1 Corintios 8

1Li'i ja' xa chacalboxuc tal sc'oplal li milbil matanal ta sventa c'usitic cuybilic ta diose. Ta jna' ti acotolic xa xana'beic lec smelole. Pero me ja' no'ox chcaltic ti jna'betic xa smelole, xu' chlic jtoy jbatic o. Yan me ja' jna'tic lec xijc'anvane, ja' sventa chijtsatsubutic. 2Me oy boch'o tsnop ti lec xa sna'e, le'e mu to sna' li c'usi lec ta otquinele. 3Li boch'o sc'anoj Diose x'otquinat lec yu'un li Diose. 4Ta sventa ti chajaq'uic me xu' chati'ic li smoton c'usitic cuybilic ta diose, pero xana'ic xa ti mu'yuc c'usi stu o li c'usitic cuybilic ta dios li' ta banamile; xana'ic ti jun no'ox Dios oye. 5Ac'o me oy boch'otic tscuyic ta diosetic li c'usitic oy ta vinajel xchi'uc li' ta banamile, ac'o me oy ep diosetic, oy ep yajvalic cha'yic, 6pero li vu'utique jna'tic lec ti jun no'ox Dios oye, ja' li Dios Totile, ti ja' la spas scotol c'usitic oye, xchi'uc ti ja' la spasutique. Jun no'ox li Cajvaltique, ja' li Jesucristoe, ja' ta sventa imeltsaj scotol li c'usitic oye, xchi'uc ja' ta sventa ti laj quich'tic pasel ec li vu'utique. 7Pero mu scotoluc sna'beic lec smelol jech chac le'e. Li boch'otic nopen xa'yic yich'el ta muc' li c'usi cuybilic ta diose, c'alal tsti'ic li c'usi ac'bil ta smotone, chlo'ilaj yo'ntonic ta scoj ti mu'yuc to stsatsal yo'ntonic ta stojol Diose, jech tsta smulic ta stojol Dios cha'yic. 8Ta melel muc ta sventauc ve'liletic ti lec chijyilutic Diose. Muc ja'uc ta sventa me ta jve'tic ti lec chijyilutique, xchi'uc muc ja'uc ta sventa me mu'yuc ta jve'tic ti chopol chijyilutique. 9Pero tsc'an chaq'uel abaic. Mu me ja'uc ta sventa ti mu'yuc xa chuculoxuc ti xu' te chyal ta lum avu'unic li boch'otic mu'yuc to stsatsal yo'ntonic ta stojol Diose. 10Vo'ot ti xana'be xa lec smelole, pero li boch'o mu'yuc to stsatsal yo'nton ta stojol Diose, me chil ti te chotolot chave' ta mexa yo' bu oy li sloc'obal c'usitic cuybilic ta diose, jech chlic snop ec ti xu' tsti'be li smotone. 11Ta sventa ti vo'ot xana'be xa smelole, jech xu' chch'ay ta be avu'un li jch'unolajel ti mu'yuc to stsatsal yo'nton ta stojol Diose. Pero li Cristoe laj yac' sba ta milel ta scoj. 12Me jech vo'ot ta acoj ta xchibaj yo'nton li jch'unolajel ti mu'yuc to stsatsal yo'nton ta stojol Diose, oy amul ta stojol. Pero ja' xa oy amul o ta stojol li Cristoe. 13Ja' yu'un me ta scoj no'ox ti'bol chchibaj yo'nton li jch'unolajele, ja' lec mu jti'tic o ti'bol, yu'un jech mu xchibaj yo'nton ta jventatic.


Copyright
Learn More

will be added

X\