1 Corintios 15

1Quermanotac, ta jvulesboxuc ta ajolic li Lequil A'yej la jcholboxuc ava'yique, ja' ti laj avich'ic ta muq'ue, ti staoj yav jun avo'nton ach'unojic oe. 2Me jech j'ech'el ach'unojic o ti c'u x'elan la jcholboxuque, ta ono'ox xacolic. Yan me mu j'ech'eluc chach'unique, altic no'ox ti laj ach'unique. 3Ja' tsots sc'oplal laj ca'ay ba'yuc laj calboxuc li c'usi ac'bilun jna'e, ja' ti vu'utic ta scoj jmultic icham li Cristoe jech chac c'u cha'al ts'ibabil ono'ox ta sc'op Diose, 4xchi'uc ti imucate, ti icha'cuxi ta yoxibal c'ac'al jech chac c'u cha'al ts'ibabil ta sc'op Diose. 5Xchi'uc laj calboxuc noxtoc ti ja' ba'yuc laj yac' sba ta ilel ta stojol li Pedroe. Ts'acal laj yac' sba ta ilel ta stojol xlajchabalic. 6Ts'acal to laj yac' sba ta ilel ta stojol jch'unolajeletic ti ech'em ta vo'ob ciento (500) stsoboj sbaique. Li boch'otic laj yilique oy to ep cuxulic; li yantique ichamic xa. 7Ts'acal laj yac' sba ta ilel ta stojol li Santiagoe. Ts'acal laj yac' sba ta ilel ta stojol scotol li yajtacbolaltaque. 8Vu'un mero slajeb xa laj yac' sba ta ilel ta jtojol. Ja' jech lic'ot jech chac c'u cha'al olol ti chvoc' c'alal mu to sta yuale. 9Li vu'une bats'i biq'uitun yu'unic li yantic yajtacbolaltac Jesuse, yu'un mu snupin ti ochemun ta yajtacbolale, yu'un ech'em laj cuts'inta li steclumal Diose. 10Pero ta sventa slequil yo'nton li Diose, vu'un laj yac'bun cabtel. Pero mu alticuc li slequil yo'nton ta jtojole, yu'un vu'un xjelov xa yepal litun jech chac c'u cha'al li yantique. Pero muc ta jtsatsaluc jtuc, ja' ta sventa li slequil yo'nton Diose. 11Ja' yu'un, me vu'un, o me ja' li yantic yajtacbolaltac Jesuse, co'ol li c'usi ta jcholcutique. Ja' li Lequil A'yej ti ach'unojic xae. 12Li vo'oxuque laj xa avich'ic cholbel ti icha'cuxesat loq'uel ta smuquinal li Cristoe. ¿C'u yu'un oy boch'o avu'unic chal ti mu'yuc cha'cuxesele? 13Ti mu'yucuc boch'o ta xcha'cuxie, muc xcha'cuxi Cristo ti jechuque. 14Ti mu'yucuc xcha'cuxi li Cristoe, altic ti jech ta jcholcutique, xchi'uc altic ach'unojic ec ti jechuque. 15J'epalc'op testigouncutic yu'un Dios ti jechuque, yu'un laj xa calcutic ti Dios la xcha'cuxes loq'uel ta smuquinal li Cristoe. Ti mu'yucuc la xcha'cuxes li Cristoe, ta melel mu'yuc ta xcha'cuxi boch'otic chamenic ti jechuque. 16Ti ta melel mu'yucuc cha'cuxesele, muc xcha'cuxi Cristo ti jechuque. 17Ti mu'yucuc xcha'cuxi li Cristoe, altic ach'unojic; te oy o amulic ti jechuque. 18Ja' yu'un li boch'otic oyic ta stojol Cristo ichamique, ch'ayel batemic ti jechuque. 19Me ja' no'ox jpatoj co'ntontic ta stojol Cristo ti jayib c'ac'al cuxulutic li' ta banamile, vu'utic x'ech' to toj abul jbatic jech chac c'u cha'al yantic cristianoetic ti jechuque. 20Pero tana, li Cristoe icha'cuxi loq'uel ta smuquinal. Ja' sba sat ic'ot yu'unic li boch'otic ichamic xae. 21Ta sventa jun vinic i'och li lajele; ja' jech ta sventa jun vinic oy cha'cuxesel noxtoc. 