1 Corintios 6

1C'alal oy boch'o chlic sc'op xchi'uc yan jch'unolajele, ¿me lec ti chbat sc'an chapanel ta stojol li jchapanvanejetic ti mu'yuquic ta stojol Diose? ¿C'u yu'un mu teuc no'ox chac'anic chapanel yu'un li yu'untac Diose? 2¿Me mu xana'ic ti ja' sc'oplal yu'untac Dios ta xchapanic cristianoetic li' ta banamile? Me vo'oxuc sc'oplal chachapanic li cristianoetique, ¿c'u yu'un mu xu' avu'unic xchapanel li c'usi biq'uitic no'oxe? 3¿Me mu xana'ic noxtoc ti vu'utic sc'oplal ta jchapantic li j'almantaletique? ¡Buuc xa li c'usi chc'ot ta pasel cu'untic li' ta banamile lec xu' cu'untic xchapanel! 4Me oy ac'opic ti solel chac'anic chapanbele, ¿me lec chava'yic ti ja' chac'anic chapanel ta stojol li boch'otic mu'yuc stu chilic li steclumal Diose? 5Ti jech chacalboxuque, yu'un ac'o q'uexovanic. ¿Me yu'un mu'yuc boch'o bij avu'unic? ¿Me yu'un mu'yuc boch'o sna' xchapanvan avu'unic vo'oxuc ti co'ol ach'unojic Diose? 6¿Me yu'un ja' lec chava'yic ti te chaliquesic c'op ta stojol li boch'otic mu'yuc xch'unojic Dios, vo'oxuc ti ach'unojique? 7Ta melel, ja' toj chopol ti chaliquesic c'op vo'oxuc ti ach'unojique. ¿C'u yu'un mu xats'iquic li c'usi chopol chapasbatique? ¿C'u yu'un mu xats'iquic ti chalo'laatique? 8Yu'un ja' jech chapasic ec. Chopol c'usi chapasbe achi'ilic ec; chalo'laic ec li achi'ilique. 9¿Me mu xana'ic ti mu xu' ch-och yo' bu chventainvan Dios li boch'otic chopol c'usitic tspasique? Mu me xalo'la abaic. Yu'un mu xu' ch-ochic yo' bu chventainvan Dios li boch'otic chmulivajique, li boch'otic chich'ic ta muc' c'usi cuybilic ta diose, li boch'otic ta xmulivajic ta xchi'il no'ox sbaic ta antsil xchi'uc ta xchi'il no'ox sbaic ta vinicale, 10li j'eleq'uetique, li boch'otic xpich'et no'ox yo'ntonique, li jyacubeletique, li boch'otic chopol chalbeic sc'oplal xchi'ilique, xchi'uc li boch'otic tslo'labeic ta mucul c'usi oy yu'un xchi'ilique. 11Oy to'ox boch'o jech la spas avu'unic, pero li' ta orae pocbiloxuc xa, lecubtasbiloxuc xa. Tuc' xa avo'ntonic chayiloxuc Dios ta sventa li Cajvaltic Jesuse xchi'uc ta sventa li Espíritu yu'un Dios cu'untique. 12Oy jech chalic: “Scotol xu' ta jpastic”, xiic. Pero mu scotoluc ja' sventa jlequilaltic. Xu' ta jpastic scotol, pero li vu'une mu xcac' xistsalun jchopuc. 13Ta melel, li ve'lile ja' sventa jch'utic; li jch'utique ja' sventa ve'lil. Pero xcha'chopal ta xlaj sc'oplal yu'un li Diose. Li jbec'taltique mu ja'uc sventa mulil; ja' sventa li Cajvaltique. Li Cajvaltique ja' yu'un li jbec'taltique. 14Jech chac c'u cha'al icha'cuxesat yu'un Dios li Cajvaltique, ja' jech ta xcha'cuxesbutic jbec'taltic ta svu'el ec li Diose. 15¿Me mu xana'ic ti ja' xa sbec'tal Cristo c'otem li jbec'taltique? ¿Me lec ti chquich'be batel sbec'tal Cristo ti chbat cac'be sbec'talin jun jmulavil antse? ¡Mu lecuc! 16¿Me mu xana'ic ti jun no'ox sbec'tal chc'otic li boch'o ta xchi'in sba xchi'uc jun jmulavil antse? Yu'un jech ts'ibabil: “Li chibique jun no'ox sbec'tal ta xc'otic”, xi ts'ibabil. 17Jech noxtoc, li boch'o chac' sba ta stojol Cajvaltique, jun xa chc'ot xchi'uc. 18Ja' yu'un tsc'an chacomtsanic li mulivajele. Yu'un scotol li c'usitic yan chopol ta jpastique ma'uc sventa chcuts'inta o jbec'taltic. Yan li mulivajele ja' xa ta jsa' jmultic ta stojol li jbec'taltique. 19¿Me mu xana'ic ti xch'ulna Ch'ul Espíritu c'otem li abec'talique, yu'un te nacal ta avo'ntonic li Ch'ul Espíritu yac'ojboxuc Diose? Na'ic me ti muc avu'unuc aba atuquique. 20Yu'un toyol atojol la stojoxuc li Diose, ja' yu'un tsc'an chavich'ic ta muc' Dios xchi'uc li abec'talique.


Copyright
Learn More

will be added

X\