1 Corintios 7

1Li' chacac'boxuc tal stac'ubil li c'usi laj ajac'bicun ta cartae. Ja' lec ti xu'uc mu sa' yajnilic li viniquetique. 2Pero ta sventa ti mu vocoluc chisujutic ta mulil li jbec'taltique, ja' lec ti ac'o oyuc yajnil stuquic li jujun viniquetique, ti ac'o oyuc smalal stuquic li jujun antsetique. 3Li vinique ac'o spas li c'usi sc'oplal tspas ta stojol li yajnile. Ja' no'ox jech ec li antse ac'o spas li c'usi sc'oplal tspas ta stojol li smalale. 4Li antse muc xa yu'unuc stuc li sbec'tale; ja' xa yu'un li smalale. Ja' no'ox jech ec li vinique muc xa yu'unuc stuc li sbec'tale; ja' xa yu'un ec li yajnile. 5Jech tsc'an ti mu xajalan abaique. Ja' no'ox me co'ol chanop achibalic ti tsots sc'oplal chac'opanic Dios jayibuc c'ac'ale, xu' mu xachi'in abaic. Ts'acal xlic achi'in abaic yan velta, yu'un naca me spasboxuc preva avo'ntonic banquilal pucuj ta scoj ti mu xu' avu'un atuquique. 6Ti jech chacalboxuc tale, ja' no'ox chcac' ana'ic c'usi xu' chapasic; mu ja'uc jun mantal chacalboxuc. 7Li vu'une ja' ta jc'an ti oyuc c'uxi jech xcomic scotol viniquetic jech chac c'u cha'al vu'une. Pero li jujunutique yantic o jmotontic laj yac'utic li Diose, jech mu co'oluc c'usi ta jnoptic. 8Li boch'o mu'yuc to nupul ts'acalique xchi'uc li me'on antsetique chcalbeic ti ja' toj lec oyuc c'uxi comicuc jech chac c'u cha'al vu'une. 9Pero me cha'ay ti mu xu' yu'unique, ac'o nupinicuc. Ja' xloc' venta me chnupinique; ja' vocol me te no'ox tsbolibtas yo'ntonique. 10Pero li boch'o nupul ts'acalic xae, chcalbeic jun mantal. Pero muc vu'cun jmantal; ja' smantal li Cajvaltique: Li antse mu me scomtsan li smalale. 11Pero me chlic svoc' sbae, mu xa me xnupin o. Yan me tsc'an chnupine, ja' ac'o slecubtas sc'opic xchi'uc li smalal ono'oxe. Ja' no'ox jech ec li vinique mu me xicta li yajnile. 12Li yantique oy c'usi chcalbeic tal. Vu'un jtuc chcal; mu ja'uc laj yalbun li Cajvaltique. Me oy jch'unolajel ti mu'yuc xch'unoj yajnile, pero me scotol yo'nton smalinoj smalal li antse, mu me xicta yajnil li vinique. 13Me oy junuc ants ti ja' mu'yuc xch'unoj Dios li smalale, me scotol yo'nton yic'oj yajnil li vinique, mu me xicta smalal li antse. 14Yu'un li vinic ti mu'yuc xch'unoje xu' tsta lecubtasel ta sventa li yajnil ti ja' xch'unoje. Ja' no'ox jech ec li ants ti mu'yuc xch'unoje xu' tsta lecubtasel ta sventa li smalale. Ti manchuque mu'yuc lec ch-ilbat yol xnich'onic ti jechuque, pero tana lec ch-ilatic yu'un Dios. 15Pero me ja' ch-ictavan comel li boch'o mu'yuc xch'unoje, ac'o batuc. Jech li vinic, o me ants ti xch'unoje, muc teuc chucul chcom o ta sventa le'e, yu'un ti laj yic'utic Diose tsc'an ti ac'o junuc co'ntontique. 16Antsetic, na'ic me ti oy yic'al xu' chcol ta aventaic li amalalique. Ja' no'ox jech ec li vo'oxuque viniquetic, na'ic me ti oy yic'al xu' chcol ta aventaic li avajnilique. 17Ti c'u x'elan amoton laj yac'boxuc Dios jujunoxuque, xchi'uc ti c'u xa'elanic c'alal laj yic'oxuc Diose, ja' jech oyanic o. Li'i ja' jech chanubtasel chcac' ta jujutsob jch'unolajeletic. 18Me avich'oj circuncisión c'alal laj yic'ot Diose, jechuc. Me mu'yuc avich'oj circuncisión c'alal laj yic'ot Diose, mu me xavich'. 19Yu'un li boch'o yich'oj circuncisione mu'yuc c'usi chloc' o; li boch'o mu'yuc yich'oj circuncisione mu'yuc c'usi chloc' o noxtoc. Li c'usi tsots sc'oplale ja' li xch'unbel smantal Diose. 