1 Corintios 14

1Ja'uc me tsots sc'oplal chava'yic li c'anvaneje. C'anic noxtoc li matanal chac' Ch'ul Espiritue. Pero ja' oyuc ta avo'ntonic ti ja' ac'o avalic li c'usi tsc'an Diose. 2Yu'un li boch'otic chc'opojic ta yan c'ope, muc cristianouc tsc'opanic. Ja' tsc'opan sbaic xchi'uc li Diose, yu'un mu'yuc boch'o cha'ay li c'usi chalique, ac'o me ja' chalic ta sventa Espíritu li c'usi tsots sc'oplal ti mu'yuc boch'o sna'e. 3Yan li boch'otic ja' chalic c'usi tsc'an Diose, ja' cristianoetic tsc'opanic. Ja' sventa chijch'i ta stojol Dios, sventa tstsatsub co'ntontic, xchi'uc sventa chpat co'ntontic. 4Li boch'otic chc'opojic ta yan c'ope, ja' no'ox sventa tstsatsub yo'ntonic ta stojol Dios stuquic. Yan li boch'otic ja' chalic c'usi tsc'an Diose, ja' sventa tstsatsub ta stojol Dios li jch'unolajeletique. 5Lec chca'ay me acotolic xu' chac'opojic ta yan c'ope, pero ja' tsots sc'oplal chca'ay ti ja' ac'o avalic c'usi tsc'an Diose. Yu'un ja' muc' yabtel chc'ot li boch'o ja' chal c'usi tsc'an Diose. Ja' mu sta jech li boch'o chc'opoj ta yan c'ope, yu'un tsc'an chich' jelubtasel li c'usi chale, yu'un jech xu' tstsatsubic ta stojol Dios li jch'unolajeletique. 6Quermanotac, me ta yan c'op ta jc'opanoxuc c'alal chtal jq'ueloxuque, ¿c'usi chataic cu'un ti me mu ja'uc chacalboxuc c'usi chiyac'bun jna' li Diose, li c'usi xcotquine, li c'usi tsc'an Diose, xchi'uc li c'usitic tsc'an ta jchantique? 7Jech chac c'u cha'al me mu'yuc lec chich' jupanel amae, o me mu'yuc lec chich' tijel arpae, mu jna'tic c'usi q'ueojal tstijic ta ama, o ta arpa. 8Jech noxtoc me mu'yuc lec smelol chich' jupanel li oq'ues sventa pleitoe, ¿c'u x'elan xu' chchapan sbaic li soldadoetique? 9Ja' no'ox jechoxuc ec li vo'oxuque, me mu a'ibaj smelol ac'op c'alal chac'opojique, ¿c'u x'elan xu' cha'yic li c'usi chavalique, yu'un jech no'ox chavovilc'opojic? 10Ta melel oy ep ta chop c'opetic li' ta banamile, pero mu'yuc jchopuc c'op ti mu'yuc smelole. 11Me oy boch'o chisc'opanutic ta c'op ti mu xca'itique, ja' jech chca'itic jech chac c'u cha'al yanlum cristiano, jech xco'laj xchi'uc yanlum cristiano chijya'yutic ec. 12Ja' yu'un li vo'oxuque, ta sventa ti ja' oy ta avo'ntonic li matanal chac' Ch'ul Espiritue, ja' c'anic ti ja' ac'o ataic li matanal sventa tstsatsub ta stojol Dios li jch'unolajeletique. 13Ja' yu'un ti jayib chac'opojic ta yan c'ope, c'anbeic Dios ti ac'o yac'boxuc ana'ic sjelubtasel noxtoc li c'usi chavalique. 14Yu'un me ta jc'opan Dios ta yan c'ope, ta jch'ulel no'ox ta jc'opan jba jchi'uc li Diose, pero li jole mu'yuc c'usi tsnop. 15Ja' yu'un ¿c'usi tsc'an ta jpas cha'e? Ta jc'opan Dios ta jch'ulel; ta jc'opan Dios ta jol noxtoc. Chiq'uejin ta jch'ulel, pero chiq'uejin ta jol noxtoc. 16Pero me ta jch'uleltic no'ox ta jtojbetic ta vocol Diose, ¿c'u x'elan xu' “jechuc” xiic ec li boch'otic te jchi'uctic ti mu ja'uc jech sbijilique? yu'un mu xa'yic. 17Ta melel ti ta jtojbetic ta vocol Diose toj lec, pero li yantique mu stsatsubic o ta stojol Dios. 18Li vu'une ta jtojbe ta vocol Dios ta sventa ti xu' ep chic'opoj ta yantic c'ope; mu xataic jech li vo'oxuque. 19Pero c'alal chic'opoj ta stojol jujutsob jch'unolajeletique, tsots sc'oplal chca'ay ta jc'opanic ta c'op ti xa'ibeic lec smelole, yu'un jech xu' ta jchanubtasic, ac'o me vo'bel no'ox chic'opoj ta stojolic. Yan me ta yan c'op ta jc'opanique, ac'o me lajunmil (10,000) ta bel chic'opoj, mu xtun yu'unic. 20Quermanotac, mu me jechuc xanopic jech chac c'u cha'al ololetic. Ja'uc ololoxuc ta sventa li c'usi chopole. Ja'uc yijuben xa ajolic ta sventa li c'usi chanopique. 