1 Corintios 4

1Ja' yu'un c'otuc ta avo'ntonic ti yajtuneluncutic Cristo no'oxe, ti ja' no'ox jventainojcutic yalel li c'usi snopoj Dios ti mu'yuc to'ox vinajeme. 2Ja' yu'un li boch'o oy ta sventaic li abtel le'e, tsc'an ti jun yo'nton ac'o spas li yabtelique. 3Ja' yu'un li vu'une mu tsotsuc sc'oplal chca'ay ti vo'oxuc chavalic c'u xi'elane xchi'uc ti c'u x'elan chiyalbicun jc'oplal yan cristianoetique. Xchi'uc mu'yuc chcal jtuc c'u xi'elan noxtoc. 4Ac'o me jna'oj lec ta jol ta co'nton ti mu'yuc c'usi chopol jpasoje, pero muc teuc lichapaj o jech. Yu'un li boch'o oy ta sventa chixchapanune ja' li Cajvaltique. 5Ja' yu'un li vo'oxuque ma'uc avabtelic chachapanvanic ti c'alal mu to ja'uc sc'ac'alile. Ja' to me ital li Cajvaltique, ja' chtal yac' ta ilel scotol li c'usitic mucule, xchi'uc ja' tsvinajes c'usi oy ta yo'nton li cristianoetique. Jech ta jujuntal chich'ic albel sc'oplalic yu'un Dios ti c'u x'elan yabtelique. 6Quermanotac, ti jech la jtunes jc'oplalcutic jchi'uc li Apolose, yu'un c'uxoxuc ta co'nton. Yu'un jech oy c'usi ac'o achanic ta jventacutic, jech mu ech'emuc xbat snopel avu'unic jech chac c'u cha'al chal li sc'op Diose, jech mu'yuc boch'o tstoy sba avu'unic ta sventa ti chat'ujic boch'o chavich'ic ta muq'ue. 7¿Boch'o laj yac' ti jech lec bijoxuque? ¿C'usi laj ata atuquic ti muc ja'uc laj yac'boxuc li Diose? ¿C'u yu'un ti chatoy aba achi'uquique?, yu'un xco'laj xchi'uc atuc laj ataic ti jech chapasique. 8Ataojic xa scotol ta melel. Jc'ulejoxuc xa, jpasmantaloxuc xa. Mu xa persauc vu'uncutic chajventainotcutic. Toj lec ti oyuc c'uxi xa'ochic ta jpasmantal ta melele, yu'un jech co'ol ta jpastic mantal ti jechuque. 9Pero li vu'une chquil ti Dios laj yac'uncutic ta mero slajeb yajtacbolale. Ja' jech c'otemuncutic jech chac c'u cha'al li boch'o chapal xa sc'oplal chich' milele. Vu'uncutic chcac'cutic labajuc, chcac'cutic elov li' ta banamil ta stojol li cristianoetique xchi'uc ta stojol li j'almantaletique. 10Li vu'uncutique bol cristiano chi'ilatcutic ta sventa li Cristoe; yan li vo'oxuque bij cha'ilatic ta sventa li Cristoe. Li vu'uncutique mu'yuc jtsatsalcutic chi'ilatcutic; yan li vo'oxuque lec tsots cha'ilatic. Li vo'oxuque ich'biloxuc ta muc'; yan li vu'uncutique sc'a'epal satiluncutic. 11Ja' yu'un oy jvocolcutic o ta vi'nal c'alal to tana. Oy jvocolcutic ta taqui-o'nal. Oy jvocolcutic ta scoj mu'yuc jc'u'cutic. Oy jvocolcutic ta majel. Mu'yuc jun jnacutic bu chinaquicutic o. 12Oy ep lubel chca'icutic sventa chi'abtej ta jc'ob jtucutic. Puru chopolc'optael chquich'cutic, pero li vu'uncutique puru bendición ta jc'anbecutic. Ep chquich'cutic uts'intael, pero ta jts'iccutic. 13Chopol chiyalbun jc'oplalcutic, pero ta lequil c'op ta jc'opancutic. Solel mu'yuc jtu chi'ilatcutic li' ta banamil; c'a'ep chi'ilatcutic o c'alal to tana. 14Ti jech chajts'ibaboxuc tale, mu yu'unuc chajq'uexlaltasoxuc. Ja' sventa chajtojobtasoxuc, yu'un jnich'naboxuc chca'ay, toj c'uxoxuc ta co'nton. 15Ac'o me oy lajunmil (10,000) boch'o sventainojoxuc ta sventa li Cristoe, pero mu epuc li atotique. Ta stojol Cristo Jesuse, vu'un jbec'tal jch'ich'aloxuc chca'ay ta sventa ti vu'un la jcholboxuc li Lequil A'yeje. 16Ja' yu'un ta jc'anboxuc vocol ta atojolic, ja' chanic c'u x'elan co'nton. 17Jech la jnop ta jtac tal ta atojolic li Timoteo ti xco'laj xchi'uc jnich'on chca'ye, ti lec jc'anoje, ti jun yo'nton ta stojol Cajvaltique. Ja' chtal svulesboxuc ta ajolic ti c'u x'elan co'nton ta sventa li Cristoe. Ja' chtal yalboxuc jech chac c'u cha'al chcac'be xchanic li jch'unolajeletic ta jujun nail tsobobbail ta buyuc no'oxe. 18Ja' no'ox ti oy jayibuc te achi'uquic ti muc' chac' sbaique, yu'un tscuyic ti mu jc'an xtal jq'ueloxuque. 19Pero jutuc xa sc'an xtal jq'ueloxuc me jech tsc'an li Cajvaltique. Jech te ta xcotquinic li boch'otic tstoy sbaique. Ma'uc no'ox ta jq'uel li c'usi chalique; ja' ta jq'uel me ta melel yich'ojbeic stsatsal li Diose. 20Yu'un me ventainbilutic xa lec yu'un Diose, ma'uc chvinaj ta sventa c'usi chcaltic; ja' chvinaj ta sventa c'usi ta jpastic ta stsatsal Dios. 21¿C'usi chac'anic? C'alal chtal jq'ueloxuque, ¿me chac'anic chital jchi'uc jnucul, o me chac'anic chital jchi'uc c'uxubinel xchi'uc slequil co'nton?


Copyright
Learn More

will be added

X\