1 Corintios 5

1Vinajem ac'oplalic ti oy mulil te ta atojolique. Li mulil te oy avu'unique mu'yuc boch'o yan jech tspas, me ja'uc li boch'otic mu xotquinic Diose mu spasic jech. Yu'un oy boch'o yic'oj xcha'me' avu'unic. 2Pero atoyoj no'ox xava'ay abaic noxtoc. ¿Me mu ja'uc xloc' venta ti avoc'tauc abaique, xchi'uc ti aloq'uesuc ta atojolic li boch'o jech spasoje? 3Ac'o me mu'yuc te jchi'ucoxuc jchi'uc jbec'tal, pero li co'ntone te oy. Ta sventa ti te jchi'ucoxuc chca'ye, jech chapal xa cu'un c'u x'elan chcom li boch'o jech spasoje. 4Jech c'alal chatsob abaic ta sventa Cajvaltic Jesuse, te oyun chca'ay ta co'nton ec. Ta svu'el Cajvaltic Jesús 5cac'tic ta sc'ob Satanás li boch'o jech spasoje, yu'un jech ac'o sta ep svocol, jech chlaj sc'oplal li c'usi tsc'an sbec'tale, jech ta to xcol c'alal tsta yorail chchapanvan li Cajvaltique. 6Q'uelavilic, mu'yuc stu li atoyobbailique. ¿Me mu xana'ic ti ac'o me juteb no'ox chich' ac'bel svolesubil xch'ut li vots'bil arinae, ti tsvolesbe xch'ut scotole? 7Ja' lec loq'uesic li poco' svolesubil xch'ut pan te oy ta atojolique, yu'un jech ac'o c'otanic jech chac c'u cha'al ach' pan pasbil ta ach' arina ti mu'yuc xa yich'oj svolesubile. Yu'un li Chij chtun cu'untic ta sventa q'uin Coltaele ja' li Cristoe, yu'un ja' laj yac' sba ta milel ta jventatic. 8Ja' yu'un ja' ac'o jpastic li q'uin Coltael ti ma'uc ta jtunestic li pan ti yich'oj li poco' svolesubil xch'ute, ja' li mulile, li c'usitic chopole. Ja' ac'o jtunestic li pan ti ta melel mu'yuc xa yich'oj svolesubil xch'ute, ja' li c'usitic leque, li c'usitic melele. 9Calojboxuc ono'ox ta yan jcarta ti mu xu' chacap aba achi'uquic li boch'otic chmulivajique. 10Pero ma'uc laj cal ti mu xu' chalo'ilaj achi'uquic li jmulaviletic li' ta banamile, li boch'otic xpich'et no'ox yo'ntonique, li j'eleq'uetique, xchi'uc li boch'otic chich'ic ta muc' c'usitic mu ja'uc diose. Ti ja'uc sc'oplal laj calboxuque, tsc'an chaloq'uic li' ta banamil ti jechuque. 11Li smelol c'usi la jts'ibaboxuc tale ja' ti mu xu' chacap aba achi'uquic li boch'otic quermanotic ta alel ti chmulivajique, ti xpich'et no'ox yo'ntonique, li boch'otic chich'ic to ta muc' c'usitic cuybilic ta diose, li boch'otic chopol chalbeic sc'oplal xchi'ilique, li jyacubeletique, xchi'uc li j'eleq'uetique. Li boch'otic jech tspasique me ja'uc ta ve'el mu xu' chachi'inic. 12¿C'usi cabtel vu'un ti ta jchapan li boch'otic mu'yuquic ta stojol Diose? Li vo'oxuque ¿me mu ja'uc oy ta aventaic xchapanel li boch'otic oyic ta stojol Diose? 13Yu'un li boch'otic mu'yuc xch'unojique ja' oy ta sventa chchapan stuc li Diose. Ja' yu'un li vo'oxuque loq'ueso me ta atojolic li boch'o toj chopol c'usi spasoje.


Copyright
Learn More

will be added

X\