajtunel Dios. 17Ich'ic me ta muc' scotol li cristianoetique. C'anic me li boch'o co'ol jch'unojtic Dios jchi'uctique. Ich'ic ta muc' li Diose; ich'ic ta muc' noxtoc li muc'ta ajvalile. 18Mozoetic, ich'ic me ta muc' ta scotol avo'ntonic li avajvalique. Mu me ja'uc no'ox xavich'ic ta muc' li boch'otic lequique, ti c'ux chaya'yoxuque. Ac'o me simaronic, ich'ic ta muc' noxtoc. 19Yu'un ja' lec chil Dios li boch'o jeche' no'ox ta xich' vocol, ti sna'oj tuc' c'usi tspas ta stojol Diose. 20Yu'un me ta scoj oy c'usi chopol chapasic ti chavich'ic vocole, mu'yuc stu chc'ot li vocol chats'iquique. Pero me ta sventa c'usi lec chapasic ti chavich'ic tsots vocole, me lec tsts'ic avu'unique, toj lec chil li Diose. 21Yu'un ja' jech tsc'an Dios ti laj yic'oxuc ta stojole, yu'un ja' jech laj yich' vocol ta aventaic ec li Cristoe. Ja' laj yac'boxuc avilic c'usi tsc'an chapasic, yu'un jech ac'o ats'aclinic batel. 22Li Cristoe me jutuc mu'yuc smul, me jutuc mu'yuc x'epalc'opoj. 23C'alal laj yich' chopolc'optaele, mu'yuc xchopolc'optavan ec. C'alal ja'o chich' tsots vocole, mu'yuc bu isibtasvan. Ja' no'ox laj yac'be sventain li Dios ti tuc' chchapanvane. 24Ja' stuc la xcuch ta sbec'tal li jmultic c'alal ja'o joc'ol ta cruze, yu'un jech xu' chijchamutic ta sventa li mulile; ja' chijcuxiutic ta spasel li c'usi tuq'ue. Li Cristoe ep ituch' sbec'tal, yu'un jech vo'oxuc colem lacomic. 25Yu'un li vo'oxuque ja' to'ox jechoxuc jech chac c'u cha'al ch'ayemal chijetic, pero li' ta orae lasutic tal ta stojol li Jchabivaneje. Ja' xa ta xchabioxuc jech chac c'u cha'al jchabichij, ja' xchabioj li acuxlejalique.


Copyright
Learn More

will be added

X\