22Jech chac c'u cha'al ta sventa Adán chijchamutic jcotoltique; ja' jech ta sventa Cristo chijcha'cuxiutic jcotoltic. 23Pero ta jujuchop xquechet chc'ot ta pasel. Ja' sba ic'ot li Cristoe. C'alal ta sut tal yan veltae, ja'o chcha'cuxiic ec li boch'otic oyic ta stojol Cristoe. 24Ja'o chtal li slajebale, ja'o ti c'alal laj xa stsal scotol li jpasmantaletique, ti tsots svu'elique, ti ch'unbil smantalique. Ja'o yorail chac'be ta sc'ob Dios Totil scotol li yabtele. 25Yu'un li Cristoe ja' to tsventain o batel scotol, ja' to ti c'alal pech'bil ta teq'uel chcom yu'un scotol li yajcontrae. 26Li slajeb yajcontra chulese ja' li lajele. 27Yu'un scotol li c'usitic oye ja' i'ac'bat sventain scotol. Ac'o me chal ta sc'op Dios ti ja' i'ac'bat sventain scotole, pero lec jamal chvinaj ti muc c'alaluc ta Dios sventainoje. Yu'un ja' i'ac'bunuc ta sc'ob yu'un scotol li Diose. 28C'alal me laj xa sventain scotol li c'usitic oye, li Nich'onile ja'o chlic yac' sba ta ventainel yu'un ec li boch'o i'ac'bunuc sventain scotole, yu'un jech ja' chlic sventain o scotol li Diose. 29Ti meleluc mu'yuc chcha'cuxi animaetique, ¿c'usi smelol chloc' yu'unic li boch'otic chich'ic vo' ta sventa li boch'otic chamenique? ¿C'u yu'un chich'ic vo' ta sventa boch'o chcham ti jechuque? 30Jech noxtoc, ¿c'u yu'un scotol ora jutuc mu chimilatcutic vu'uncutic ec ti jechuque? 31Quermanotac, melel li c'usi chcale. Yu'un toj xcuxet no'ox co'nton avu'unic ta sventa li Cajvaltic Jesucristoe, jech scotol c'ac'al jutuc muc chicham. 32Yu'un laj cac' persa la jcontrain jba jchi'uc li jti'vanej bolometic li' ta Efesoe. ¿C'usi chloc' cu'un ti jech cac'oj persae? Me ta melel mu'yuc cha'cuxesele, xu' chcaltic jech chac c'u cha'al oy chalique: “La' xa no'ox ve'cutic, cuch'tic lec vo', yu'un oc'om cha'ej xu' chijchamutic”, xiic. 33Mu me xalajic ta lo'lael. Muc lo'iluc ti oy jech chalique: “Me ta jchi'intic li boch'otic chopolique, chisoquesbutic li jlequil taleltique”, xiic. 34Jech tsc'an chaq'uel abaic lec; mu me xasa' amulic ta stojol Dios. Yu'un oy to jayibuc avu'unic ti mu xotquinic Diose, jech chacalboxuc yu'un ac'o q'uexovanic. 35Pero me oy boch'o jech chal avu'unique: “¿C'uxi ta xcha'cuxiic li boch'otic chamenique? ¿C'u x'elan li sbec'tal chich'ique?”, me xiique, 36mu'yuc sbijil li boch'o jech chale. Li c'usi chats'unique xana'ic ti mu xch'i me muc ba'yucuc chc'a'e. 37Ti c'u x'elan chats'unique, mu xa ja'uc jech ta xch'i tal. Yu'un t'anal li sbec' c'alal chats'unique, manchuc me trigo, o me oy c'usitic yan. 38Pero li Diose ja' jech chac' ch'iuc tal jech chac c'u cha'al tsc'an stuque. Jujuchop ts'unubil chchapan loq'uel tal lec. 39Mu co'oluc sbec'tal scotol li c'usitic oy sbec'tale. Yan o sbec'tal li cristianoetique; yan o sbec'tal li chonbolometique. Yan o sbec'tal li mutetique; yan o sbec'tal li choyetique. 