1 San Juan 3

1A'yo ava'yic, toj ep la sc'anutic li Jtotic Diose, jech “jnich'nabtac” xijyututic. Ta melel vu'utic xnich'nabutic. Ja' yu'un li boch'otic ja' batem yo'ntonic ta sventa banamile mu xijyotquinutic, yu'un mu'yuc yotquinojic li Diose. 2Vo'oxuc ti lec jc'anojoxuque, xnich'nabutic xa li Diose, ac'o me mu to xvinaj c'u x'elan chijc'otutic. Pero jna'tic xa ti chijco'lajutic jchi'uctic Cristo c'alal ta xtale, jech ta to xcotquintic c'u x'elan. 3Scotol li boch'otic jech spatoj yo'ntonic ta stojol li Cristoe ta xaq'uilan sbaic ta lecubtasel jech chac c'u cha'al lec li Cristoe. 4Scotol li boch'otic ta sa'ilan smulique jbajmantal xa chc'otic noxtoc, yu'un li mulile jbajmantal chijc'ot yu'un. 5Li vo'oxuque xana'ic xa ti ital ta banamil li Cristoe, ja' sventa tal xch'ayes li mulile, yu'un li stuque mu'yuc smul. 6Scotol li boch'o oyic xa ta stojol Cristoe, mu xa sa'ilan smulic. Yan li boch'o ta sa'ilan smulique, yu'un mu'yuc to yilojic, mu to xotquinic li Cristoe. 7Jnich'nabtac, mu me boch'o xaslo'laoxuc. Li boch'o ja' ta spas c'usitic tuq'ue, ja' tuc' yo'nton, jech chac c'u cha'al tuc' yo'nton li Cristoe. 8Yan li boch'o ta to sa'ilan smule te to oy ta sc'ob pucuj. Yu'un li pucuje ja' la sliques li mulil ta sliquebale; ja' jech yabtel o. Ja' yu'un ital ta banamil li Xnich'on Diose, ja' tal slajesbe stsatsal yabtel li pucuje. 9Li boch'o ja' xnich'on Diose mu xa sa'ilan smul. Yu'un te xa oy stalel Dios ta yo'nton, jech ja' xa xnich'on Dios c'otem; mu'yuc xa ta yo'nton tsa'ilan smul. 10Jech ta xvinaj boch'o xnich'nab Dios xchi'uc boch'o xnich'nab pucuj. Scotol li boch'o mu spasilanic c'usitic tuq'ue xchi'uc li boch'otic mu'yuc sc'anoj xchi'ile, mu ja'uc xnich'on Dios. 11Yu'un ja' jech li chanubtasel laj ava'yic tal ta sliquebale. Ja' ti ac'o jc'anan jbatic ta jcotoltique. 12Mu me jpastic jech chac c'u cha'al Caín ti ja' xnich'on pucuje, jech la smil li yits'ine. ¿Me xana'ic c'u yu'un ti la smil li yits'ine? Yu'un li stuque toj chopol c'usi tspas; yan li yits'ine tuc' c'usi tspas. 13Quermanotac, mu me ch'ayeluc chc'ot avo'ntonic me chopol chayiloxuc li cristianoetic ti oyic ta sventa banamile. 14Li vu'utique jna'ojtic ti lijloc'utic xa ta sventa lajele, ti ja' xa lij'ochutic ta sventa cuxlejale, yu'un jc'anojtic xa li jchi'iltactique. Yan li boch'o mu sc'an xchi'ile, te to oy ta sventa lajel. 15Scotol li boch'o xti'et yo'nton yu'un xchi'ile ja' jmilvanej chc'ot. Jna'ojtic ti mu xcuxi sbatel osil li jmilvaneje. 16Li Jesucristoe laj yac' quiltic c'u x'elan li c'anvaneje, yu'un laj yac' sba ta milel ta jventatic. Ja'uc me jechutic ta sc'anel ec li jchi'iltique, ac'o me chijlajutic ta milel ta scojic. 17Li boch'o oy c'usi oy yu'une, me chil ti oy boch'o abul sbae pero me mu scoltae, ¿c'u x'elan chvinaj ti oy ta yo'nton li c'uxubinel yu'un Diose? 18Jnich'nabtac, mu me jeche'uc no'ox xloc' ta quetic ti chijc'anvanutique. Ac'o vinajuc ta sventa cabteltic ti ta melel chijc'anvanutique. 19Me chijc'anvanutique, jech ta jna'tic o ti oyutic ta stojol li Dios ti ja' melele, jech mu xlo'ilaj co'ntontic ta stojol li Diose. 20Ac'o me oy chal co'ntontic ti oy jmultique, pero li Diose yiloj c'usi oy ta co'ntontic, sna'oj scotol. 21Vo'oxuc ti lec jc'anojoxuque, me mu'yuc chalbutic co'ntontic ti oy jmultique, oy stsatsal co'ntontic ti c'alal ta jc'opantic Diose. 22Jech chiyac'butic scotol li c'usitic ta jc'anbetique, yu'un ta jch'unbetic li smantaltaque, yu'un ja' ta jpastic li c'usi tsc'ane. 23Li smantal Diose ja' ti ac'o cac' xch'unojel co'ntontic ta stojol li Xnich'one, ja' li Jesucristoe, xchi'uc ti ac'o jc'anan jbatic jech chac c'u cha'al laj yalbutic mantale. 24Li boch'o ta xch'unbe smantaltaque te oy ta stojol li Diose, xchi'uc te oy Dios ta stojol ec. Ta jna'tic ti li' oy ta jtojoltique, yu'un ja' chijyac'butic jna'tic li Ch'ul Espíritu yac'ojbutique.


Copyright
Learn More

will be added

X\