1 Corintios 3

1Li vu'une quermanotac, muc xu' cu'un la jc'opanoxuc jech chac c'u cha'al li boch'o ventainbilic xa yu'un li Espiritue. La jc'opanoxuc jech chac c'u cha'al li boch'o ventainbilic to yu'un sbec'talique, jech chac c'u cha'al li boch'o ololic to ta stojol Cristoe. 2Ya'lel chu'il no'ox laj cac'boxuc avuch'ic. Ma'uc laj cac'boxuc li tsatsal ve'lile, yu'un mu to'ox xu' avu'unic. Pero yoquel to jech mu xu' avu'unic o c'alal to tana. 3Yu'un ja' to spasojoxuc ta mantal li abec'talique, yu'un ta to xati'-o'nta abaic; ta to xasa'ilanic c'op. ¿Me mu ja'uc yabtel abec'talic le'e? ¿Me mu ja'uc co'ol chapas achi'uquic li yan cristianoetique? 4Yu'un jech chavalic: “Vu'une ja' oyun ta stojol li Pabloe; vu'une ja' oyun ta stojol li Apolose”, xachiic. ¿Me mu ja'uc yabtel abec'talic le'e? 5¿C'usi yabtel li Apolose? ¿C'usi yabtel li Pabloe? Ja' no'ox chituncutic, ja' no'ox la jcholcutic ava'yic ti jech laj ach'unic Cajvaltique. Ja' no'ox la jpascutic jujununcutic li c'usi laj yac'bun jpascutic Cajvaltique. 6Li vu'une ja' no'ox la jts'un. Li Apolose ja' no'ox laj yat'es. Pero li boch'o laj yac' ch'iuque ja' stuc li Diose. 7Ja' yu'un li boch'o la sts'une xchi'uc li boch'o laj yat'ese, mu'yuc c'usi xu' yu'unic. Ja' tsots yabtel li boch'o laj yac' ch'iuque, ja' li Diose. 8Li boch'o ta sts'un xchi'uc li boch'o chat'ese co'ol oy stu, ac'o me ta jujuntal chc'ot yich' stojolic ti c'u x'elan la spasic jujunique. 9Yu'un li vu'uncutique ja' no'ox ta jchi'incutic ta abtel li Diose. Vo'oxuc yosil Dios c'otemoxuc, sna Dios c'otemoxuc, ja' to chich' va'anel batel. 10Li vu'une ta sventa slequil yo'nton Dios ti ja' jech c'otemun jech chac c'u cha'al banquilal alvanil ti ja' chac'be tal snacleb li nae, ti yan xa o boch'o tsva'an muyele. Pero jujununcutic tsc'an ta jq'uelcutic c'u x'elan lec chbat sva'anel cu'uncutic li nae. 11Yu'un mu'yuc boch'o xu' tsjelbe li snacleb ti ochem xae, ja' li Cajvaltic Jesucristoe. 12Me oy boch'o yantic o c'usi tslatsic muyel ta sba li snaclebe, me oy boch'o chac' c'anal taq'uin, saquil taq'uin, tonetic ti c'upilic sbae, o me te', me jobel, o me c'ajbene, 13ts'acal chich' aq'uel ta ilel. C'alal me la sta sc'ac'alile, chich' tiq'uel ta c'oc'. C'oc' xa chac' ta ilel li c'usi la jtunescutic jujununcutique. 14Li boch'o ja' la stunes li c'usi xcuch yu'un c'oq'ue chich' smoton. 15Yan li boch'o chc'ac' ta c'oc' li yabtele altic ich'ay o. Li stuque chcol to, ac'o me ja' xa jech chcol jech chac c'u cha'al li boch'o colel xa chcol loq'uel ta c'oq'ue. 16¿Me mu xana'ic ti vo'oxuc xch'ulna Dios c'otemoxuque, xchi'uc ti te nacal ta avo'ntonic li Ch'ul Espíritu yu'un Diose? 17Me oy boch'o tslilinbe li sna Diose, ta xlilinat yu'un Dios ec. Yu'un li snae, ja' li vo'oxuque, ja' bats'i ch'ulna c'otem yu'un. 18Mu me xalo'la aba atuquic li jujunoxuque. Me oy boch'o bij cha'ay ta sventa no'ox banamile, ac'o mu'yucuc sbijil cha'ay, yu'un jech bij chc'ot ta melel. 19Yu'un li jbijiltic sventa no'ox banamile ja' jboliltic c'otem ta stojol Dios. Yu'un jech ts'ibabil ta sc'op Dios: “Li Diose ja' chac' ti te chucul ac'o c'otuc ta sventa sbijilic li boch'otic bij scuyoj sbaique”, xi ts'ibabil. 20Jech ts'ibabil noxtoc: “Li Diose sna' ti mu'yuc stu c'usi tsnop li boch'otic bijique”, xi ts'ibabil. 21Ja' yu'un mu xu' chatoy abaic ta sventa ti chat'ujic boch'o lec chavilique, yu'un chtun avu'unic scotol. 22Me Pablo, me Apolos, me Cefas, me c'usitic oy li' ta banamil, me cuxuloxuc to, me chachamic, me ja' c'usi chataic li' ta ora o, me le' to batel, chtun avu'unic scotol. 23Li vo'oxuque yu'unoxuc li Cristoe. Li Cristoe ja' yu'un li Diose.


Copyright
Learn More

will be added

X\