1 Corintios 9

1Li vu'une yajtacbolalun Cristo, xu' ta jpas scotol ec, yu'un laj quil ec li Jesuse, ja' li Cajvaltique, xchi'uc vo'oxuc cabteloxuc ta sventa li Cajvaltique. 2Me muc yajtacbolalucun Cristo cha'yic li yantique, jechuc. Pero li vo'oxuque tsc'an chach'unic ti vu'une, yu'un vo'oxuc senyailoxuc ta stojol Cajvaltic ti vu'un tacbilun ta melele. 3Scotol li boch'otic ep c'usitic chalic ta jventae, jech chcalbeic. 4Li vu'uncutique oy ta jventacutic xu' chquich'cutic ac'bel jve'elcutic, cuch'umcutic ec. 5Xu' ta jsa' cajnil ec ti ja' jch'unolajele. Xu' chquic' batel buyuc no'ox chibat ec jech chac c'u cha'al tspasic li yantic yajtacbolaltac xchi'uc li xchi'iltac Cajvaltique xchi'uc li Pedroe. 6¿Me yu'un ja' no'ox vu'uncutic jchi'uc Bernabé ti mu xu' ta jcomtsan cabtelcutique? 7Li boch'o ochem ta soldadoile, ¿me tsman stuc li c'usitic chtun yu'une? Li boch'o tsts'un ts'usube, ¿me mu teuc tslo'be sat? Li boch'o tsts'un chije, ¿me mu teuc tspits'be ya'lel xchu' yuch'? 8¿Me chanopic ti cristiano no'ox tsnop c'usi chcale? ¿Me mu jechuc ts'ibabil ta smantal li Diose? 9Yu'un jech ts'ibabil ta svun li Moisese: “Mu me xavac'be svozal avacax ti c'alal chavac'be stec' trigo sventa chloc' sbeq'ue”, xi ts'ibabil. ¿Me ja' no'ox c'ux ta yo'nton vacaxetic li Diose, 10o me vu'uncutic jc'oplalcutic ti jech laj yale? Ta melel vu'uncutic jc'oplalcutic ti jech laj yich' ts'ibaele. Li boch'o tsloc yosile jun yo'nton ch-abtej, yu'un oy c'usi tsmala. Jech noxtoc li boch'o tsmaj strigoe jun yo'nton ch-abtej, yu'un sna'oj ti tstabe sate. 11Me vu'uncutic la jts'uncutic li c'usi sventa chacuxiic o ta sventa Diose, sc'oplal te chloc' cu'uncutic li c'usi chtun cu'uncutic ta sventa jbec'talcutique. 12Me yantic jcholc'opetic chavac'beic li c'usi sc'oplal xu' chich'ique, li vu'uncutique ech'em to xu' chavac'buncutic ti jechuque. Pero mu'yuc bu ta jtunescutic li c'usi sc'oplal chquich'cutique. Te jts'icojcutic scotol, yu'un mu jc'an jmaccutic ta be li Lequil A'yej ta sventa Cristoe. 13¿Me mu xana'ic ti te la sta sve'elic li paleetic ti i'abtejic ta ch'ulna yu'un Diose? Jech noxtoc li boch'otic la xchic'beic smoton Dios ta scajlebe, ¿me mu xana'ic ti ja' te ive'ic o ta sventa li smoton Diose? 14Ja' no'ox jech ec li boch'o ja' yabtelic o xcholel li Lequil A'yeje, yaloj mantal Cajvaltic ti ja' te chve'ic o ta sventa li Lequil A'yeje. 15Pero li vu'une mu'yuc bu quich'oj li c'usi sc'oplal xu' chquich'e. Ti jech ta jts'ibaboxuc tale, ma'uc yu'un ta jc'an jech ac'o apasbicun. Me oy boch'o tsc'an tsoques li c'usi toj jun co'nton ta jpase, ja' lec ac'o chamcun. 16Ti jech ta jchol batel li Lequil A'yeje, mu xu' ta jtoy jba o, yu'un ja' no'ox ta jpas li c'usi cabtel ac'bilune. ¡Toj abul jba me mu jc'an jchol li Lequil A'yeje! 17Ti yu'unuc iloc' ta co'nton jtuc ta jchol li Lequil A'yeje, xu' ta jc'an jtojol ti jechuque. Pero ta sventa ti mu jechuc la sc'an co'nton jtuque, ja' yu'un ja' no'ox ta jpas li c'usi cabtel li'ac'bate. 18Pero oy xa jtojol chca'ay. Ja' jtojol chca'ay ti ta matanal ta jchol batel li sc'op Diose, ti mu'yuc bu chquich' li c'usi sc'oplal xu' chquich' ta sventa xcholel li Lequil A'yeje. 19Li vu'une mu'yuc boch'o yich'ojun ta venta; yutsil co'nton jtuc cac'oj jba ta mozoinel ta stojol scotolic, yu'un jech ep boch'o xu' chch'unic ta jventa. 20C'alal ja' jchi'inojic li israeletique, mero israelun ta jpas jba ec, yu'un jech xu' ta jpasic ta canal li israeletique. C'alal ja' jchi'inojic li boch'otic tsots sc'oplal cha'yic li smantaltac Diose, ja' jech tsots sc'oplal chca'ay ec li smantal Diose, ac'o me mu xa jch'unojuc ti ja' te chicol oe, yu'un jech xu' ta jpasic ta canal li boch'otic tsots to sc'oplal cha'yique. 21C'alal ja' jchi'inojic li boch'otic mu'yuc ya'yojbeic smantal Diose, mu'yuc ca'yoj smantal Dios ta jpas jba ec, yu'un jech xu' ta jpasic ta canal li boch'otic mu'yuc ya'yojic smantal Diose. Pero ma'uc yu'un mu'yuc jch'unojbe smantal li Diose, yu'un ja' ta jch'unbe smantal li Cristoe. 22C'alal ja' jchi'inojic li boch'otic mu'yuc to stsatsal yo'ntonic ta stojol Diose, ja' jech mu'yuc stsatsal co'nton ta jpas jba ec, yu'un jech xu' ta jpasic ta canal li boch'otic mu'yuc to stsatsal yo'ntonic ta stojol Diose. Ta jpas scotol c'u yepal xu' cu'un ta stojol scotolic, yu'un jech oy boch'otic xu' chcolic. 23Jech ta jpas ta sventa li Lequil A'yeje, yu'un jech co'ol oy c'usi lec ta jta jchi'uc li boch'otic ta xch'unique. 24Xana'ic c'u x'elan li boch'otic tstsal sbaic ta anile; co'ol chaq'uic persa scotolic, pero jun no'ox li boch'o chich' smotone. Tsc'an ja' jech chavaq'uic persa anil ec li vo'oxuque, yu'un jech xu' chata amotonic. 25Li boch'o oy ta yo'nton chac' persae, persa tsnopes sba ti oy c'usi mu xu' tspase, pero ja' no'ox ta sventa xu' chich' li smoton ti sna' xlaje. Pero li jmotontic chquich'tic vu'utique mu sna' xlaj o. 26Ja' yu'un li vu'une ja' jech chcac' persa chi'anilaj ec, pero muc vovil aniluc no'ox ta jpas batel. Tsots ta xcac' majel, pero muc ic'uc no'ox ta jmaj. 27Tsots chcac'be mantal li jbec'tale, vu'un ta jmozoin. Yu'un naca me ja' no'ox vu'un la jbijubtas li yantique, ti ts'acal vu'un muc xu' cu'un jtuque.


Copyright
Learn More

will be added

X\