21Yu'un jech ts'ibabil ta sc'op Dios: “Li jun lum li'i ta jc'opanic ta yan c'op ti toj yan o ta a'yele, ti mu a'ibaj smelole. Pero mu xiyich'icun o ta muc' noxtoc”, xi ts'ibabil. 22Ja' yu'un li yantic c'ope ma'uc senyail ta sventa li boch'otic xch'unojique. Ja' senyail ta sventa li boch'otic mu'yuc xch'unojique. Pero me ta jc'op jtuctic chcaltic li c'usi tsc'an Diose, mu ja'uc sventa li boch'o mu'yuc xch'unojique; ja' sventa li boch'otic xch'unojique. 23Ja' yu'un c'alal jmoj chatsob abaic acotolic, vo'oxuc li jch'unolajeloxuque, me ta puru yantic c'op chac'opoj acotolique, me te ch-ochic tal ec li boch'otic mu'yuc to lec xchanojic, o me ja' li boch'otic mu'yuc to chch'unic lec sc'op Diose, “Yich'ojic chuvaj li c'usi tspasique”, ¿me mu xiuc ac'oplalic? 24Yan me acotolic ja' chavalic li c'usi tsc'an Diose, me te ch-ochic tal ec li boch'otic mu'yuc to chch'unic, o li boch'otic mu'yuc to xchanojic lec sc'op Diose, xu' chlic lo'ilajuc yo'ntonic yu'un li smulique; xu' chlic yil sbaic ti oy smulique. 25Chlic sna'ic ti chopol c'usi oy ta yo'ntonique, jech chlic squejan spatan sbaic. Chlic yich'ic ta muc' li Diose. Chlic yalic ti ta melel te oy Dios ta atojolique. 26Quermanotac, li c'usi tsc'an chapasic c'alal chatsob abaique: yan ac'o q'uejinicuc; yan ac'o xcholic sc'op Dios; yan ac'o yalic c'usi ch-ac'bat sna'ic yu'un Dios; yan ac'o c'opojicuc ta yan c'op; yan ac'o sjelubtasic li c'ope. Pero scotol li c'usi chapasique ja'uc me sventa chatsatsubic o ta stojol Dios. 27Me oy boch'o chc'opoj ta yan c'ope, ac'o c'opojuc chibuc, me toj epe xu' ta oxib. Pero ta jujuntal ac'o c'opojicuc, xchi'uc tsc'an oy jun jelubtasej c'op. 28Pero me mu'yuc boch'o tsjelubtase, ja' lec ac'o ch'anxiicuc. Mu me xc'opojic ta stojol jch'unolajeletic. Ac'o no'ox c'opojuc ta yo'nton stuc; ac'o sc'opan sbaic xchi'uc li Diose. 29Jech noxtoc, li boch'otic chalic c'usi ch-ac'bat sna'ic yu'un Diose, chib oxib no'ox ac'o c'opojuc. Li yantique ac'o ya'yic me lec, me mu lecuc. 30Me oy c'usi ch-ac'bat sna'ic yu'un Dios ec li boch'otic te chotajtique, ja' ac'o lajuc yo'nton ec li boch'o te chc'opoj tale. 31Yu'un acotolic xu' chavalic ta jujuntal li c'usitic chayac'boxuc ana'ic Diose, yu'un jech oy c'usi chachanic acotolic. Jech acotolic xu' chatsatsubic ta stojol Dios. 32Yu'un li boch'o chalic c'usi ch-ac'bat sna'ic yu'un Diose, ventainbilic lec yu'un li Ch'ul Espiritue, jech xu' tspajes sbaic. 33Yu'un li Diose mu ja'uc Dios ti lec chil vochlajetele. Ja' Dios ti tsc'an lec no'ox lamalutic, ti jun no'ox co'ntontique. Tsc'an jech chapasic noxtoc jech chac c'u cha'al tspasic scotol li steclumal Diose. 34Li antsetic avu'unique mu me xvocheticuc ti c'alal ta stsob sbaic li jch'unolajeletique. Yu'un li antsetique mu smeloluc chlo'ilajic ta stojol jch'unolajeletic. Ac'o no'ox xch'unic c'usi ch-albatic jech chac c'u cha'al chal li mantale. 35Me oy c'usi tsc'an tsna'ique, ac'o c'ot sjac'be smalalic ta snaic, yu'un mu smeloluc me chc'opojic ta nail tsobobbail li antsetique. 36¿Me yu'un vo'oxuc te iloc' tal ta atojolic li sc'op Diose, o me vo'oxuc xa no'ox te ic'ot ta atojolic? 37Me oy boch'o tsnopic ti toj lequil j'alc'opetic yu'un Dios cha'ay sbaique xchi'uc ti tojobtasbilic lec yu'un Ch'ul Espiritue, ac'o me sna'ic ti ja' smantal Cajvaltic li c'usi ta jts'ibaboxuc tal li'i. 38Li boch'o tsbaj li mantal li'i ac'o yich' bajel ec. 39Quermanotac, ja'uc me tsots sc'oplal chava'yic ti chavalic c'usi tsc'an Diose. Pero mu me xapajesic noxtoc li boch'o chc'opoj ta yan c'ope. 40Pero oyuc me smelol stuq'uil scotol li c'usitic chapasique, xchi'uc lec me ta scojolcojol xbat avu'unic.


Copyright
Learn More

will be added

X\