40Yan o li c'usitic oy ta vinajele; yan o li c'usitic oy li' ta banamile. Yan o slequil li c'usitic oy ta vinajele; yan o slequil li c'usitic oy li' ta banamile. 41Yan o xojobal li c'ac'ale, yan o xojobal li ue, yan o xojobal li c'analetique. Li jujubej c'anale yantic o xojobalic noxtoc. 42Ja' no'ox jech ec ti c'alal ta xcha'cuxiic li animaetique. C'alal chich' muquele, ja' sventa chc'a'; c'alal chcha'cuxie, ja' xa sventa mu xc'a' o. 43C'alal chich' muquele, mu'yuc slequil yutsil. C'alal ta xcha'cuxie, toj jun xa yutsil. 44Li beq'uet chich' muquele stalel sna' xlaj. C'alal chcha'cuxie, mu xa sna' xlaj o. Oy jbec'taltic sventa banamil, oy jbec'taltic sventa sbatel osil. 45Jech ts'ibabil ta sc'op Dios: “Li sba vinic Adane ac'bil no'ox xch'ulel, jech icuxi”. Yan li slajeb Adane cuxul o; ja' chac' cuxlejal noxtoc. 46Pero ma'uc ba'yuc chijcuxiutic sventa sbatel osil. Ja' ba'yuc chijcuxiutic sventa banamil; ja' ts'acal ti chijcuxi sbatel osile. 47Yu'un li sba vinique ja' sventa no'ox banamil, yu'un pasbil ta lum. Yan li xchibal vinique liquem tal ta vinajel. 48Ti c'u x'elan pasbil ta lum sbec'tal li sba vinique, ja' jech jbec'taltic laj quich'tic o ec. Ti c'u x'elan li boch'o liquem tal ta vinajele, ja' jech chc'otic ec li boch'otic ja' sventa vinajele. 49Jech chac c'u cha'al ja' quich'ojbetic sloc'obal li Adán ti pasbil ta lume; ja' no'ox jech chc'ot quich'betic sloc'obal li Cristo ti ja' sventa vinajele. 50Chacalboxuc ava'yic quermanotac: Mu xu' chbat jchi'intic yo' bu tspas mantal Dios xchi'uc li jbec'taltic, li jch'ich'altic li'i. Yu'un mu xu' chchi'in sbaic xchi'uc c'usi sna' xc'a' xchi'uc li c'usi mu sna' xc'a'e. 51Ta jc'an chacalboxuc li c'usi ja' to laj yac'bun jna' Dios ti mu'yuc boch'o sna'e: Mu jcotolticuc co'ol chijchamutic. Pero jcotoltic co'ol chc'ataj ta ach' li jbec'taltique. 52Ta anil no'ox, jmaq'uel no'ox ta satil chc'ot ta pasel, ja'o ti c'alal chbac' oq'ues ta slajebale. Yu'un ta xich' jupanel li oq'uese, jech ta xcha'cuxiic scotol li boch'otic chamenique, jech mu xa sna' xchamic o. Jech ec li vu'utique chc'ataj ta ach' li jbec'taltique. 53Yu'un li c'usi sna' xc'a'e tsc'an c'atajesel ta c'usi mu sna' xc'a'. Li c'usi oy slajebe tsc'an c'atajesel ta c'usi mu'yuc slajeb. 54C'alal me ic'ataj xa li jbec'taltic ti sna' xc'a'e, me laj xa quich'tic li jbec'taltic ti mu sna' xc'a' oe, ic'ot xa o ta pasel ti jech ts'ibabil ta sc'op Diose: “J'ech'el ta slajesbe o sc'oplal li lajele”. 55“Lajel, ¿bu oy li avu'el atsatsale? Lajel, ¿bu oy li avabtejebe?”, xi ts'ibabil. 56Yu'un li yabtejeb lajele ja' li mulile. Li svu'el mulile ja' li mantaletique. 57Pero coliyalbutic Dios ti ja' chac' jtsaltic ta sventa li Cajvaltic Jesucristoe. 58Ja' yu'un quermanotac, vo'oxuc ti lec jc'anojoxuque, staojuc o me yav li avo'ntonique; mu me xajelilanic. Scotoluc ora abtejanic o yu'un li Cajvaltique; na'ic me ti mu alticuc cha'abtejic yu'un li Cajvaltique.


Copyright
Learn More

will be added

X\