20Ja' yu'un ti c'u xa'elanic c'alal laj yic'oxuc Dios jujunoxuque, ja' jech oyanic o. 21Me chonbilot ta mozoil c'alal laj yic'ot Diose, mu me xlo'ilaj avo'nton. Pero me oy c'uxi xu' avu'un chacol loq'uele, paso me. 22Yu'un li boch'o tiq'uil ta mozoil c'alal i'ic'at yu'un Cajvaltique, colem xa ta sventa li Cajvaltique. Yan li boch'o mu'yuc ochem mozoil c'alal i'ic'at yu'un Cajvaltique, ja' xa ta smozo Cristo ic'ot. 23Yu'un toyol atojol la stojoxuc li Diose, mu me ja'uc xavac' abaic ta mozoinel yu'un cristiano. 24Quermanotac, ti c'u xa'elanic c'alal laj yic'oxuc Dios jujunoxuque, ja' me jech comanic o ta stojol li Diose. 25Ta sventa li boch'otic mu'yuc nupul ts'acalique, mu'yuc quich'oj jun mantal yu'un Cajvaltic ti xu' chcalbeique. Ja' no'ox chcal li c'usi lec ta pasele. Ta sventa ti xc'uxubinojun xa li Cajvaltique, jech xu' chach'unic li c'usi chcale. 26Ta scoj ti ta vocol xa no'ox oyutic batele, ja' yu'un chcal ti ja' lec jech ac'o comicuc o li viniquetic jech chac c'u cha'al oyic ta orae. 27Ti c'u avepalic oy avajnilique mu me xavictaic. Ti c'u avepalic mu'yuc avajnilique mu me xasa'ic. 28Pero me chac'an chanupinic noxtoque, mu muliluc. Me chnupin ec li tsebetique, mu muliluc. Ja' no'ox oy me avocolic li' ta banamil; li vu'une mu jc'an ti oy avocolique. 29Quermanotac, ta sventa ti mu xa jaluc li' oyutic ta banamile, jech chacalboxuc. Ti c'u avepalic oy avajnilique ac'o mu'yucuc avajnil chava'yic. 30Li boch'o ch-oq'ue, ac'o mu'yucuc ch-oc' cha'ay. Li boch'o xcuxet yo'ntone, ac'o mu'yucuc xcuxet yo'nton cha'ay. Li boch'o chmanulaje, ac'o mu'yucuc c'usi tsta cha'ay. 31Li boch'o oy ep c'usitic oy yu'un li' ta banamile, ac'o mu'yucuc c'usi oy yu'un cha'ay. Yu'un li c'usitic oy li' ta banamile chjelov no'ox. 32Yu'un ja' ta jc'an ti mu'yucuc slo'il avo'ntonique. Li boch'o mu'yuc yajnile ja' tsnopilan c'usitic tsc'an Cajvaltic, yu'un jech xcuxet no'ox yo'nton yu'un li Cajvaltique. 33Yan li boch'o oy yajnile ja' tsnopilan bu tsta c'usitic chtun yu'un li' ta banamil, yu'un jech xcuxet no'ox yo'nton yu'un li yajnile. 34Jech mu co'oluc c'usi tsnopic. Li boch'o mu'yuc smalale ja' no'ox tsnop c'usi tsc'an li Cajvaltique, yu'un jech mu me sta smul xchi'uc sbec'tal xchi'uc yo'nton. Yan li boch'o oy smalale ja' no'ox tsnop c'usitic tspas li' ta banamil, yu'un jech xcuxet no'ox yo'nton yu'un li smalale. 35Li c'usi laj calboxuque ja' sventa alequilalic, ma'uc sventa chajmacoxuc. Ja' sventa lec ac'o batuc avu'unic, jech jun avo'nton chatunic yu'un Cajvaltic; mu'yuc c'usi chasmacoxuc. 36Me oy boch'o tsnop ti ja' lec chic' li smacbil tseb ta sventa ti ja' xa yorail chnupin cha'ye, ac'o spas li c'usi lec cha'ye. Mu muliluc, ac'o nupinuc. 37Pero me oy boch'o tsnop ti ja' lec mu xnupin oe, ti jech ic'ot ta yo'nton o ti mu persauc chic' li smacbil tsebe, ti xu' yu'un stuc cha'ye, ti mu'yuc boch'o isujat yu'une, toj lec me jech tspase. 38Ja' yu'un li boch'o chic' smacbil tsebe, lec. Li boch'o mu xiq'ue, ja' to toj ven lec. 39Li ants ti oy xa smalale, chucul xa o ta sventa mantaletic li' ta banamil ti c'alal cuxul li smalale. Pero me icham li smalale, mu'yuc xa ich'bil ta venta. Xu' xa chnupin xchi'uc li boch'o tsc'ane, ja' no'ox venta me xch'unoj Cajvaltique. 40Pero vu'une chcal ti ja' toj xcuxet yo'nton me mu xa xnupin oe. Jech chcal yu'un oy ta co'nton ec li Ch'ul Espíritu yu'un Diose.


Copyright
Learn More

will be added

X\