1 Corintios 16

1Ta sventa ti laj ajac'bicun sc'oplal li smoton Dios chatsobic sventa chacoltaic li jch'unolajeletic ta Jerusalene, ja' jech xapasic jech chac c'u cha'al la jchanubtasic li jujutsob jch'unolajeletic ta Galacia banamile. 2Ta jujun domingo, ja' li sba c'ac'al xemunae, voq'uic c'uuc yepal xu' avu'unic jujunoxuc, ja' ti c'u yepal chapasic canale. Te xanaq'uic, yu'un mu ja'uc to chatsobic ta anil ti c'alal chic'ot ta atojolique. 3C'alal me te xa oyune, ja' chbat yaq'uic li boch'otic t'ujbil xa avu'unique. Vu'un ta xcac'beic batel carta, yu'un jech xu' chbat yaq'uic ta Jerusalén li matanal ti yutsil avo'ntonic laj atsobique. 4Yan me tsots sc'oplal vu'un chibate, xu' chixchi'inicun batel. 5C'alal me lijelov xa'ox tal ta Macedonia banamile, ja'o ta xtal jq'ueloxuc. Yu'un tsc'an ba'yuc te chijelov ta Macedonia banamil. 6Oy yic'al te chijalij jayibuc c'ac'al. Oy yic'al te oyun o c'alal to ch-ech' yorail sictic. Yu'un jech xu' jun avo'nton chacoltaicun batel ti bu tsc'an chibate. 7Yu'un mu jc'an ti j'ech'el no'ox ch-ech' jq'ueloxuque. Ta jc'an te ta jchi'inoxuc jayibuc c'ac'al me jech tsc'an li Cajvaltique. 8Li' ta orae li' to oyun o ta Éfeso c'alal to tsta yorail li q'uin Pentecostese. 9Yu'un yo'to ijam lec ti'na, lec xu' ep chi'abtej li'i, pero ep noxtoc li boch'otic chiscontrainicune. 10C'alal me ic'ot ta atojolic li Timoteoe, mu me xavaq'uic lo'ilajuc yo'nton. Ac'beic me xcuxetel yo'nton, yu'un ja' tspasbe yabtel Cajvaltic ec jech chac c'u cha'al li vu'une. 11Ja' yu'un, mu me boch'o mu'yuc stu chavilic. Junuc me yo'nton coltaic sutel tal li' yo' bu oyune, yu'un li' ta jmalacutic jchi'uc li jch'unolajeletique. 12Li quermanotic Apolose la jc'anbe vocol ti ac'o tal sq'ueloxuc xchi'uc jayibuc jch'unolajeletique. Pero muc to jechuc la snop ti chtal ta orae. Ja' to chtal ti c'alal xu' yu'un cha'ye. 13Q'uelo me abaic, j'ech'el me oyuc o xch'unojel avo'ntonic. Lec me tsots xapas abaic ta sventa li Cajvaltique; aq'uic me persa. 14Scotol li c'usitic chapasique ja'uc me sventa chac'anan abaic. 15Quermanotac, li Estéfanas xchi'uc yuts' yalaltaque xana'ic ti ja' sba jch'unolajeletic te ta Acaya banamile. Xana'ic noxtoc ti laj yac' sbaic o ta scoltael li steclumal Diose. 16Ja' yu'un avocolicuc ch'unbeic me c'usi chal li quermanotic le'e xchi'uc li yantic boch'otic jech chcoltavanique, ti jun yo'nton chtunic yu'un Cajvaltique. 17Toj xcuxet co'nton ti laj ataquic tal li Estefanase, xchi'uc li Fortunatoe, xchi'uc li Acaicoe. Yu'un ja' la scoltaicun ta sventa ti mu xu' avu'unic li vo'oxuque yu'un nom oyoxuc. 18Jech ipat co'nton ta sventaic, xchi'uc jech ipat avo'ntonic ec. Ja' yu'un tsc'an chavich'ic ta muc' li quermanotactic li'i. 19Scotol li jujutsob jch'unolajeletic li' ta Asia banamile chabanuc xayalboxuc tal. Jech noxtoc li Aquila xchi'uc Priscila, xchi'uc li jtsob jch'unolajeletic te tstsob sbaic ta snae tsots chastacboxuc tal achabanelic acotolic. 20Chabanuc xayalboxuc scotol li jch'unolajeletique. Jech ec li vo'oxuque patbo aba avo'ntonic ta jujuntal; ts'uts'o abaic ta sventa ti toj lec ac'anoj abaique. 21Vu'un li Pabloune, vu'un ta jts'ibaboxuc tal ta jc'ob jtuc li spatubil avo'ntonic li'i. 22Scotol li boch'o mu sc'anic Cajvaltic Jesucristoe ac'o ac'batuc stoj smulic. La' me ta ora, Cajval. 23Te ac'o comuc o ta atojolic li c'uxubinel yu'un Cajvaltic Jesucristoe. 24Toj ep jc'anojoxuc acotolic ta sventa li Cristo Jesuse. Jechuc.


Copyright
Learn More

will be added

X\